మూడు మతాలకు ఒకే చోట మరుభూమి

ఆధునిక వసతులతో.. ఆరెకరాల్లో..
రూ.11.7కోట్ల వ్యయంతో సిద్ధమైన ముక్తిఘాట్‌

ఫతుల్లాగూడలోని శ్మశానవాటికలో చేపట్టిన నిర్మాణం

ఈనాడు, హైదరాబాద్‌: మానవత్వం పరిమళించేలా...అన్ని మతాల సారం ఒక్కటే అని చాటిచెప్పేలా తొలిసారి మూడు మతాలకు ఒకే ప్రాంతంలో ఆధునిక వసతులతో నిర్మిస్తున్న శ్మశానవాటిక ప్రారంభోత్సవానికి సిద్ధమైంది.  హెచ్‌ఎండీఏ ఆధ్వర్యంలోని ఉప్పల్‌ మండలంలోని ఫతుల్లాగూడలో దీనిని ఏర్పాటుచేసిన సంగతి తెలిసిందే. దాదాపు రూ.11.77 కోట్లతో ఈ ముక్తి ఘాట్‌ను 6 ఎకరాల్లో తీర్చిదిద్దారు. హిందూ, ముస్లిం, క్రైస్తవ మతాలకు సంబంధించి ఒకే ప్రాంతంలో వేర్వేరుగా రెండేసి ఎకరాల వంతున కేటాయించారు. త్వరలో అందుబాటులోకి తేనున్నట్లు హెచ్‌ఎండీఏ అధికారులు తెలిపారు.

ఇవీ విశేషాలు.

* ముక్తి ఘాట్‌లో 20శాతం మాత్రమే నిర్మాణాలుంటాయి. ఇండియన్‌ గ్రీన్‌ బిల్డింగ్‌ కౌన్సిల్‌ మార్గదర్శకాల ప్రకారం పచ్చదనానికి ప్రాధాన్యమిచ్చారు.

* వేర్వేరుగా హిందూ, ముస్లిం, క్రైస్తవ సంప్రదాయాల్లో అంత్యక్రియలు నిర్వహించేలా ఏర్పాట్లుచేశారు. హిందూ సంప్రదాయంలో మృతదేహాల దహనానికి విద్యుత్తు వినియోగించనున్నారు.

* మృతుల అస్థికలు పుణ్య నదుల్లో కలిపే దాకా ఇక్కడే భద్రపర్చుకునే సౌకర్యం కల్పించారు. మృతదేహాలను తరలించడానికి ప్రత్యేక వాహనాలతో పాటు అంతిమ సంస్కారాల్లో జాప్యం జరిగితే అంతవరకు భద్రపరిచేందుకు ఆరు ఫ్రీజర్లు అందుబాటులోకి తేనున్నారు.

* వివిధ కారణాలతో అంత్యక్రియలకు రాలేని కుటుంబ సభ్యులు, బంధువులు ఆ కార్యక్రమాన్ని ప్రత్యక్షంగా వీక్షించేలా వైఫైతో సౌకర్యం అందుబాటులోకి తేనున్నారు. సెల్‌ఫోన్‌ లేదా ట్యాబ్‌లో చూసేలా ఏర్పాట్లు చేస్తున్నారు.

* పూర్తిగా సౌర విద్యుత్తును వినియోగించనున్నారు. ఇందుకు ప్రత్యేకంగా ప్లాంటు ఏర్పాటు చేశారు. స్నానపు, విశ్రాంతి గదుల్లో నీరు పునర్వినియోగమయ్యేలా  మురుగు  శుద్ధి కేంద్రం నిర్మించనున్నారు. మానసిక ప్రశాంత కలిగేలా పచ్చిక బయళ్లు, పూల మొక్కలు.. ఇలా అన్ని వసతులను తీర్చిదిద్దనున్నారు.