అమ్మ తిట్టిందని...

చిచ్చర పిడుగులు

అమ్మ తిట్టిందని...

బడి పిల్లాడు... భలే ఆవిష్కరణ చేశాడు... ఓ పని చేయనందుకు అమ్మ తిట్టిందని ఓ పరికరం కనిపెట్టేశాడు, అది అందరికీ భలే నచ్చేసింది. ఏంటీ కథాకమామిషు?

ఓసారి ‘లు’ అనే పిల్లాడి అమ్మ దుస్తులన్నీ ఉతికి ఎండలో ఆరేసింది. బయటకెళుతూ... వర్షం వస్తే అవి తీసి లోపల వేయమని తనకి చెప్పింది. అంత వరకూ బాగానే ఉంది. కాసేపటికి లు ఆ సంగతే మర్చిపోయాడు. వర్షం రానే వచ్చింది. దుస్తులన్నీ తడిసి ముద్దయ్యాయి. అమ్మ వచ్చింది. తిట్లు తిట్టింది. మామూలు పిల్లలయితే కాసేపు బాధపడి ఊరుకుంటారు. మరి లు మాత్రం బాధపడి వదిలేయలేదు. ఏం చేశాడంటే...?

* ‘లు’ పూర్తి పేరు లు జెయ్‌జన్‌. ఈ పన్నెండేళ్ల పిల్లాడు ఆరో తరగతి చదువుతున్నాడు. ఎక్కడంటే చైనాలోని నానింగ్‌లో.
* అమ్మ తిట్టడంతో.. అసలు వర్షం వచ్చినప్పుడు దుస్తులు తడవకుండా ఉండాలంటే ఏం చేయాలి? అని ఆలోచించాడు. ఎవరూ వాటిని తీసి లోపలేయకుండా వాటికవే లోపలికి వెళ్లిపోవాలంటే ఎలా? అని పరిష్కారం కోసం వెతికాడు.
* ఆ ఆలోచన నుంచే లుకి ఓ పరికరం తట్టింది. అదే ఈ ‘రెయిన్‌ డిటెక్టింగ్‌ క్లాత్‌ డ్రయ్యింగ్‌ ర్యాక్‌’.
* అదెలా ఉండాలనేదంతా ఆలోచించుకుని వెళ్లి ముందు నాన్నతో, తర్వాత స్కూల్లో టీచరుతో చెప్పాడు. వాళ్లకు ఈ ఐడియా బాగా నచ్చేసింది. దీంతో దీని నమూనాని తయారు చేయడానికి వాళ్లు సహకరించారు.
* ఇంతకీ ఇది ఎలా పని చేస్తుందంటే.. దుస్తులు ఆరేసుకునే కడ్డీల మీద వర్షం చుక్క పడగానే అక్కడ సెన్సార్లు పనిచేస్తాయి. కడ్డీలు వాటంతట అవే లోపలికి జరిగిపోతాయి. పైనున్న కప్పు ముందుకు జరిగి అవి తడవకుండా గొడుగులా పనిచేస్తుంది. వర్షం తగ్గగానే మళ్లీ దుస్తులు బయటకొచ్చేస్తాయి.
* దీన్ని సరిగ్గా పనిచేసేలా చెయ్యడానికి లు కొన్ని నెలలపాటు కష్టపడ్డాడు. ఇంతలో గాంగ్జు యూత్‌ సైన్స్‌ టెక్నాలజీ ఇన్నోవేషన్‌ కాంటెస్ట్‌ ఉందని ఎవరో చెబితే దీన్ని ఆ పోటీలో పెట్టాడు. మొదటి బహుమతి కొట్టాడు.
* ఐడియా అదిరిందంటూ న్యాయ నిర్ణేతలూ లుని ప్రశంసల్లో ముంచెత్తారు. ప్రస్తుతం ఈ నమూనా ఆధారంగా పెద్ద పరికరాన్ని తయారు చేసి వాళ్లమ్మకు బహుమతిగా ఇస్తానని చెబుతున్నాడీ బుజ్జి సైంటిస్ట్‌. నిత్యం ఎదుర్కొనే సమస్యలకు ఇలాంటి చక్కని పరిష్కారాలు కనుగొనడం నిజ్జంగా గొప్పే కదా!

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు