రాజధానిలో 1.12 కోట్లకు చేరిన ఓటర్లు
శేరిలింగంపల్లిలో అత్యధికంగా 7.32 లక్షలు

ఈనాడు, హైదరాబాద్‌: రాజధాని ఓట్లపై అని పార్టీలు కోటి ఆశలు పెట్టుకున్నాయి. ఈ నెలాఖరున జరగనున్న శాసనసభ ఎన్నికలకు అనుబంధ ఓటర్లతో తుది జాబితా సిద్ధమైంది. అందులో నగర ఓటర్ల సంఖ్య భారీగా పెరిగింది. దీంతో ఇక్కడి ఓటర్లను ప్రసన్నం చేసుకోవడంపై నాయకులందరూ దృష్టిసారించారు. రాజధాని పరిధి హైదరాబాద్‌, రంగారెడ్డి, మేడ్చల్‌ జిల్లాలు, సంగారెడ్డి జిల్లాలోని పటాన్‌చెరు నియోజకవర్గం కలిపి 29 స్థానాల్లో ఓటర్ల సంఖ్య 1.12కోట్లకు చేరినట్లు అధికారులు వెల్లడించారు. అక్టోబరు 4న విడుదలైన తుది ఓటరు జాబితాతో పోల్చితే సుమారు 7లక్షల ఓటర్లు అనుబంధ జాబితాలోకి వచ్చారు. కొత్త ఓటర్ల దరఖాస్తుకు అక్టోబరు 31 వరకు ఎన్నికల సంఘం అవకాశం ఇవ్వడంతో హైదరాబాద్‌ జిల్లాలో 1,79,379 మంది జాబితాలో చేరారు. 84,985 ఓట్లను జాబితాను రద్దు చేశారు.హైదరాబాద్‌, రంగారెడ్డి నియోజకవర్గాల వారీగా తాజా ఓటర్ల జాబితా ఇది.