iPhone: ఫ్లిప్‌కార్ట్‌లో ₹49,999కే ఐఫోన్‌ 15.. ఐఫోన్‌ 13పైనా డిస్కౌంట్

iphone | ఇంటర్నెట్‌ డెస్క్‌: ఏడాదికోసారి వచ్చే పండగ సేల్స్‌లో ఐఫోన్‌ ఎప్పుడెప్పుడు కొనుగోలు చేద్దామా అని ఎదురుచూస్తున్న టెక్‌ ప్రియులకు ప్రముఖ ఇ- కామర్స్‌ సంస్థలు ఫ్లిప్‌కార్డ్ (Flipkart), అమెజాన్‌ (Amazon) గుడ్‌న్యూస్‌ చెప్పాయి. ఈ రెండు సంస్థలు నిర్వహిస్తున్న సేల్స్‌లో ఐఫోన్లపై ప్రత్యేక ఆఫర్లు అందిస్తున్నాయి. పెద్దఎత్తున రాయితీ, బ్యాంక్‌ ఆఫర్లతో తక్కువ ధరకే వీటిని విక్రయిస్తున్నాయి.ఒకవేళ ఈ సేల్స్‌లో యాపిల్‌ ఐఫోన్‌ కొనుగోలు చేయాలనుకుంటున్నారా? అయితే ఈ సేల్‌ సమయంలో ఐఫోన్‌ ధరలు ఎంత మేరకు తగ్గాయో చూసేయండి..

ఇటీవల ఐఫోన్‌ 16 (iPhone 16) లాంచ్‌ సందర్భంగా ఐఫోన్‌ 15 ధరను యాపిల్‌ తగ్గింపు ప్రకటించింది. 128 జీబీ బేస్‌ వేరియంట్‌ ధర రూ.69,900గా నిర్ణయించింది. తాజా ఫ్లిప్‌కార్ట్‌ బిగ్‌ బిలియన్‌ డేస్‌ సేల్‌లో ఈ మొబైల్‌ ధర రూ.54,999గా ఉంది. అంటే దాదాపు రూ.14వేల వరకు డిస్కౌంట్‌ లభిస్తోంది. దీనిపై ఇ- కామర్స్‌ ప్లాట్‌ఫామ్‌ అదనపు ఎక్స్ఛేంజ్‌ ఆఫర్‌ ద్వారా కొనుగోలు చేస్తే రూ.3 వేలు, హెచ్‌డీఎఫ్‌సీ బ్యాంక్‌ కార్డ్‌ సాయంతో కొనుగోలు చేస్తే మరో రూ.2,000 తగ్గింపు పొందొచ్చని ప్రకటించింది. అంటే అదనంగా మరో రూ.5వేల తగ్గింపుతో ఐఫోన్‌ 15ను రూ.49,999కే కొనుగోలు చేయొచ్చన్నమాట. 6.1 అంగుళాల ఓఎల్‌ఈడీ సూపర్‌ రెటీనా డిస్‌ప్లేతో ఈ ఫోన్‌ తీసుకొచ్చారు. డైనమిక్‌ ఐలాండ్‌తో కూడిన నాచ్‌ డిస్‌ప్లే, 48 ఎంపీ కెమెరా ఉంది.

పెట్రోల్‌, డీజిల్‌ ధరలు ₹2-3 తగ్గించేందుకు అవకాశం: ఇక్రా

రూ.39,999కే ఐఫోన్‌ 13

ఇక ఐఫోన్‌ 13 (iPhone 13)పై అమెజాన్‌ డిస్కౌంట్‌ అందిస్తోంది. సేల్‌లో భాగంగా ఈ మొబైల్‌ రూ.41,999కే విక్రయిస్తోంది. ఎస్‌బీఐ క్రెడిట్‌ కార్డ్‌ ద్వారా కొనుగోలు చేసే వారికి రూ.2,000 వరకు అదనపు డిస్కౌంట్‌ పొందొచ్చు. అంటే ఐఫోన్‌13 బేస్‌ వేరియంట్‌ రూ.39,999కే లభిస్తుంది. 6.1 అంగుళాల సూపర్‌ రెటీనా డిస్‌ప్లే, 1200 నిట్స్‌ పీక్‌ బ్రైట్‌నెస్‌తో దీన్ని తీసుకొచ్చారు. డ్యుయల్‌ కెమెరా 12 ఎంపీ సెన్సర్‌, 12 ఎంపీ సెల్ఫీ కెమెరా, 3240mAh బ్యాటరీ, 15W ఫాస్ట్‌ ఛార్జింగ్‌ సదుపాయంతో మూడేళ్ల క్రితం ఈ ఫోన్‌ను యాపిల్‌ లాంచ్‌ చేసింది.