‘జవాన్‌’ పోస్టర్లు ఇలా కూడా వాడొచ్చన్నమాట... క్రియేటివిటీకి హ్యాట్సాఫ్‌ చెప్పాల్సిందే!

ఇంటర్నెట్ డెస్క్‌: రహదారి భద్రత, సైబర్‌ భద్రత, ఇతర మోసాల గురించి పోలీసులు ఎప్పటికప్పుడు ప్రజలకు అవగాహన కల్పిస్తుంటారు. అందుకోసం ప్రముఖుల చేత ప్రచారం చేయించడం, కొన్ని వీడియోలను రూపొందించడం, నిజ జీవితంలో జరిగిన కొన్ని వీడియోలను సామాజిక మాధ్యమాల్లో ఉంచడం వంటివి చేస్తుంటారు. ఈ విషయంలో నాగ్‌పుర్‌ పోలీసులు కాస్త క్రియేటివ్‌గా ఆలోచించారు. తాజాగా షారుక్‌ (shahrukh khan) నటించిన ‘జవాన్‌’ పోస్టర్లను సైబర్‌ భద్రతపై అవగాహన కోసం వినియోగించారు.

రివ్యూ: జవాన్‌.. షారుక్‌, నయనతార యాక్షన్‌ థ్రిల్లర్‌ ఎలా ఉందంటే?

చాలా మంది తమ సోషల్‌మీడియా హ్యాండిళ్లకూ, ఫోన్‌ పాస్‌వర్డ్‌ కూడా ఒకటే పెట్టుకుంటారు. ఒకవేళ సైబర్‌ నేరగాళ్లకు సున్నితమైన సమాచారం దొరికితే ఇక అంతే సంగతులు. అందుకే వేర్వేరు అకౌంట్లకు వేర్వేరు పిన్‌, పాస్‌వర్డ్‌లు పెట్టుకోవాలని సైబర్‌ నిపుణులు సూచిస్తుంటారు. నాగ్‌పుర్‌ సిటీ పోలీసులు సైతం అదే విషయాన్ని కాస్త వినూత్నంగా చెప్పారు. ‘జవాన్‌’లో షారుక్‌ వేషధారణలు అన్నింటినీ ఒక చోట చేర్చి.. వేర్వేరు పాస్‌వర్డ్‌లు పెట్టుకోవాలని ప్రజలకు సూచించారు. సైబర్‌ భద్రతపై చాలా చక్కగా అవగాహన కల్పిస్తున్నారంటూ నాగ్‌పుర్‌ సిటీ  పోలీసులను నెటిజన్లు ప్రశంసిస్తున్నారు.