USA: అమెరికాలో మరోసారి కాల్పులు కలకలం.. ముగ్గురి మృతి

వాషింగ్టన్‌: అమెరికా (USA)లో మరోసారి కాల్పుల ఘటన కలకలం రేపింది. సౌత్‌ఈస్ట్‌ వాషింగ్టన్‌ (Washington)లోని అనకోస్టియా (Anacostia) ప్రాంతంలో గుడ్‌హోప్‌ రోడ్‌లో గుర్తుతెలియని వ్యక్తి కాల్పులు జరిపినట్లు స్థానిక పోలీసు అధికారి పమేలా స్మిత్‌ తెలిపారు. ఈ ఘటనలో ముగ్గురు మృతి చెందగా నలుగురు గాయపడ్డారు. చనిపోయిన వారిలో ఒక మహిళ సహా ఇద్దరు వ్యక్తులున్నారు. శనివారం రాత్రి కాల్పుల సమాచారం అందుకున్న వెంటనే పోలీసులు ఘటనా స్థలానికి చేరుకున్నారు. ఈ ప్రాంతంలో పర్యాటకుల సందడి అధికంగా ఉంటుందని, వారిని భయాందోళనకు గురి చేయాలనే ఉద్దేశంతోనే నిందితుడు ఈ చర్యకు పాల్పడి ఉంటాడని స్మిత్‌ అభిప్రాయపడ్డారు.

వాషింగ్టన్‌లో ఈ ఏడాదిలో ఇప్పటి వరకు 150 మందికి పైగా కాల్పుల ఘటనల్లో మృతి చెందారు. రెండు దశాబ్దాల తర్వాత తక్కువ సమయంలో పెద్ద సంఖ్యలో సామాన్యులు ప్రాణాలు కోల్పోవడం ఇదే తొలిసారని వాష్టింగన్‌ పోస్ట్‌ తెలిపింది. ఆగస్టు నెలలోనే మొదటి ఐదు రోజుల్లో చోటుచేసుకున్న కాల్పుల ఘటనల్లో డజను మందికి పైగా ప్రాణాలు కోల్పోయారని వెల్లడించింది.