హమ్మయ్యా.. సంగం బ్యారేజీకి ముప్పు తొలగింది!

ఎగువన ఆనకట్ట వద్ద ఇరుక్కున్న పడవను దూరంగా లాక్కెళ్లిన ఎన్డీఆర్‌ఎఫ్‌ సిబ్బంది

పాత ఆనకట్ట వద్ద ఇరుక్కున్న పడవకు తాళ్లు కడుతున్న ఎన్డీఆర్‌ఎఫ్‌ సిబ్బంది 

సంగం, న్యూస్‌టుడే: హమ్మయ్యా... బ్యారేజీకి ముప్పు తొలగింది... సంగంలో ప్రతి ఒక్కరి నోటా ఇదే మాట. ఎగువ భాగంలో ఆనకట్ట వద్ద ఇరుక్కున్న 30 టన్నుల బరువైన పడవను బ్యారేజీ వైపు రాకుండా పక్కకు తీసుకెళ్లే పని విజయవంతమైంది. శ్రీపొట్టి శ్రీరాములు నెల్లూరు జిల్లా సంగం పెన్నానది బ్యారేజీ వైపు ఇసుక సేకరించే మూడు పడవలు బుధవారం కొట్టుకొచ్చాయి. వాటిని గుర్తించిన యంత్రాంగం రెండు పడవలను సిబ్బంది సాయంతో నియంత్రించి పక్కకు చేర్చింది. మూడోది బ్యారేజీకి ఎగువన 400 మీటర్ల దూరంలో పాత ఆనకట్ట క్రెస్ట్‌ దగ్గర ఇరుక్కుపోయింది. దానిని పక్కకు తీసుకెళ్లేందుకు రెండోరోజైన గురువారం ఎన్డీఆర్‌ఎఫ్‌ సిబ్బంది, స్థానిక మత్స్యకారులు ప్రయత్నించారు. ఆనకట్ట వద్ద పది అడుగుల నీటి మట్టం ఉండగా... 59,379 క్యూసెక్కుల వరద దిగువకు వెళుతోంది. ఎన్డీఆర్‌ఎఫ్‌ కమాండెంట్ సుజిత్‌ గోపు ఆధ్వర్యంలో సిబ్బంది.. ముత్తుకూరు మధురానగర్‌కు చెందిన మత్స్యకారులు ప్రవాహంలో ఎదురు ఈదుకుంటూ పడవ వద్దకు వెళ్లి తాళ్లు కట్టారు. జలవనరుల శాఖ, తెలుగుగంగ అధికారులు బ్యారేజీలో 46 నుంచి 79 వరకు గేట్లు మూయించడంతో నీటిమట్టం 14 అడుగులకు పెరిగింది. దీంతో పడవను కదిలించడం సులువైంది. మరొక బోటు సాయంతో తాళ్లను కట్టి లాగుతూ, భారీ పడవను అర కిలోమీటరు ఎగువకు తీసుకెళ్లారు. అక్కడ తాటి చెట్టుకు కట్టేయడంతో ఊపిరి పీల్చుకున్నారు.

తాటి చెట్టుకు కట్టేసిన పడవ

అభినందించిన మంత్రి లోకేశ్‌.. 

తక్షణ స్పందన, సమష్టి కృషి, చిత్తశుద్ధి ఫలితంగా సంగం బ్యారేజీకి ముప్పు తొలగిందంటూ మంత్రి లోకేశ్‌.. జిల్లా కలెక్టర్‌ హిమాంశు శుక్లా, ఎస్పీ అజిత వేజెండ్లతో పాటు వివిధ ప్రభుత్వ విభాగాల అధికారులు, ఎన్డీఆర్‌ఎఫ్‌ సిబ్బందిని అభినందిస్తూ ఎక్స్‌లో పోస్టు చేశారు. సిబ్బంది సమయస్ఫూర్తిని హోంమంత్రి అనిత కొనియాడారు. మత్స్యకార నాయకులు దామోదర్, రామస్వామి వారి బృందాన్ని ఆర్డీవో పావని సత్కరించి అభినందించారు.