వైభవంగా కొమురవెల్లి మల్లన్న జాతర ప్రారంభం

చేర్యాల, న్యూస్‌టుడే: సిద్దిపేట జిల్లా కొమురవెల్లి మండల కేంద్రంలో ఆదివారం మల్లికార్జునస్వామి బ్రహ్మోత్సవాలు (జాతర) వైభవంగా ప్రారంభమయ్యాయి. ఏటా సంక్రాంతి పండగ తర్వాత వచ్చే మొదటి ఆదివారంతో మొదలయ్యే ఈ జాతర మూడు నెలల పాటు జరుగుతుంది. ఉగాది పండగకు ముందు వచ్చే ఆదివారం అర్ధరాత్రి తర్వాత ఉత్సవాలు ముగుస్తాయి. జాతర ప్రారంభమైన మొదటి సోమవారం హైదరాబాద్‌ భక్తులు ఆనవాయితీగా నిర్వహించాల్సిన ‘పట్నం-అగ్నిగుండాలు’ కార్యక్రమాలను కొవిడ్‌ వ్యాప్తి నేపథ్యంలో రద్దు చేశారు. భక్తులు వర్షాన్నీ లెక్కచేయకుండా జాతరకు తరలివచ్చి మొక్కులు తీర్చుకున్నారు. మొదటి రోజు 25 వేల మందికి పైగా భక్తులు దర్శించుకున్నారని ఆలయ పాలక మండలి ఛైర్మన్‌ భిక్షపతి, ఈవో బాలాజీ తెలిపారు.