Nagpur: బ్రిడ్జి పైనుంచి రైల్వేట్రాక్‌పై పడిన కారు.. తెలుగువారికి గాయాలు!

ఈటీవీ ఆదిలాబాద్‌: మహారాష్ట్రలో రోడ్డు ప్రమాదం జరిగింది. 44వ నంబర్‌ హైవేపై వెళ్తున్న కారు అదుపు తప్పి రైల్వే ఓవర్‌ బ్రిడ్జి (ఆర్వోబీ నంబర్‌ 108)పైనుంచి కింద ఉన్న రైల్వే ట్రాక్‌పై పడింది. ఈ ఘటన నాగపుర్‌- ఇంగన్‌ఘాట్‌ మార్గంలోని బోర్‌ఖేడి సమీపంలో 796/16 పాయింట్‌ వద్ద చోటుచేసుకుంది. మొత్తం నాలుగు ట్రాక్‌లు ఉండగా.. 3, 4 ట్రాక్‌ల మధ్య కారు పడింది. ఈ ప్రమాదంలో అందులోని ఐదుగురు ప్రయాణికులకు గాయాలయ్యాయి. క్షతగాత్రులను స్థానికులు సమీపంలోని ఆస్పత్రికి తరలించారు. 

ప్రమాదానికి గురైన కారు నంబర్‌ టీఎస్‌ 13 సిరీస్‌తో ప్రారంభమైంది. దీని బట్టి అది హైదరాబాద్‌కు చెందిన వాహనంగా తెలుస్తోంది. హైదరాబాద్‌ నుంచి నాగపుర్‌ వెళ్తుండగా ఈ ప్రమాదం చోటుచేసుకున్నట్లు సమాచారం. గాయపడిన వారిని తెలుగువారిగా భావిస్తున్నారు.  స్థానికుల సమాచారంతో అప్రమత్తమైన రైల్వే అధికారులు.. ఆ మార్గంలో అరగంట సేపు రైళ్లను నిలిపివేశారు. కారును పక్కకు తొలగించిన తర్వాత రైళ్ల రాకపోకలను పునరుద్ధరించారు.