Civils Exam:సివిల్స్‌ పరీక్షలను వాయిదా వేయలేం

పిటిషన్‌ను తోసిపుచ్చిన దిల్లీ హైకోర్టు

దిల్లీ: దేశవ్యాప్తంగా శుక్రవారం నుంచి జరగాల్సిన యూపీఎస్‌సీ సివిల్స్‌ (మెయిన్స్‌) పరీక్షలను వాయిదా వేయాలంటూ దాఖలైన పిటిషన్‌ను దిల్లీ హైకోర్టు గురువారం తోసిపుచ్చింది. జనవరి 7 నుంచి 16 వరకూ మెయిన్స్‌ పరీక్షలను నిర్వహించేందుకు యూపీఎస్‌సీ షెడ్యూలు విడుదల చేసింది. ఏర్పాట్లూ పూర్తయ్యాయి. కొవిడ్‌ కారణంగా కేసులు పెరుగుతున్నాయని, మెయిన్స్‌ పరీక్షలను వాయిదా వేయాలని కోరుతూ ప్రిలిమ్స్‌లో అర్హత సాధించిన 19 మంది అభ్యర్థులు పిటిషన్‌ దాఖలుచేశారు. దీనిపై గురువారం వాదోపవాదాలు జరిగాయి. యూపీఎస్‌సీ తరఫు న్యాయవాది నరేశ్‌ కౌశిక్‌ వాదనలు వినిపిస్తూ... ప్రిలిమ్స్‌ సమయంలోనూ ఇలాంటి పిటిషన్లే వచ్చాయని, సుప్రీంకోర్టు వాటిని తోసిపుచ్చిందని కోర్టు దృష్టికి తెచ్చారు. అనంతరం జస్టిస్‌ వి.కామేశ్వరరావు తీర్పు వెల్లడిస్తూ... ఈ విషయంలో తాము జోక్యం చేసుకోబోమని స్పష్టం చేశారు. వ్యాజ్యాన్ని తోసిపుచ్చుతున్నట్టు వెల్లడించారు.