ఈనాడు డిజిటల్‌, అమరావతి: పేదల ఇళ్లను నిర్మించి ఇవ్వడం చేతకాని వైకాపా ప్రభుత్వానికి కూల్చే అధికారం ఎక్కడిదని తెదేపా అధినేత చంద్రబాబు ధ్వజమెత్తారు. వైయస్‌ఆర్‌ జిల్లా ప్రొద్దుటూరులో టిడ్కో ఇళ్ల నిర్మాణాల కూల్చివేతను ‘ఎక్స్‌’ వేదికగా సోమవారం ఆయన తీవ్రంగా ఖండించారు. ‘‘తెదేపా హయాంలో నిర్మించిన టిడ్కో ఇళ్లను లబ్ధిదారులకు ఇవ్వలేకపోయారు. అధికారం నుంచి దిగిపోయే రోజులు దగ్గర పడినా.. మీ కూల్చివేత సంస్కృతిని మార్చుకోరా? వ్యవస్థల్ని, రాష్ట్ర ప్రతిష్ఠను దిగజార్చిన మీ ప్రభుత్వాన్ని మే 13న ప్రజలు కూల్చబోతున్నారు’’ అని చంద్రబాబు ఆగ్రహం వ్యక్తం చేశారు.