కోరుకొండ: లక్షలాది మంది అభిమానులు ఉన్న సినిమా హీరోలంటే సీఎం జగన్‌కు కుళ్లు అని జనసేన అధినేత పవన్‌ కల్యాణ్ విమర్శించారు. అందరు సినీ హీరోల అభిమానులు ఈ విషయాన్ని గుర్తు పెట్టుకోవాలని విజ్ఞప్తి చేశారు. తూర్పుగోదావరి జిల్లా రాజానగరం నియోజకవర్గంలో జరిగిన ఎన్నికల ప్రచార సభలో ఆయన ప్రసంగించారు.

‘‘ఎన్టీఆర్‌ ముఖ్యమంత్రిగా ఉన్నప్పుడు కూడా చాలా మంది నటులు ఇతర పార్టీల్లో ఉన్నారు. ఆయన్ను రాజకీయంగా విమర్శించే వారు. కానీ, ఎప్పుడూ కూడా ఎన్టీఆర్‌.. వారిని ఇబ్బంది పెట్టలేదు. అదీ.. ఆయన సంస్కారం. తెలుగుదేశం పార్టీతో గతంలో వ్యక్తిగతంగా విభేదాలున్నప్పటికీ నా సినిమాలను ఎప్పుడూ ఆపలేదు.

సినిమా టికెట్ల ధరల విషయమై సీఎం జగన్‌తో మాట్లాడేందుకు చిరంజీవి, ప్రభాస్‌, మహేశ్‌ వెళితే వారిని అగౌరవపర్చారు. ఇంటి బయట ఎక్కడో వాహనాలు ఆపేసి.. నడిపించారు. ప్రైవేటు మీటింగ్‌ జరుగుతుంటే.. శాడిస్టిక్‌గా సీక్రెట్‌ కెమెరాలు, మైక్‌లు పెట్టారు. చిరంజీవి అందరి తరఫున మాట్లాడితే.. ఆ వీడియోలను బయటకు రిలీజ్‌ చేసి అగౌరవపరిచారు. లక్షలాది మంది అభిమానులు గుండెల్లో పెట్టుకునే హీరోలంటే జగన్‌కు కుళ్లు. కలుగులో ఎలుక లాంటి జగన్‌.. అది తట్టుకోలేరు. సినిమా టికెట్ల ధరలు పెంచాలంటే చిరంజీవికి, హీరోలకి సంబంధం లేదు. అందుకోసం నిర్మాతల మండలి, ట్రేడ్‌ బాడీ ఉంది. అజాత శత్రువు చిరంజీవి.. ఆయన ఎవరి జోలికి వెళ్లరు. అలాంటి మనిషిని కూడా కించపరిచిన వ్యక్తి జగన్‌. ముఖ్యంగా ప్రభాస్‌, మహేశ్‌బాబు, జూనియర్‌ ఎన్టీఆర్‌, అల్లు అర్జున్‌, రామ్‌చరణ్‌ అభిమానులు ఈ విషయం గుర్తుపెట్టుకోవాలి’’ అని పవన్‌ అన్నారు.