తినలేకపోతున్నాం..!

ఈనాడు-అమరావతి

సాంబారు

జిల్లాలో పాఠశాలల్లో మధ్యాహ్న భోజనం తినేందుకు పిల్లలు ఇష్టపడటం లేదు. సన్నాలకు బదులు వేరే బియ్యం సరఫరా అవుతున్నాయి. దీంతో అన్నం బాగా ముద్దవ్వటం, లావుగా ఉంటోంది. అది తింటే కడుపులో నొప్పి వస్తోందని కొందరు విద్యార్థులు దాని జోలికే వెళ్లటం లేదు. గతంలో తెనాలిలో పాఠశాలల సందర్శనకు పాఠశాల విద్యాశాఖ ఉన్నతాధికారులు అందరు వెళ్లినప్పుడు వారి దృష్టికి అన్నం బాగోటం లేదని లావుగా ఉంటోందనే ఫిర్యాదులు వెళ్లాయి. ఇటీవల జిల్లా పాలనాధికారి వివేక్‌ యాదవ్‌ కూడా ఎంతమంది పిల్లలు భోజనం చేస్తున్నారు, ఎంతమంది తినటం లేదు అందుకు కారణాలతో కూడిన వివరాలు అందజేయాలని జిల్లా మధ్యాహ్న భోజన పథకం అధికారులను ఆదేశించారు. 3530 ప్రభుత్వ పాఠశాలల్లో ఈ పథకం అమలవుతోంది. అయితే తొలుత జగనన్న గోరుముద్ద పథకం వినూత్నంగా ఉండటంతో చాలామంది పిల్లలు అప్పట్లో తిన్నారు. నూరుశాతం పిల్లలు దీన్ని తినేలా చేయాలని, పోషకాహారలోపం లేకుండా చూడాలనేది ప్రభుత్వ ఉద్దేశం. అందుకు ఈ పథకానికి పెద్దఎత్తున వ్యయం చేస్తోంది. క్షేత్రస్థాయిలో ఆశించిన రీతిలో పిల్లలు భోజనం చేయటం లేదని తెలుసుకుని యంత్రాంగం దిద్దుబాటు చర్యలకు ఉపక్రమించింది.

50 కేజీల సాధారణ బియ్యంలో పోర్టుఫైడ్‌ బియ్యం కిలో పరిమాణంలో కలుపుతారు. దీంతో ఆ అన్నం అంతా న్యూట్రీషన్‌ ఫుడ్‌గా మారిపోతుందని అంటున్నారు. జిల్లా వ్యాప్తంగా 3530 పాఠశాలల్లో 3,89,514 మంది విద్యార్థులు ఉన్నారు. వీరిలో సగటున రోజుకు 2.30 లక్షలమంది హాజరవుతున్నారు. భోజనం చేసేవారి సంఖ్య సుమారు 1.85 లక్షల నుంచి 2 లక్షల లోపే ఉంటారని అధికారవర్గాల సమాచారం. పోర్టుఫైడ్‌ రైస్‌ నిమిషం లోపే మెత్తగా ఉడికిపోతుందని, కానీ పౌరసరఫరాల నుంచి వస్తున్న బియ్యం గంటకు పైగా ఉడుకుతాయని వంట ఏజెన్సీ నిర్వాహకులు చెబుతున్నారు. ఇటీవల బియ్యంలో దుమ్ము, దువ్వ బాగా కలిసి ఉంటోందని వాటిని వేరు చేయటానికి చాలా సమయం పడుతోందని చెబుతున్నారు. కోడిగుడ్లు కూడా సన్నగా ఉండటంతో పాటు పాడైపోతున్న గుడ్ల శాతం ఎక్కువుగా ఉంటోంది. దీంతో చాలా మంది విద్యార్థులు వాటిని తినటం లేదు.