Manchu Manoj: అన్నంటే దోస్తే...

అన్నదమ్ముల మధ్య అనుబంధానికి అద్దం పట్టే కథతో మా చిత్రం తెరకెక్కిందన్నారు మన్‌మోహన్‌ మేనంపల్లి. ఆయన దర్శకత్వంలో తెరకెక్కుతున్న చిత్రం ‘సోదరా’. సంపూర్ణేశ్‌ బాబు, సంజోష్‌ కథానాయకులుగా తెరకెక్కిన చిత్రమిది. ప్రాచీ బంసాల్‌, ఆరతి గుప్తా కీలక పాత్రలు పోషించారు. చంద్ర చాగంలా నిర్మాత. ‘అన్నంటే దోస్తే సోదరా...’ అంటూ సాగే ఈ చిత్రంలోని పాటని కథానాయకుడు మంచు మనోజ్‌ ఇటీవల హైదరాబాద్‌లో విడుదల చేశారు. సునీల్‌ కశ్యప్‌ స్వరపరిచిన ఈ పాటకి, సుద్దాల అశోక్‌తేజ సాహిత్యం సమకూర్చారు. పాట విడుదల సందర్భంగా మంచు మనోజ్‌ మాట్లాడుతూ ‘‘సంపూర్ణేశ్‌ స్వచ్ఛమైన మనసున్న వ్యక్తి. కల్మషం లేని ఆయన నవ్వంటే ఎంతో ఇష్టం. తను, సంజోష్‌ ఈ సినిమాతో మంచి విజయాన్ని సొంతం చేసుకోవాలి. దర్శకనిర్మాతలు, చిత్రబృందం పడిన కష్టం తెలుస్తోంది. పాట చాలా బాగుంది. చిత్రం కూడా తప్పకుండా ప్రేక్షకుల మెప్పు పొందుతుందని నమ్ముతున్నా’’ అన్నారు. సంజోష్‌ మాట్లాడుతూ ‘‘చిత్రీకరణలో ఉన్నా మా కోసం ఈ వేడుకకి వచ్చారు మంచు మనోజ్‌. ఆయన ప్రోత్సాహం మాకెంతో బలాన్నిచ్చింది’’ అన్నారు. సంపూర్ణేశ్‌ బాబు మాట్లాడుతూ ‘‘మంచు మనోజ్‌ అన్నయ్యతో ‘కరెంటు తీగ’ నుంచి నా అనుబంధం కొనసాగుతోంది. అప్పట్నుంచి నన్నొక సోదరుడిలా భావిస్తుంటారు. ఆయన ఈ వేడుకకి రావడం ఆనందంగా ఉంది’’ అన్నారు. దర్శకుడు మాట్లాడుతూ ‘‘పాట రాసేటప్పుడే ఎంతో కనెక్ట్‌ అయ్యారు రచయిత సుద్దాల అశోక్‌తేజ. ఆయన అప్పుడే చెప్పారు ఈ పాట  ఘన విజయం సాధిస్తుందని. మనోజ్‌ చేతులమీదుగా పాట విడుదల కావడం ఆనందంగా ఉంద’’న్నారు.