Vizag Airport: తుపాను ప్రభావం.. విశాఖ నుంచి 23 విమానాలు రద్దు

విశాఖపట్నం: మిగ్‌జాం తుపాను(Cyclone Michaung) ప్రభావం కారణంగా పలు విమాన సర్వీసులను రద్దు చేస్తున్నట్లు విశాఖ ఎయిర్‌పోర్టు డైరెక్టర్‌ వెల్లడించారు. ఈమేరకు విశాఖ నుంచి 23 విమానాల సర్వీసులను రద్దు(flights cancelled) చేస్తున్నట్లు చెప్పారు. ‘‘విమానాశ్రయాన్ని పూర్తిస్థాయిలో ఆపరేషన్‌లో ఉంచుతున్నాం. అత్యవసర సర్వీసులు, మళ్లింపుల కోసం ఏటీసీ 24 గంటలూ పని చేస్తుంది. రన్‌వే నవీకరణ పనుల వల్ల రాత్రి 8 వరకే విమానాశ్రయంలో రాకపోకలకు అనుమతి ఇస్తున్నాం’’ అని ఎయిర్‌పోర్టు డైరెక్టర్‌ తెలిపారు. 

మిగ్‌జాం ఎఫెక్ట్‌: కూలిన చెట్లు.. విద్యుత్‌ స్తంభాలు.. వేలాది ఎకరాల్లో పంట నష్టం

మరికొన్ని గంటల్లో బాపట్లకు సమీపంలో ‘మిగ్‌జాం’ తుపాను తీరం దాటనుంది. కోస్తాంధ్ర తీరానికి సమాంతరంగా కదులుతోంది. తీవ్ర తుపానులో కొంతభాగం సముద్రంలో.. మరికొంత భాగం భూమిపై ఉన్నట్లు ఐఎండీ వెల్లడించింది. తీరానికి అత్యంత దగ్గరగా తుపాను కదులుతోందని చెప్పింది. కావలి తీరానికి 40కి.మీ., బాపట్లకు 80కి.మీ. దూరంలో తీవ్ర తుపాను ఉన్నట్లు వివరించింది. ప్రస్తుతం తీరప్రాంతంలో గంటకు 90-110 కి.మీ వేగంతో ఈదురుగాలులు వీస్తున్నట్లు ఐఎండీ వెల్లడించింది.