అమరావతి: సార్వత్రిక ఎన్నికల తనిఖీల్లో భాగంగా తెలుగు రాష్ట్రాల్లో భారీగా సొత్తును అధికారులు స్వాధీనం చేసుకున్నారు. ఏపీలో రూ.119 కోట్ల విలువైన అక్రమ మద్యం, డ్రగ్స్‌ను స్పెషల్‌ ఎన్‌ఫోర్స్‌మెంట్‌ బ్యూరో సిబ్బంది పట్టుకున్నారు. కర్ణాటక, తెలంగాణ, గోవా నుంచి వస్తున్న మద్యాన్ని కట్టడి చేసేందుకు రాష్ట్ర వ్యాప్తంగా 150కి పైగా చెక్‌పోస్టుల్లో అధికారులు తనిఖీలు చేపట్టారు. మొత్తం 68,312 కేసులు నమోదు చేశారు. ముందస్తుగా మరో 39,232 మందిపై పోలీసులు బైండోవర్‌ కేసులు నమోదు చేశారు.

మరోవైపు తెలంగాణలో ఇప్పటివరకు రూ.202 కోట్ల సొత్తు స్వాధీనం చేసుకున్నట్లు అధికారులు వెల్లడించారు. రూ.76.65 కోట్ల నగదు, రూ.43.57 కోట్ల విలువైన మద్యం, రూ. 29.62 కోట్ల విలువైన 118 కిలోల బంగారం, వెండి ఆభరణాలు, రూ.26.54 కోట్ల విలువైన 13.86 లక్షల వస్తువులు స్వాధీనం చేసుకున్నట్లు తెలిపారు.