వెంకన్న కల్యాణం.. కల్యాణ క్రతువు

నిర్వహిస్తున్న అర్చకులు 

ఆత్రేయపురం, న్యూస్‌టుడే: కోనసీమ తిరుమలగా భాసిల్లుతున్న వాడపల్లిలోని వేంకటేశ్వరస్వామి దివ్య కల్యాణ మహోత్సవం శుక్రవారం రాత్రి శోభాయమానంగా జరిగింది. స్వామి అమ్మవార్లను సుందరంగా అలంకరించి ప్రధానాలయం నుంచి మంగళ వాయిద్యాలు, బాణసంచా కాల్పుల నడుమ తిరుచ్చి వాహనంపై కల్యాణ వేదిక వద్దకు తీసుకొచ్చి సింహాసనంపై ఆశీనులను చేశారు. అశేషంగా తరలివచ్చిన భక్తజనం మధ్య క్షేత్రపాలకుడు అన్నపూర్ణాసమేత విశ్వేశ్వరస్వామి సాక్షిగా దేవదేవుని కల్యాణం అద్యంతం కమనీయంగా జరిగింది. విష్వక్షేనపూజ, రక్షాబంధనం, మదుపర్కప్రాశన, కన్యాదానం, మహాదాశీర్వచనం తదితర కార్యక్రమాలు పండితుడు ఖండవిల్లి రాజేశ్వర వరప్రసాదచార్యులు నేతృత్వంలో రమణీయంగా జరిగాయి. కల్యాణమూర్తులకు ప్రభుత్వం తరఫున దేవాదాయ శాఖ ఆర్జేసీ, ఉత్సవ ప్రత్యేక అధికారి విజయరాజు, జిల్లా ఎండోమెంట్స్‌ అధికారి నాగమల్లేశ్వరరావు, దేవస్థానం డిప్యూటీ కమిషనర్‌, ఈవో కిశోర్‌కుమార్‌, ఉమాసుందరి దంపతులు పట్టు వస్త్రాలు సమర్పించారు.  

 స్వామివారి రథోత్సవం