తెదేపా ప్రధాన కార్యదర్శి నారా లోకేశ్‌

ఈనాడు, కర్నూలు: రాష్ట్రప్రభుత్వం ల్యాండ్‌ టైటిలింగ్‌ చట్టంతో ప్రజల ఆస్తులు, భూములను కొట్టేసే ప్రయత్నం చేస్తోందని తెదేపా ప్రధాన కార్యదర్శి నారా లోకేశ్‌ ఆరోపించారు. నంద్యాలలోని రాణి-మహారాణి థియేటర్ల మైదానంలో శుక్రవారం నిర్వహించిన యువగళం సభలో ఆయన యువతీ యువకులతో ముఖాముఖి నిర్వహించారు. ఈ సందర్భంగా లోకేశ్‌ మాట్లాడుతూ.. ముఖ్యమంత్రి అప్పుల అప్పారావులా తయారయ్యారని ఎద్దేవా చేశారు. ప్రభుత్వ స్థలాలు, సచివాలయం, అసెంబ్లీ, చివరకు రహదారులనూ తాకట్టు పెట్టారన్నారు. తాజాగా ప్రజల భూములను తాకట్టు పెట్టేందుకు ప్రయత్నిస్తున్నారని ధ్వజమెత్తారు. తాత ముత్తాతలు, తల్లిదండ్రులు తమ వారసులకు ఇచ్చిన భూముల్లో జగన్‌ తన ఫొటోతో సర్వే రాళ్లు వేయించుకున్నారని, పాస్‌ పుస్తకాలపై తన ఫొటోలు వేసుకున్నారని విమర్శించారు. ఇంతకాలం ముఖ్యమంత్రి తాను మీ బిడ్డనంటూ అందరినీ నమ్మించారని.. ఇకపై మీ బిడ్డను కాబట్టి మీ ఆస్తులు కూడా ఇవ్వాలంటారని ఎద్దేవా చేశారు. ల్యాండ్‌ టైటిలింగ్‌ చట్టంతో అనేక ఇబ్బందులు ఉన్నాయని చెప్పారు. ఎవరైనా భూముల్ని ఆక్రమిస్తే అధికారులే వివాదాల్ని పరిష్కరించాల్సి ఉందని, ప్రజలు న్యాయస్థానాలను ఆశ్రయించే హక్కు కూడా ఉండదని తెలిపారు. ఇళ్లు, భూములు వైకాపా నాయకుల పేరుపై రాసేందుకే ఈ చట్టాన్ని తెచ్చారని ఆరోపించారు. తెదేపా అధికారంలోకి రాగానే ఈ చట్టాన్ని రద్దు చేస్తుందని హామీ ఇచ్చారు.