కడప, న్యూస్‌టుడే: ‘మా తాతల కాలం నుంచి వారసత్వంగా వచ్చే భూముల పట్టా పాసుపుస్తకాలపై సీఎం జగన్‌ ఫొటో ఎందుకు’ అని ముఖ్యమంత్రి జగన్‌ సతీమణి భారతిని కుమ్మరాంపల్లె మాజీ సర్పంచి భర్త, వైకాపా నాయకుడు భాస్కరరెడ్డి నిలదీశారు. పట్టాదారు పాసుపుస్తకాలపై రైతుల చిత్రాలు ఉండేలా చూడాలని.. ఈ విషయాన్ని సీఎం జగన్‌ దృష్టికి తీసుకెళ్లాలని కోరారు. ఎన్నికల ప్రచారంలో భాగంగా భారతి సోమవారం వైయస్‌ఆర్‌ జిల్లా పులివెందుల నియోజకవర్గం వేంపల్లెలో పర్యటించారు.

గొర్లమందల కాలనీలో మాజీ సర్పంచి ఇంటి వద్దకు వెళ్లి వైకాపాకు ఓటేయాలని కోరారు. ఈ సందర్భంగా భాస్కరరెడ్డి ఆమెను ఎదురు ప్రశ్నించారు. ‘సీఎం జగన్‌ ప్రతి సమావేశంలోనూ నా ఎస్సీ, నా బీసీ, నా మైనారిటీ అంటున్నారు తప్ప ఒక్కసారి కూడా నా రైతన్న అని అనడం లేదు’ అని భారతి వద్ద ఘాటుగా వ్యాఖ్యానించారు. అంతే కాకుండా రైతు భరోసా కింద రాష్ట్ర ప్రభుత్వం ప్రకటించిన రూ.16 వేలలో సగం సొమ్ము కేంద్ర ప్రభుత్వానిదేనని.. దీని వల్ల రైతులకు ఎలాంటి ప్రయోజనం ఉండదన్నారు. ఈ మొత్తాన్ని పెంచి రైతులకు మేలు జరిగేలా చూడాలని కోరారు.  భాస్కరరెడ్డి ప్రశ్నలకు భారతి సమాధానం చెప్పకుండా మౌనం వహించారు.