సన్‌ పిక్చర్స్‌కు ఇళయరాజా నోటీసు

చెన్నై, న్యూస్‌టుడే: రజనీకాంత్‌ నటిస్తున్న ‘కూలి’ చిత్రం టైటిల్‌ టీజర్‌లో తన సంగీతాన్ని అనుమతిలేకుండా వాడినట్టు సన్‌ పిక్చర్స్‌కు ప్రముఖ సంగీత దర్శకుడు ఇళయరాజా నోటీసు పంపారు. లోకేశ్‌ కనకరాజ్‌ దర్శకత్వంలో రజనీకాంత్‌ 171వ చిత్రంగా ‘కూలి’ని సన్‌ పిక్చర్స్‌ నిర్మిస్తోంది. టైటిల్‌ టీజర్‌లో రజనీకాంత్‌ నటించిన ‘తంగమగన్‌’లోని ‘వా వా పక్కం వా’ పాట సంగీతం ఉపయోగించారు. తన అనుమతి లేకుండా ఉపయోగించిన ఆ పాట సంగీతాన్ని వెంటనే తొలగించాలని, లేకుంటే ఆ పాటకు తగిన అనుమతి పొందాలని సన్‌ పిక్చర్స్‌కు ఇళయరాజా నోటీసు పంపారు. అలా చేయకుంటే చట్టపరమైన చర్యలు తీసుకోవాల్సి ఉంటుందని తెలిపారు. తన సంగీతంలోని పాటలను తన అనుమతిలేకుండా స్టేజ్‌ షోలలో పాడకూడదని, సినిమాల్లోనూ ఉపయోగించకూడదని గతంలో ఇళయరాజా ఆంక్షలు విధించారు. దానిని అతిక్రమించినవారిపై కేసులూ పెడుతుండటం గమనార్హం.