క్రెడిట్‌ కార్డు.. వడ్డీ భారం లేకుండా..

క్రెడిట్‌ కార్డును వాడినప్పుడు పూర్తి బిల్లును గడువు తేదీ లోపు చెల్లించాలి. లేకపోతే బాకీ ఉన్న మొత్తంపై క్రెడిట్‌ కార్డు సంస్థలు వడ్డీని విధిస్తాయి. ఇది దాదాపు 35-40 శాతం వరకూ ఉంటుంది.

• చాలామంది బిల్లులో కనీస మొత్తం చెల్లిస్తుంటారు. నిజానికి ఇది పెద్ద పొరపాటే. మిగిలిన బాకీపై కార్డు సంస్థలు వడ్డీని విధిస్తుంటాయి. నెలనెలా ఈ కనీస చెల్లింపు మొత్తం పెరుగుతూ ఉంటుంది. ఏదైనా కొనుగోలు చేసినప్పుడు ఆ రోజు నుంచే వడ్డీని లెక్కిస్తుంటాయి. కాబట్టి, వీలైనంత వరకూ అవసరమైనప్పుడే కార్డును వాడాలి. మొత్తం బిల్లును ఒకేసారి చెల్లించేలా చూసుకోవాలి.
• క్రెడిట్‌ కార్డుతో నగదును తీసుకునే వీలూ ఉంటుంది. కానీ, నగదు తీసుకున్న రోజు నుంచీ వడ్డీ చెల్లించాల్సిందే. కొనుగోళ్లతో పోలిస్తే.. దీనికి విధించే వడ్డీ అధికంగా ఉంటుంది.
• సాధ్యమైనంత వరకూ క్రెడిట్‌ కార్డులను ఉపయోగించి నగదు తీసుకోకపోవడమే ఉత్తమం.
• కార్డు బిల్లులను సకాలంలో చెల్లించినప్పుడు కొన్ని క్రెడిట్‌ కార్డులు రివార్డులను ఇస్తుంటాయి. వీటిని పొందేందుకు ప్రయత్నించాలి.
• కార్డును తీసుకునేటప్పుడే.. బిల్లు ఆలస్యం అయినప్పుడు ఎంత శాతం వడ్డీ విధిస్తారన్న దానిపై స్పష్టమైన అవగాహన ఉండాలి. లేకపోతే అనవసర  భారం తప్పదు.