త్రిదళాధిపతిగా అనిల్‌ చౌహాన్‌ బాధ్యతల స్వీకరణ

దిల్లీ: భారత నూతన త్రిదళాధిపతి (చీఫ్‌ ఆఫ్‌ డిఫెన్స్‌ స్టాఫ్‌-సీడీఎస్‌)గా విశ్రాంత లెఫ్టినెంట్‌ జనరల్‌ అనిల్‌ చౌహాన్‌ శుక్రవారం బాధ్యతలు చేపట్టారు. త్రిదళాధిపతి జనరల్‌ బిపిన్‌ రావత్‌ మరణించిన తొమ్మిది నెలల తరవాత నియమితులైన అనిల్‌ చౌహాన్‌.. ఇక నుంచి భారత అత్యున్నత సైనిక కమాండర్‌గా కొనసాగనున్నారు. భారత ప్రభుత్వ సైనిక వ్యవహారాల శాఖ కార్యదర్శిగానూ ఆయన విధులు నిర్వర్తించనున్నారు. బాధ్యతలు చేపట్టడానికి ముందు ఆయన ఇండియన్‌ గేట్‌ సమీపంలోని జాతీయ యుద్ధస్మారకం వద్ద తన తండ్రి సురేంద్రసింగ్‌ చౌహాన్‌తో కలిసి అమరవీరులకు నివాళులు అర్పించారు.