కార్మికులకు వేతనంతో కూడిన సెలవు ఇవ్వాలి

పొరుగు రాష్ట్రాల్లో పోలింగ్‌ రోజు వర్తింపు
అన్ని సంస్థలకు ప్రజా సంబంధాలశాఖ ఆదేశం

సైదాపేట, న్యూస్‌టుడే: పొరుగు రాష్ట్రాలైన ఆంధ్రప్రదేశ్‌, కర్ణాటక, కేరళలో లోక్‌సభ ఎన్నికల పోలింగ్‌ జరిగే రోజు కార్మికులకు వేతనంతో కూడిన సెలవు ఇవ్వాలని తమిళనాడు ప్రజా సంబంధాల శాఖ తెలిపింది. అలా సెలవు ఇవ్వని సంస్థలపై చర్యలు తీసుకుంటామని హెచ్చరించింది. దీనికి సంబంధించి మంగళవారం తమిళనాడు శాఖ విడుదల చేసిన ప్రకటనలో... కేరళలో ఈ నెల 26న, ఆంధ్రాలో మే 13న లోక్‌సభ, శాసనసభ ఎన్నికలు, కర్ణాటకలో ఈ నెల 26న, మే 7న రెండు విడుతలుగా లోక్‌సభ ఎన్నికలు జరగనున్నాయని పేర్కొంది. తమిళనాడులోని పలు రంగాలకు చెందిన ప్రైవేటు సంస్థలు, ప్రభుత్వరంగ సంస్థల్లో పని చేసే ఆంధ్రా, కర్ణాటక, కేరళకు చెందిన రోజువారీ కూలీలు, కాంట్రాక్టు ఉద్యోగులు తదితర అన్ని రకాల సిబ్బందికి ప్రజాప్రాతినిధ్య చట్టం కింద వారి సొంత రాష్ట్రాలకు వెళ్లి ఓటు హక్కు వినియోగించుకునే విధంగా వేతనంతో కూడిన సెలవు ఇవ్వాలని తెలిపింది. లేని పక్షంలో సంబంధిత సంస్థలపై తగిన చర్యలు తీసుకుంటామని హెచ్చరించింది.