అణుశాంతికి భారత్‌ కట్టుబడి ఉంది

ఐరాస సర్వసభ్య సమావేశంలో ఎంపీ పురందేశ్వరి

ఈనాడు, దిల్లీ: అణు శాంతికి భారత్‌ కట్టుబడి ఉందని రాజమహేంద్రవరం ఎంపీ పురందేశ్వరి పేర్కొన్నారు. ఆమె గురువారం ఐక్యరాజ్యసమితి సర్వసభ్య సమావేశంలో అంతర్జాతీయ అణుఇంధన సంస్థ నివేదికపై భారత్‌ తరఫున ప్రసంగించారు. అణు సాంకేతికతను సురక్షితంగా, శాంతియుతంగా ఉపయోగించేలా దేశాలకు సాయం చేయడంలో అంతర్జాతీయ అణు ఇంధన సంస్థ కీలకపాత్ర పోషిస్తోందని అన్నారు. ఆ సంస్థకు భారత్‌ మద్దతు అందిస్తున్నట్లు గుర్తుచేశారు. జాతీయ అభివృద్ధి వ్యూహాల అమలు, కొవిడ్‌ మహమ్మారి నుంచి కోలుకోవడంలో అణుశాస్త్రం, సాంకేతికతలు కీలకపాత్ర పోషించినట్లు చెప్పారు. 2015 ప్యారిస్‌ ఒప్పందాన్ని దృష్టిలో ఉంచుకొని వాతావరణ లక్ష్యాలను చేరుకోవడానికి నిర్దేశించుకున్న 2030 ఎజెండా అమలుకూ అణుశాస్త్రం దోహదపడుతుందని పేర్కొన్నారు. అణు ఇంధన ఉత్పత్తి, పరిశోధనల్లో భారత్‌ గణనీయమైన పురోగతి సాధించినట్లు చెప్పారు. అణు ఇంధన వినియోగంలో భారత్‌ బాధ్యతాయుతంగా వ్యవహరిస్తోందని, అణుసాంకేతికతను శాంతియుతంగా ఉపయోగించడానికి కట్టుబడి ఉందని పేర్కొన్నారు. అంతర్జాతీయ అణు ఇంధన సంస్థకు భారత్‌ తన మద్దతును ఇక ముందుకూడా కొనసాగిస్తుందని భరోసా ఇచ్చారు.