కారు రుణంపై టాపప్‌

మీకు ఇప్పటికే కారు రుణం ఉందా? అత్యవసరంగా డబ్బు కావాలా? కారు రుణంపై టాపప్‌ తీసుకునే ప్రయత్నం చేయొచ్చు. మంచి రుణ చరిత్ర ఉన్న వారికి బ్యాంకులు సులభంగానే ఈ టాపప్‌ను అందిస్తాయి.

ఆర్థిక అత్యవసరాల్లో కొత్తగా రుణానికి దరఖాస్తు చేసి, వేచి చూడాల్సిన అవసరం లేకుండా కారు రుణంపై టాపప్‌ సహాయపడుతుంది. ఇది వ్యక్తిగత అవసరాలకూ వాడుకోవచ్చు. లేదా వాహనం మరమ్మతు కోసమూ వినియోగించుకోవచ్చు.

•  కారు రుణం టాపప్‌ దరఖాస్తును బ్యాంకులు చాలా వేగంగా ఆమోదిస్తాయి.
•  రుణ దరఖాస్తు ఆమోదం పొందిన వెంటనే ఖాతాలో డబ్బును జమ చేస్తాయి.
•  సాధారణంగా ఎలాంటి అదనపు పత్రాలు అడకుండానే బ్యాంకులు టాపప్‌ రుణాన్ని అందించే అవకాశం ఉంది. కొన్నిసార్లు అదనంగా పత్రాలు కావాలని చెప్పొచ్చు.
•  టాపప్‌ రుణాన్ని పూర్తిగా ఆన్‌లైన్‌లోనే దరఖాస్తు చేసుకునేందుకు వీలుంటుంది. బ్యాంకు శాఖకు వెళ్లాల్సిన పనిలేదు. ఇప్పటికే రుణం తీసుకున్న బ్యాంకు వెబ్‌సైటు లేదా యాప్‌ నుంచి దీనికోసం దరఖాస్తు చేయొచ్చు.
•  ఈ టాపప్‌ రుణానికీ వాహన రుణానికీ సాధారణ వాహన రుణానికి ఉండే వడ్డీ రేట్లే వర్తిస్తాయి. కొన్నిసార్లు అరశాతం ఎక్కువా ఉండొచ్చు.
•  ఇప్పటికే వాహన రుణాన్ని ఇచ్చిన బ్యాంకు దగ్గర మన కారు హామీగా ఉంటుంది. కాబట్టి, టాపప్‌ రుణానికి ప్రత్యేకంగా తనఖా అవసరం ఉండదు.
• టాపప్‌ రుణం పొందడం సులభమే అయినా.. బ్యాంకు లేదా ఆర్థిక సంస్థ నిబంధనలను గమనించాలి. కొన్ని బ్యాంకులు వ్యక్తిగత రుణంగా పేర్కొంటూ.. 13-14 శాతం వరకూ వడ్డీని విధిస్తాయని గుర్తుంచుకోండి.