ఉపాధి శ్రామికులకు ప్రతిబంధకంగా ఈకేవైసీ నమోదు

38 లక్షల మందిపై ప్రభావం చూపే అవకాశం
‘లిబ్‌టెక్‌ ఇండియా’ అధ్యయన నివేదిక

ఈనాడు, అమరావతి: ఉపాధి హామీ పథకంలో శ్రామికులకు ఈకేవైసీ నమోదు తప్పనిసరి చేయడం ద్వారా రాష్ట్రవ్యాప్తంగా 38 లక్షల మంది ఉపాధిపై ప్రభావం చూపే ఆస్కారముందని ఈ పథకం అమలుపై ఏటా సర్వే చేస్తున్న స్వచ్ఛంద సేవా సంస్థ ‘లిబ్‌టెక్‌ ఇండియా’ పేర్కొంది. గ్రామాల నుంచి వలసలు, సాంకేతిక, మొబైల్‌ నెట్‌వర్క్‌ సమస్యల కారణంగా శ్రామికులు ఈకేవైసీ నమోదు చేయించుకోలేక పోతున్నారని తెలిపింది. ఈకేవైసీ తప్పనిసరి చేయొద్దని కేంద్రాన్ని రాష్ట్ర ప్రభుత్వం కోరాలని సూచించింది. ఏపీలో ఈ ఏడాదిలో ఇప్పటివరకు ఉపాధి హామీ పథకం అమలు తీరుపై అధ్యయనం చేసిన లిబ్‌టెక్‌ ఇండియా.. సంబంధిత వివరాలను శుక్రవారం ఓ ప్రకటనలో వెల్లడించింది.

• గతేడాదితో పోల్చితే ఈ ఏడాది మూడు జిల్లాలు ఉపాధి పని దినాల వినియోగంలో వెనుకబడ్డాయి. గరిష్ఠంగా ఎన్టీఆర్‌ జిల్లాలో 44.7%, చిత్తూరులో 31.3%, పల్నాడు జిల్లాలో 0.4% తక్కువ పనిదినాలు వినియోగించారు. శ్రీపొట్టి శ్రీరాములు నెల్లూరులో 4.8%, విశాఖపట్నం జిల్లాలో 4.1% ఎక్కువగా పని దినాలు ఉపయోగించుకున్నారు.
• జాతీయ స్థాయిలో పరిశీలిస్తే పనిదినాల వాడకంలో ఏపీలో ఈ ఏడాది 13.6% తగ్గుదల ఉంది. కుటుంబాల భాగస్వామ్యం కూడా 42.79 లక్షల నుంచి 40.74 లక్షలకు (-4.8%) తగ్గింది. షెడ్యూల్డ్‌ కులాల్లో 18.7%, షెడ్యూల్డ్‌ తెగల్లో 17%, ఇతరుల్లో 11.3% తగ్గుదల నమోదైంది.
• శ్రామికుల కనీస వేతనం గతేడాది రూ.300 కాగా, ఈ ఏడాది 307కి పెరిగింది. అయితే, పని దినాల వినియోగం తగ్గినందున శ్రామికులకు వచ్చే వార్షిక ఆదాయం రూ.10,695 నుంచి రూ.10,178కి తగ్గింది.