Siddaramaiah: ఇంకా వాళ్లు లౌకికవాదులేనా?భాజపాతో జేడీఎస్‌ పొత్తుపై సిద్ధరామయ్య

బెంగళూరు: జేడీఎస్‌ ( JDS)కు ఇకపై తమది లౌకికవాద పార్టీ అని చెప్పే అర్హత లేదని కర్ణాటక (Karnataka) ముఖ్యమంత్రి సిద్ధరామయ్య (Siddaramaiah) విమర్శించారు. ప్రస్తుతం జేడీఎస్ పేరులో మాత్రమే సెక్యులర్‌ ఉందని, ఎన్నికల కోసమే ఆ పార్టీ భాజపాతో చేతులు కలిపిందని ఎద్దేవా చేశారు. 2024 లోక్‌సభ ఎన్నికల్లో భాజపా-జేడీఎస్ పొత్తుపై స్పందిస్తూ ఆయన ఈ వ్యాఖ్యలు చేశారు. ‘‘పేరుకు మాత్రమే జేడీఎస్‌ సెక్యులర్‌ పార్టీ. ఇప్పుడు నిజంగా వాళ్లు లౌకికవాదులేనా? భాజపాతో పొత్తు తర్వాత కూడా జేడీఎస్‌ తమది సెక్యులర్‌ పార్టీ అని చెబుతుందా? ఆ పార్టీ చెప్పేది ప్రజలు నమ్ముతారా?’’ అని సిద్ధరామయ్య ప్రశ్నించారు. భాజపా-జేడీఎస్‌ కలిసి పోటీ చేస్తే తమకు ఎలాంటి అభ్యంతరం లేదని, ఇకపై జేడీఎస్‌ సెక్యులర్‌ పార్టీ అని చెప్పొద్దని సిద్ధరామయ్య సూచించారు.

మోదీకి పట్నాయక్‌ 8 రేటింగ్‌ ఇస్తే.. భాజపా మాత్రం నవీన్‌కు 0 ఇచ్చింది!

అంతకుముందు భాజపాకు జేడీఎస్‌ బీ-టీమ్‌ అంటూ కాంగ్రెస్ చేసిన వ్యాఖ్యలను కుమారస్వామి ఖండించారు. దేశవ్యాప్తంగా లౌకికవాదాన్ని కాంగ్రెస్‌ నాశనం చేస్తోందని, కర్ణాటకలో ఆ పార్టీతో పొత్తు తర్వాత జేడీఎస్‌ను అణచివేయాలని చూసిందంటూ తీవ్ర విమర్శలు చేశారు. 2004లో ప్రభుత్వ ఏర్పాటు కోసం సిద్ధరామయ్య భాజపా నాయకుల్ని కలిసేందుకు ప్రయత్నించారని కుమారస్వామి ఆరోపించారు. అయితే, ఈ ఆరోపణలను సిద్దరామయ్య ఖండించారు.