Breaking | Feedback | E-PAPER | Pratibha

చంద్రయాన్‌-3 చరిత్ర సృష్టించింది: మంత్రి కేటీఆర్‌

Updated : 24 Aug 2023 00:19 IST

23/08/2023 23:10(IST)

మియాపూర్‌లో కాల్పులు, వ్యక్తి దుర్మరణం

హైదరాబాద్‌: నగరంలోని మియాపూర్‌లో కొందరు గుర్తు తెలియని వ్యక్తులు దేవేందర్‌ గాయన్‌ అనే వ్యక్తిపై తుపాకీతో కాల్పులు జరిపారు. తీవ్రంగా గాయపడిన దేవేందర్‌ను ఆసుపత్రికి తరలిస్తుండగా ప్రాణాలొదిలాడు. సమాచారం అందుకుని ఘటనాస్థలానికి చేరుకున్న మాదాపూర్‌ డీసీపీ సందీప్‌, ఎస్‌వోటీ, మియాపూర్‌ పోలీసులు ఆరు బుల్లెట్లను స్వాధీనం చేసుకున్నారు. మరణించిన వ్యక్తిని మదీనాగూడ సందర్శిని హోటల్‌ జనరల్‌ మేనేజర్‌గా గుర్తించారు. ప్రత్యేక బృందాలను ఏర్పాటు చేసిన సైబరాబాద్‌ పోలీసులు నిందితుల కోసం గాలింపు చర్యలు చేపట్టారు.

23/08/2023 22:58(IST)

వాగ్నర్‌ గ్రూప్‌ చీఫ్‌ ప్రిగోజిన్‌ దుర్మరణం

మాస్కో: ఇటీవల రష్యా అధ్యక్షుడు పుతిన్‌పై తిరుగుబావుటా ఎగురవేసిన ప్రైవేట్‌ సైన్యం వాగ్నర్‌ గ్రూప్‌ చీఫ్‌ యెవ్‌గెనీ ప్రిగోజిన్‌ దుర్మరణం చెందారు. ఆయన ప్రయాణిస్తున్న విమానం కుప్పకూలడంతో చనిపోయినట్లు సమాచారం. ఆయనతో పాటు 10 మంది మృతి చెందినట్లు రష్యా మీడియా వర్గాలు తెలిపాయి.

23/08/2023 22:39(IST)

చంద్రయాన్‌-3 చరిత్ర సృష్టించింది: మంత్రి కేటీఆర్‌

చంద్రయాన్‌-3ని విజయవంతంగా చంద్రమండలంపై లాంచ్‌ చేసిన ఇస్రో బృందానికి తెలంగాణ మంత్రి కేటీఆర్‌ ట్విటర్‌ వేదికగా అభినందనలు తెలిపారు. విజయవంతంగా చంద్రుడి దక్షిణ ధ్రువంపై దిగి చంద్రయాన్‌-3 చరిత్ర సృష్టించిందన్నారు. యావత్‌ భారత దేశానికి ఇది గర్వించదగ్గ విషయమన్నారు. అంతరిక్ష రంగంలో భారతదేశం మున్ముందు ఎన్నో విజయాలు సాధించనుందన్నారు.

23/08/2023 22:30(IST)

ల్యాండర్‌ నుంచి బయటకు వచ్చిన రోవర్‌ ప్రగ్యాన్‌

ఇంటర్నెట్‌డెస్క్‌: చంద్రయాన్‌-3 విజయవంతంగా బుధవారం సాయంత్రం 6.03 గంటలకు జాబిల్లిపై నిర్ణీత ప్రదేశంలో ల్యాండ్‌ అయిన విషయం తెలిసిందే. తాజాగా ల్యాండర్‌ విక్రమ్‌ నుంచి రోవర్‌ ప్రగ్యాన్ బయటకు వచ్చింది. చంద్రుడిపై సురక్షితంగా దిగిన తర్వాత ల్యాండర్‌ విక్రమ్‌ జాబిల్లి చిత్రాలను ఇప్పటికే బెంగళూరులోని ఇస్త్రో కేంద్రానికి పంపింది.

23/08/2023 21:44(IST)

దేశం గర్వపడేలా చేశారు: ద్రౌపది ముర్ము

దిల్లీ: ఇస్రో శాస్త్రవేత్తలు దేశం గర్వపడేలా చేశారని రాష్ట్రపతి ద్రౌపది ముర్ము కొనియాడారు. ‘‘చంద్రయాన్‌-3 ప్రయోగం విజయవంతం కావడం ద్వారా ఇస్రో శాస్త్రవేత్తలు చరిత్ర సృష్టించారు. జీవితకాలంలో అరుదుగా జరిగే ఇలాంటి ప్రయోగాలు దేశ పౌరులను గర్వపడేలా చేస్తాయి. చంద్రయాన్‌-3లో భాగమైన ప్రతి ఒక్కరికి నా అభినందనలు. ముందుముందు ఇలాంటి గొప్ప ప్రయోగాలు మరెన్నో చేయాలి’’ అని రాష్ట్రపతి ఆకాంక్షించారు.

23/08/2023 21:14(IST)

ఇలాంటి విజయాలు మరెన్నో సాధించాలి: వైఎస్‌ షర్మిల

హైదరాబాద్: విక్రమ్ ల్యాండర్ విజయవంతంగా చంద్రుడిపై చేరుకున్న సందర్భంగా ఇస్రో శాస్త్రవేత్తలకు వైఎస్ఆర్ తెలంగాణ పార్టీ అధ్యక్షురాలు వైఎస్ షర్మిల శుభాకాంక్షలు తెలిపారు. చంద్రుడి దక్షిణ ధ్రువంపై అడుగు పెట్టిన తొలి దేశంగా భారత్ నిలిచిందని ఆమె కొనియాడారు. ఇది దేశ ప్రజలందరికీ ఎంతో గర్వకారణమని పేర్కొన్నారు. భారత శాస్త్రవేత్తలు ఇలాంటి విజయాలు మరెన్నో సాధించాలని షర్మిల ఆకాంక్షించారు.

23/08/2023 21:02(IST)

చంద్రయాన్‌-3 అద్భుత ఘట్టాన్ని వీక్షించిన విద్యార్థులు

చంద్రయాన్‌-3 (Chandrayaan-3) 140కోట్ల మంది భారతీయుల కలల్ని నిజం చేస్తూ జాబిల్లిపై అడుగు పెట్టింది. బుధవారం సాయంత్రం 6.03 గంటలకు ల్యాండర్‌ జాబిల్లిపై దిగ్విజయంగా కాలుమోపి.. భారత వైజ్ఞానిక సత్తాను ప్రపంచానికి చాటిచెప్పింది. ఈ అద్భుత ఘట్టాన్ని శ్రీకాకుళం జిల్లా సోంపేటలో సీతయ్య ఫౌండేషన్ ఆధ్వర్యంలో ప్రొజెక్టర్ ద్వారా విద్యార్థులు వీక్షించారు.

23/08/2023 20:49(IST)

భారత దేశ చరిత్రలో మరపురాని రోజు: ఆర్టీసీ ఎండీ సజ్జనార్‌

చంద్రయాన్‌-3 విజయవంతం కావడం భారత దేశ చరిత్రలో మరపురాని రోజు అని ఆర్టీసీ ఎండీ సజ్జనార్‌ అన్నారు. 140 కోట్ల మంది కలల్ని, ఆశయాల్ని, నమ్మకాన్ని చంద్రయాన్‌-3 మోసుకెళ్లిందని ట్విటర్‌ వేదికగా వెల్లడించారు. చంద్రయాన్‌-3 విజయవంతంగా జాబిల్లిపై దిగడం మనకెంతో గర్వకారణమన్నారు. ఈ విజయం కోసం నిరంతరం శ్రమించిన ఇస్త్రో బృందానికి, శాస్త్రవేత్తలకు సజ్జనార్‌ అభినందనలు తెలిపారు. తరతరాలు గుర్తుంచుకునే అద్భుతమైన అంతరిక్ష చరిత్రను ఇస్త్రో శాస్త్రవేత్తలు లిఖించారని కొనియాడారని, వారి స్పూర్తికి సెల్యూట్‌ అన్నారు.

23/08/2023 20:35(IST)

ల్యాండింగ్‌ తర్వాత విక్రమ్‌ తొలిసారి తీసిన జాబిల్లి చిత్రాలు

చంద్రయాన్‌-3 ల్యాండింగ్‌ తర్వాత ల్యాండర్‌ విక్రమ్‌ తొలిసారి తీసిన జాబిల్లి చిత్రాలను బుధవారం రాత్రి ఇస్త్రో విడుదల చేసింది. బెంగళూరు కేంద్రంతో చంద్రయాన్‌-3 ల్యాండర్‌ అనుసంధానమైంది.

23/08/2023 19:50(IST)

చంద్రయాన్‌ 3 విజయవంతంపై సంబరాలు

కామారెడ్డి పట్టణం: కామారెడ్డి జిల్లా కేంద్రంలో చంద్రయాన్ 3 విజయవంతంపై వివిధ కళాశాలలు, పాఠశాలల్లో సంబరాలు చేశారు. ఎల్ఈడీ తెరలని ఏర్పాటు చేసి ప్రత్యక్ష ప్రసారాన్ని వీక్షించారు. జిల్లా కేంద్రంలో భాజాపా ఆధ్వర్యంలో నిజాం సాగర్ చౌరస్తాలో టపాసులు కాల్చి సంబరాలు చేశారు.

23/08/2023 19:38(IST)

యావత్‌ భారత దేశ ప్రజలకు ఇది పండుగ రోజు: సీఎం కేసీఆర్‌

సేఫ్ ల్యాండింగ్‌తో చంద్రయాన్‌-3 ప్రయోగం సంపూర్ణ విజయం సాధించడం పట్ల తెలంగాణ ముఖ్యమంత్రి కేసీఆర్‌ హర్షం వ్యక్తం చేశారు. ‘‘ చంద్రుని దక్షిణ ధ్రువంపై ల్యాండర్‌ మాడ్యుల్‌ను విజయవంతంగా చేర్చిన మొట్టమొదటి దేశంగా భారత్‌ సరికొత్త అధ్యాయాన్ని లిఖించింది. ప్రపంచ అంతరిక్ష పరిశోధన రంగంలో భారత్‌ అరుదైన చరిత్ర సృష్టించింది. ఇది ప్రతి భారతీయుడు గర్వించదగ్గ సందర్భం.

ఇస్రో శాస్త్రవేత్తలు, సిబ్బందికి, ఈ ప్రయోగం విజయవంతం కావడంలో భాగస్వాములైన ప్రతి ఒక్కరికి అభినందనలు. చిరకాల ఆకాంక్ష నెరవేరిన సందర్భంలో యావత్ భారతదేశ ప్రజలకు ఇది పండుగ రోజు. భవిష్యత్‌లో ఇస్రో చేపట్టబోయే అంతరిక్ష పరిశోధనలు, ప్రయోగాలకు చంద్రయాన్-3 విజయం గొప్ప ప్రేరణినిస్తుంది. ఇదే స్ఫూర్తి కొనసాగిస్తూ దేశ కీర్తి ప్రతిష్టలను మరింతగా పెంచే దిశగా, అంతరిక్ష పరిశోధన రంగంలో ఇస్రో తన విజయపరంపరను కొనసాగించాలి’’ అని సీఎం కేసీఆర్‌ ఆకాంక్షించారు.

23/08/2023 19:30(IST)

చంద్రుడిపై నడిచే రోజు ఎంతో దూరం లేదు: కమల్‌ హాసన్‌

‘‘సైకిళ్లపై ఉపగ్రహ భాగాలను మోసుకెళ్లడం నుంచి చంద్రుడిపై ల్యాండ్ అయ్యే వరకు ఎంతటి ప్రయాణం! ఇస్రో జట్టు దేశానికే గర్వకారణం. ఇది ఎప్పటికీ నిలిచిపోయే చారిత్రాత్మక రోజు. భారతీయులు చంద్రుడిపై నడిచే రోజు ఎంతో దూరంలో లేదు.’’

- సినీ నటుడు కమల్‌ హాసన్‌

23/08/2023 19:27(IST)

చంద్రయాన్‌ విజయంపై ప్రకాశ్‌ రాజ్‌ ట్వీట్‌

‘దేశం గర్వించదగ్గ క్షణాలు. దీన్ని సాధ్యం చేసి ప్రతి ఒక్కరికీ ధన్యవాదాలు. విశాల విశ్వంలోని మరిన్ని అద్భుతాలను తెలుసుకోవడానికి మార్గం ఏర్పడింది’

-ప్రకాశ్‌ రాజ్‌

23/08/2023 19:13(IST)

చరిత్ర సృష్టించిన భారత శాస్త్రవేత్తలు: బాలకృష్ణ

చంద్రయాన్-3 విజయవంతానికి కృషి చేసిన ఇస్రో శాస్త్రవేత్తలకు శుభాకాంక్షలు. చంద్రయాన్-3 విజయవంతంగా ప్రయోగించి చంద్రుడిపై ఉన్న ఆసక్తికర అంశాలను మానవాళికి అందించడంలో ముందడుగు వేశారు. చంద్రుడిపై నివాస యోగ్యత, నీటి లభ్యత, జీవరాసుల మనుగడకు సంబందించిన సమాచారం ప్రపంచానికి చేరవేయడంలో భారతదేశం ముందుంటుంది. ఎన్నో ప్రపంచ దేశాలకు ఆదర్శంగా మారిన భారత శాస్త్రవేత్తలకు, శాస్త్రవేత్తలను ప్రోత్సహించిన భారత ప్రభుత్వానికి శుభాకాంక్షలు. శాస్త్ర సాంకేతిక, బౌగోళిక, చంద్రమండల, అంతరిక్ష రంగాల్లో భారత్ గణనీయమైన అభివృద్ధి సాధించాలని కోరుకుంటున్నా.

-నందమూరి బాలకృష్ణ

23/08/2023 19:12(IST)

ప్రజ్ఞాన్‌ రోవర్‌ పంపే వివరాల కోసం ఆసక్తిగా ఎదురుచూస్తా: వెంకయ్యనాయుడు

వినువీధిలో భారతీయ కీర్తి పతాకను రెపరెపలాండించిన ఇస్త్రో శాస్త్రవేత్తలకు అభివందనం అని భారత మాజీ ఉప రాష్ట్రపతి ఎం.వెంకయ్యనాయుడు అన్నారు. భారతీయుడిగా తన హృదయం ఉప్పొంగుతోందని సంతోషం వ్యక్తం చేశారు. జాబిల్లి దక్షిణ ధ్రువంపైకి ప్రపంచంలోనే తొలిసారిగా ల్యాండర్‌ను పంపడం ఘన విజయం అని కొనియాడారు. విక్రమ్‌ ల్యాండర్‌ నుంచి విడివడిన ప్రజ్ఞాన్‌ రోవర్‌ పంపించే అధ్యయన వివరాల కోసం ఆసక్తిగా ఎదుచూస్తానని వెంకయ్యనాయుడు పేర్కొన్నారు.

23/08/2023 19:06(IST)

గొప్ప విజయం: చిరంజీవి

‘భారతదేశానికి ఇదొక గొప్ప విజయం. చంద్రయాన్‌-3 అపూర్వ, అద్భుతమైన విజయాన్ని నమోదు చేసింది. ఈ విజయం పట్ల వేడుకలు చేసుకుంటున్న గర్వించే భారతీయుల్లో నేను ఒకడిని. మన భారతీయ శాస్త్రవేత్తలను అభినందిస్తున్నా. చంద్రుడిపై మరిన్ని ఆవిష్కరణలకు, రానున్న రోజుల్లో మరెన్నో పరిశోధనలకు ఇది మార్గాన్ని ఇది సుగమం చేసింది. జాబిల్లిపై హాలీడే మరెంతో దూరంలో లేదనిపిస్తోంది’

23/08/2023 19:05(IST)

ఇస్రో బృందానికి అభినందనలు: బిల్‌ నెల్సన్‌

ఇస్రో బృందానికి నాసా అడ్మినిస్ట్రేటర్‌ బిల్‌ నెల్సన్ అభినందనలు తెలిపారు. జాబిల్లి దక్షిణ ధ్రువంపై ల్యాండింగ్ విజయవంతం చేసినందుకు నెల్సన్‌ అభినందనలు చెప్పారు. సాఫ్ట్‌ ల్యాండింగ్‌ చేసిన 4వ దేశంగా నిలిచిన భారత్‌ను నెల్సన్‌ కొనియాడారు. మిషన్‌లో భాగస్వామ్యమైనందుకు సంతోషంగా ఉందని ఆయన అన్నారు.

23/08/2023 18:51(IST)

ఇది ఆరంభం మాత్రమే: చంద్రబాబు

‘‘చంద్రుడి దక్షిణ ధ్రువంపై చంద్రయాన్-3 విక్రమ్‌ ల్యాండర్‌ విజయవంతంగా అడుగుపెట్టి ఈ ఘనతను సాధించిన ఏకైక అంతరిక్ష సంస్థగా ఇస్రో అవతరించింది. ఇస్త్రో శాస్త్రవేత్తల అచంచలమైన స్ఫూర్తికి, సంకల్పానికి వందనం చేస్తున్నా. ఇది ఆరంభం మాత్రమే. దీన్నెవరూ ఆపలేరు’’ - తెదేపా అధినేత చంద్రబాబు నాయుడు

23/08/2023 18:48(IST)

భారత పౌరుడిగా గర్విస్తున్నా: సీఎం జగన్‌

‘‘జాబిల్లిపై చంద్రయాన్-3 విజయవంతంగా సాఫ్ట్ ల్యాండ్‌ అయినందుకు భారత పౌరుడిగా గర్విస్తున్నా. ఇస్రోకు ఇవే నా శుభాకాంక్షలు, అభినందనలు. ఈ అపురూపమైన ఘనతకు ఆంధ్రప్రదేశ్‌లోని శ్రీహరికోట వేదికవ్వడం మరింత ప్రత్యేకం’’ - ఏపీ సీఎం జగన్మోహన్‌ రెడ్డి

23/08/2023 18:45(IST)

ఇస్రో శాస్త్రవేత్తల కృషి ఫలించింది: రేవంత్‌ రెడ్డి

హైదరాబాద్: చంద్రయాన్-3 విజయవంతం అవడం పట్ల పీసీసీ అధ్యక్షుడు రేవంత్‌ రెడ్డి హర్షం వ్యక్తం చేశారు. చంద్రయాన్‌-3 మిషన్‌ విజయవంతం కావడానికి శ్రమించిన ఇస్రో శాస్త్రవేత్తలను అభినందించారు. ఇస్రో శాస్త్రవేత్తల కృషి ఫలించిందన్నారు. ఈ విజయం వారిలో మరింత ఆత్మవిశ్వాసాన్ని పెంచిందన్నారు.

23/08/2023 18:38(IST)

ఎంతో గర్వంగా ఉంది: ఇస్రో ఛైర్మన్‌

బెంగళూరు: దేశం కోసం స్ఫూర్తిదాయక కార్యం సాధించినందుకు ఎంతో గర్వంగా ఉందని ఇస్రో ఛైర్మన్‌ సోమనాథ్‌ వెల్లడించారు. సోమ్‌నాథ్‌ మాట్లాడుతూ.. ‘‘ఇస్రో శాస్త్రవేత్తలను ప్రధాని మోదీ అభినందించారు. ఇస్రోకు మద్దతుగా నిలిచిన ప్రధానికి ధన్యవాదాలు. చంద్రయాన్‌-3 విజయవంతం అవ్వాలని కొన్ని రోజులుగా ప్రార్థించిన ప్రతి ఒక్కరికీ ధన్యవాదాలు’’ అని సోమనాథ్‌ అన్నారు.

23/08/2023 18:35(IST)

చంద్రయాన్‌ 3 విజయవంతం.. విద్యార్థుల కేరింతలు

హైదరాబాద్‌: హైదరాబాద్ ఉస్మానియా యూనివర్సిటీ ఆర్ట్స్ కాలేజ్ వద్ద మొబైల్ వ్యాన్ స్క్రీన్‌పై, ఠాగూర్ ఆడిటోరియంలో ఏర్పాటు చేసిన చంద్రయాన్ 3 ప్రత్యక్ష ప్రసార కార్యక్రమాన్ని విద్యార్థులు వీక్షించారు. చంద్రుడిపై చంద్రయాన్ 3 ల్యాండర్‌ సేఫ్‌గా ల్యాండ్ అవడంతో విద్యార్థులు ఉత్సాహంగా కేరింతలు కొడుతూ సంబరాలు చేసుకున్నారు.

23/08/2023 18:23(IST)

Chandrayaan-3: ఇస్త్రో శాస్త్రవేత్తలకు ప్రధాని మోదీ అభినందనలు

ఇంటర్నెట్‌ డెస్క్‌: జాబిల్లి దక్షిణ ధ్రువంపై భారత్‌ అడుగుపెట్టి సరికొత్త చరిత్ర సృష్టించిందని ప్రధాని నరేంద్ర మోదీ అన్నారు. జొహెన్నెస్‌బర్గ్‌ నుంచి ప్రధాని మోదీ వర్చువల్‌గా చంద్రయాన్‌ - 3 ల్యాండింగ్‌ ప్రక్రియను వీక్షించారు. విక్రమ్‌ ల్యాండర్‌ సుమారు 40 రోజుల పాటు ప్రయాణించి చంద్రుడి దక్షిణ ధ్రువంపై దిగింది. చంద్రయాన్‌-3 విజయవంతమైనట్టు ఇస్రో శాస్త్రవేత్తలు ప్రకటించిన వెంటనే ప్రధాని మోదీ హర్షం వ్యక్తం చేశారు. జొహెన్నెస్‌బర్గ్‌ నుంచే దేశ ప్రజలనుద్దేశించి వర్చువల్‌గా మాట్లాడారు.

‘‘చంద్రయాన్‌-3 ఘన విజయంతో నా జీవితం ధన్యమైంది. అమృత కాలంలో తొలి ఘన విజయం ఇది. ఈ విజయం దేశం గర్వించే మహోన్నత ఘట్టం. అద్భుత విజయం కోసం 140కోట్ల మంది ఎదురు చూశారు. బ్రిక్స్‌ సమావేశాల్లో ఉన్నా నా మనసంతా చంద్రయాన్‌-3 పైనే ఉంది. చంద్రయాన్‌-3 బృందం, ఇస్రో శాస్త్ర వేత్తలకు అభినందనలు. ఈ క్షణం కోసం ఎన్నో ఏళ్లుగా ఎదురు చూశా’’ అని మోదీ అన్నారు.

23/08/2023 18:19(IST)

చంద్రయాన్‌ 3 విజయంపై ఆనందం వ్యక్తం చేసిన గవర్నర్‌

హైదరాబాద్‌: బిర్లా ప్లానిటోరియంలో ఏర్పాటు చేసిన చంద్రయాన్ 3 సాప్ట్ ల్యాండింగ్ కార్యక్రమాన్ని గవర్నర్‌ తమిళిసై సౌందరరాజన్‌ లైవ్‌లో వీక్షించారు. చంద్రయాన్‌ 3 విజయంపై ఆమె ఆనందం వ్యక్తం చేశారు.

23/08/2023 18:06(IST)

జాబిల్లిపై అడుగుపెట్టిన చంద్రయాన్‌-3

బెంగళూరు: పున్నమి నిండు చందమామ సొగసు చూస్తూ వేల ఏళ్లుగా మురిసిపోయిన భారతావని మనసు.. ఇప్పుడు గర్వంతో ఉప్పొంగిపోతోంది. నెలరాజు గుట్టు విప్పేందుకు నింగిలోకి దూసుకెళ్లిన మన చంద్రయాన్‌-3 (Chandrayaan-3) విజయగీతిక వినిపించింది. 140కోట్ల మంది భారతీయుల కలల్ని నిజం చేస్తూ జాబిల్లిపై అడుగు పెట్టింది. పదిహేనేళ్ల క్రితం చంద్రుడిపై నీరుందని తేల్చి విశ్వపరిశోధనల్లో కొత్త శ్వాస నింపిన భారత్‌.. ఇప్పుడు చంద్రయాన్‌-3తో జాబిల్లిపై ఎవరూ వెళ్లని దారుల్లో వెళ్లి.. ఎవరూ చూడని ‘దక్షిణ’ జాడల్ని ప్రపంచానికి చూపించింది. బుధవారం సాయంత్రం 6.04 గంటలకు ల్యాండర్‌ జాబిల్లిపై దిగ్విజయంగా కాలుమోపి.. భారత వైజ్ఞానిక సత్తాను ప్రపంచానికి చాటిచెప్పింది.

23/08/2023 17:58(IST)

కొనసాగుతున్న చంద్రుడిపై ల్యాండర్‌ విక్రమ్‌ దిగే ప్రక్రియ

ఇంటర్నెట్‌డెస్క్‌: చంద్రుడిపై ల్యాండర్‌ విక్రమ్‌ సాఫ్ట్‌ ల్యాండింగ్‌ ప్రక్రియ ప్రారంభమైంది. చంద్రుడిపై 17 నిమిషాల పాటు సాఫ్ట్‌ ల్యాండింగ్‌ ప్రక్రియ కొనసాగనుంది. బెంగళూరు ఇస్త్రో కేంద్రంలో ఈ ప్రక్రియను శాస్త్రవేత్తలు నిశితంగా పరిశీలిస్తున్నారు. చంద్రయాన్‌-3 సాఫ్ట్‌ ల్యాండింగ్‌పై దేశ వ్యాప్తంగా ప్రజలు ఉత్కంఠగా ఎదురు చూస్తున్నారు.

23/08/2023 17:48(IST)

ధర్మగిరిలో శాస్త్రోక్తంగా కారీరిష్టి యాగం

తిరుమల: రాష్ట్రం, దేశం సుభిక్షంగా ఉండాల‌ని.. స‌కాలంలో వ‌ర్షాలు కుర‌వాల‌ని శ్రీ‌వారిని ప్రార్థిస్తూ తిరుమ‌ల ధ‌ర్మగిరి వేద విజ్ఞాన పీఠంలో కారీరిష్టి యాగం నిర్వహించారు. ధ‌ర్మగిరి వేద విజ్ఞానపీఠం ప్రిన్సిపల్ కేఎస్ఎస్‌. అవ‌ధాని ఆధ్వర్యంలో 32 మంది వేద‌ పండితులు యాగాలు, జపాలు, పారాయణాలు చేశారు.

23/08/2023 17:39(IST)

Hyderabad: అచ్చమైన తెలుగింటి చిగురు రెస్టారెంట్ ప్రారంభం

హైదరాబాద్‌ జూబ్లీహిల్స్‌లో అచ్చమైన తెలుగింటి సౌత్ చిగురు రెస్టారెంట్‌ను మంత్రి శ్రీనివాస్ గౌడ్ ప్రారంభించారు. భోజన ప్రియులకు నోరూరించే వంటకాల రుచులను ఆ రెస్టారెంట్ అందించనుంది.

23/08/2023 17:08(IST)

పట్టించుకోకుంటే ప్రమాదమే..!

ఆదిలాబాద్‌: జాతీయ రహదారి నుంచి పట్టణానికి ఆనుకొని ఉన్న పలు కాలనీలకు వెళ్లే దారిలో ఓ విద్యుత్‌ స్తంభం కొంత మేర నేలకొరిగింది. ఎప్పుడైనా పూర్తిస్థాయిలో కిందపడిపోయే ప్రమాదం ఉంది. విద్యుత్తు అధికారులు స్పందించి మరమ్మతులు చేయాలని ప్రజలు కోరుతున్నారు.

23/08/2023 17:03(IST)

అప్పన్న ఆలయ హుండీ లెక్కింపులో కలకలం రేపిన రూ. 100 కోట్ల చెక్కు

విశాఖపట్నం: బుధవారం సింహగిరిపై నిర్వహించిన అప్పన్న దేవస్థానం హుండీ ఆదాయం లెక్కింపులో రూ. 100 కోట్లు విలువచేసే బ్యాంకు చెక్కు లభించింది. ఓ భక్తుడు సమర్పించిన ఈ చెక్కును బ్యాంకు ద్వారా పరిశీలించగా.. రూ. 17 మాత్రమే ఖాతాలో ఉన్నట్లు అధికారులు గుర్తించారు. ఎవరో ఆకతాయిగా ఇలా చేసి ఉండొచ్చని అధికారులు భావిస్తున్నారు.

23/08/2023 16:56(IST)

‘ఇస్రో’కు విద్యార్థుల జేజేలు

కడియం: ‘చంద్రయాన్ 3’ విజయవంతం కావాలని కోరుతూ.. తూర్పుగోదారి జిల్లాలోని కడియం ఉన్నత పాఠశాలలో ప్రధానోపాధ్యాయుడు టి. సత్యనారాయణ అధ్యక్షతన సభ నిర్వహించి ఇస్రో చేస్తున్న ప్రయోగాలను కొనియాడారు. ఈ సందర్భంగా విద్యార్థులు ఇస్రో ఆకారంలో కూర్చొని ప్రదర్శన చేశారు. ఇస్రోకు జేజేలు పలికారు.

23/08/2023 16:15(IST)

అనతి కాలంలోనే తెలంగాణ అద్భుత ప్రగతి సాధించింది: కేసీఆర్‌

మెదక్‌: సీఎం కేసీఆర్‌ మెదక్‌లో భారాస కార్యాలయం, ఎస్పీ కార్యాలయాన్ని ప్రారంభించారు. అనంతరం ఆయన మాట్లాడుతూ.. తెలంగాణ రాకముందు పరిపాలన చేతకాదని విమర్శించారని అన్నారు. రాష్ట్రం ఏ స్థాయిలో ఉందనేందుకు కొన్ని గీటురాళ్లు ఉంటాయన్నారు. తలసరి ఆదాయంలో తెలంగాణ అగ్రస్థానంలో ఉందన్నారు. అనతి కాలంలోనే తెలంగాణ అద్భుత ప్రగతి సాధించిందని వివరించారు.

23/08/2023 16:09(IST)

కృష్ణా, గోదావరి జలాలను కాంగ్రెస్ పార్టీ హైదరాబాద్‌కు తీసుకువచ్చింది: రేవంత్ రెడ్డి

హైదరాబాద్‌: పీసీసీ అధ్యక్షుడు రేవంత్‌ రెడ్డి సమక్షంలో పలువులు నేతలు కాంగ్రెస్‌లో చేరారు. మాజీ మంత్రి ఏ చంద్రశేఖర్ కాంగ్రెస్‌లో చేరారు. చంద్రశేఖర్‌ ఇటీవల భాజపాకు రాజీనామా చేశారు. గాంధీభవన్‌లో చంద్రశేఖర్‌కు మాణిక్‌రావు ఠాక్రే కండువా కప్పి పార్టీలోకి ఆహ్వానించారు. ఈ సందర్భంగా రేవంత్‌ రెడ్డి మాట్లాడారు. కృష్ణా, గోదావరి జలాలను కాంగ్రెస్ పార్టీ హైదరాబాద్‌కు తీసుకువచ్చిందన్నారు. హైటెక్ సిటీని అభివృద్ధి చేసింది కాంగ్రెస్‌ అని వివరించారు. కాళేశ్వరం ప్రాజెక్టులో రూ. లక్ష కోట్టు కాజేశారని ఆరోపించారు.

23/08/2023 15:36(IST)

‘చంద్రయాన్ 3’ విజయవంతం కావాలని విద్యార్థుల ర్యాలీ

అనంతపురం: ‘చంద్రయాన్ 3’ విజయవంతం కావాలని అనంతపురం జిల్లా రాయదుర్గం పట్టణంలో బుధవారం విద్యార్థులు జాతీయ జెండాతో ర్యాలీ నిర్వహించారు. 500 అడుగుల జాతీయ జెండాతో విద్యార్థులు ఉత్సాహంగా ర్యాలీ తీశారు.

23/08/2023 15:33(IST)

టంగుటూరి ప్రకాశం పంతులు చిత్రపటానికి నివాళులర్పించిన సీఎం

అమరావతి: స్వాతంత్య్ర సమరయోధుడు, ఆంధ్రరాష్ట్ర తొలి ముఖ్యమంత్రి, ఆంధ్రకేసరి టంగుటూరి ప్రకాశం పంతులు జయంతి సందర్భంగా ముఖ్యమంత్రి వైఎస్ జగన్ నివాళులు అర్పించారు. తాడేపల్లిలోని సీఎం క్యాంప్‌ కార్యాలయంలో ప్రకాశం పంతులు చిత్రపటానికి సీఎం నివాళులు అర్పించారు. కార్యక్రమంలో మంత్రులు పెద్దిరెడ్డి రామచంద్రారెడ్డి, జోగి రమేష్, ప్రభుత్వ విప్‌ చెవిరెడ్డి భాస్కర్‌ రెడ్డి పాల్గొన్నారు.

23/08/2023 15:22(IST)

మంత్రి శ్రీనివాస్‌ గౌడ్‌ అఫిడవిట్‌పై ప్రజాప్రతినిధుల కోర్టులో విచారణ

హైదరాబాద్‌: మంత్రి శ్రీనివాస్‌ గౌడ్‌ అఫిడవిట్‌పై ప్రజాప్రతినిధుల కోర్టులో విచారణ జరిగింది. మహబూబ్‌నగర్‌ పోలీసులు ఫిర్యాదుదారుడు రాఘవేందర్‌రాజుకు మిస్టేక్స్‌ ఆఫ్‌ ఫ్యాక్ట్స్‌ కింద నోటీసులు జారీ చేశారు. ఈనెల 19న నోటీసులు ఇచ్చారు. నోటీసులపై వారంలోపు కోర్టులో సమాధానం ఇవ్వాలని పోలీసులు కోరారు. ఈ మేరకు ఫిర్యాదుదారు కోర్టును ఆశ్రయించారు.

23/08/2023 15:18(IST)

దళితబంధు ఇవ్వాలంటూ బీబీపేట్‌లో ఆందోళన

కామారెడ్డి: దళితబంధు ఇవ్వాలంటూ బీబీపేట్‌లో ఆందోళన నిర్వహించారు. బీబీపేట్‌ మండలం మల్కాపూర్‌, కోనాపూర్‌ గ్రామస్థులు ఆందోళన చేశారు. దళితబంధు ఇవ్వాంలంటూ అంబేడ్కర్‌ విగ్రహానికి వారు వినతిపత్రం అందించి నిరసన తెలిపారు.

23/08/2023 15:03(IST)

‘చంద్రయాన్ 3’ విజయవంతం కావాలని రిషికేష్‌లో ప్రత్యేక పూజలు

చంద్రయాన్ అంతరిక్ష నౌక విజయవంతంగా చంద్రుడిపై అడుగు పెట్టాలని రిషికేష్ ఆశ్రమంలో విశాఖ శారదాపీఠం అధిపతి స్వరూపానందేంద్ర స్వామి, స్వాత్మానందేంద్ర స్వామి ప్రత్యేక పూజలు నిర్వహించారు. ఈ సందర్భంగా పండితులు వనదుర్గా హోమం నిర్వహించారు.

23/08/2023 14:48(IST)

ఎమ్మెల్యే రాజయ్యను కలిసేందుకు వెళ్లిన పల్లా రాజేశ్వర్‌రెడ్డి

హనుమకొండ: భారాసకు చెందిన స్టేషన్‌ ఘన్‌పూర్‌ ఎమ్మెల్యే తాడికొండ రాజయ్యను కలిసేందుకు ఎమ్మెల్సీ పల్లా రాజేశ్వర్‌రెడ్డి ఆయన ఇంటికి వెళ్లారు. హనుమకొండలోని ఇంటికి వెళ్లగా రాజయ్య అక్కడ లేకపోవడంతో వెనుదిరిగారు.

23/08/2023 14:16(IST)

కోఠి డీఎంఈ కార్యాలయం ఎదుట రెండో ఏఎన్‌ఎంల మహా ధర్నా

హైదరాబాద్: కాంట్రాక్టు ఏఎన్ఎం సర్వీస్‌లను క్రమబద్దీకరించాలని డిమాండ్ చేస్తూ.. హైదరాబాద్ కోఠిలోని డి.ఎం.ఈ. కార్యాలయం ముందు రెండో ఏఎన్ఎంలు మహా ధర్నా నిర్వహించారు. తొమ్మిది రోజుల సమ్మెలో భాగంగా తెలంగాణ యునైటెడ్ మెడికల్ అండ్ హెల్త్ ఎంప్లాయీస్‌ యూనియన్ ఆధ్వర్యంలో చేపట్టిన మహా ధర్నాలో ఏఎన్ఎంలు పెద్దఎత్తున పాల్గొన్నారు.

23/08/2023 14:13(IST)

మాజీ మంత్రి తుమ్మల నాగేశ్వరరావుతో ఎంపీ నామా భేటీ

ఖమ్మం: మాజీ మంత్రి తుమ్మల నాగేశ్వరరావుతో ఎంపీ నామా నాగేశ్వరరావు భేటీ అయ్యారు. పాలేరు టికెట్ దక్కకపోవడంతో తుమ్మల అసంతృప్తి వ్యక్తం చేశారు. సీఎం ఆదేశాల మేరకు తుమ్మలతో చర్చించినట్లు నామా నాగేశ్వరరావు తెలిపారు.

23/08/2023 14:09(IST)

తెలంగాణలో రానున్న మూడు రోజులు మోస్తరు వర్షాలు కురిసే అవకాశం: వాతావరణ శాఖ

హైదరాబాద్‌: ఈరోజు రాష్ర్టంలో భారీ వర్షాలు కురిసే అవకాశం ఉందని హైదరాబాద్‌ వాతావరణ కేంద్రం ప్రకటించింది. మంచిర్యాల, రాజన్న సిరిసిల్ల, కరీంనగర్‌, పెద్దపల్లి, జయశంకర్‌ భూపాలపల్లి, ములుగు, వరంగల్‌, హనుమకొండ జిల్లాల్లో అక్కడక్కడ భారీ వర్షాలు కురుస్తాయని తెలిపింది. గురువారం, శుక్రవారం తేలికపాటి నుంచి మోస్తరు వర్షాలు అక్కడక్కడ కురిసే అవకాశం ఉందని పేర్కొంది.

23/08/2023 14:00(IST)

మెదక్‌లో బహిరంగ సభకు బయలుదేరిన సీఎం కేసీఆర్‌

హైదరాబాద్‌: సీఎం కేసీఆర్‌ ఈరోజు మెదక్‌లో పర్యటించనున్నారు. భారాస ఆధ్వర్యంలో మెదక్‌లో భారీ బహిరంగ సభ నిర్వహించనున్నారు. ఈ సందర్భంగా బాలానగర్, జీడిమెట్ల మీదుగా వెళ్తున్న సీఎం కాన్వాయ్‌కు ఎమ్మెల్యే, కార్యకర్తలు స్వాగతం పలికారు.

23/08/2023 13:43(IST)

నటుడు ధనంజయ్‌కు బర్త్‌ డే విషెస్‌ చెప్పిన ‘పుష్ప-2’ టీమ్‌

అల్లు అర్జున్‌ హీరోగా ప్రముఖ దర్శకుడు సుకుమార్‌ తెరకెక్కిస్తున్న చిత్రం ‘పుష్ప -2’. ఈ సినిమాలో కన్నడ నటుడు ధనంజయ్‌ కీలక పాత్ర పోషిస్తున్నారు. ఈరోజు ధనంజయ్‌ పుట్టినరోజు సందర్భంగా చిత్రబృందం ఆయనకు శుభాకాంక్షలు తెలుపుతూ ఓ ఫొటోను ట్విటర్‌లో పంచుకుంది.

23/08/2023 13:33(IST)

సాయంత్రం 5.44 గంటలకు నిర్దేశిత ప్రాంతానికి ల్యాండర్‌ విక్రమ్‌: ఇస్రో

ల్యాండర్‌ విక్రమ్‌ సాఫ్ట్‌ ల్యాండింగ్‌పై ఇస్రో ప్రకటన జారీ చేసింది. నిర్దేశిత ప్రాంతానికి ల్యాండర్‌ సాయంత్రం 5.44 గంటలకు చేరుకుంటుందని ఇస్రో తెలిపింది. ఆటోమేటిక్‌ ల్యాండింగ్ ప్రక్రియ సాయంత్రం 5.44 గంటలకు ప్రారంభం కానుంది.

23/08/2023 13:30(IST)

రాష్ట్రంలో 3 పునరుత్పాదక ఇంధన ప్రాజెక్టులకు శంకుస్థాపన

అమరావతి: రాష్ట్రంలో 3 పునరుత్పాదక ఇంధన ప్రాజెక్టులకు సీఎం వర్చువల్‌గా శంకుస్థాపన చేశారు. నంద్యాల జిల్లా యాగంటిలో వెయ్యి మెగావాట్ల సామర్థ్యం గల ప్రాజెక్టుకు శంకుస్థాపన చేశారు. అనంతపురం జిల్లా కమలపాడులో 950 మెగావాట్ల ప్రాజెక్టుకు సీఎం శంకుస్థాపన చేశారు. పిన్నాపురంలో గ్రీన్‌ కో ఎనర్జీ 2,300 మెగావాట్ల సౌరవిద్యుత్‌ ప్రాజెక్టుకు శంకుస్థాపన చేశారు.

23/08/2023 13:25(IST)

పరకాలలో ఎమ్మెల్యే క్యాంపు కార్యాలయం వద్ద ఉద్రిక్తత

హనుమకొండ: పరకాలలో ఎమ్మెల్యే క్యాంపు కార్యాలయం వద్ద ఉద్రిక్తత నెలకొంది. భాజపా కార్యకర్తలు ఎమ్మెల్యే క్యాంపు కార్యాలయాన్ని ముట్టడించారు. దళితబంధు, రెండ పడకగదుల ఇళ్ల కోసం భాజపా శ్రేణులు ఆందోళన చేశారు. దీంతో ఇరు పార్టీల కార్యకర్తలు దాడులు చేసుకున్నారు.

23/08/2023 13:18(IST)

మంత్రి సింగిరెడ్డి నిరంజన్ రెడ్డి నేతృత్వంలో అధికారుల బృందం అమెరికా పర్యటన

హైదరాబాద్: వ్యవసాయ మంత్రి సింగిరెడ్డి నిరంజన్ రెడ్డి నేతృత్వంలో అధికారుల బృందం అమెరికా పర్యటనకు వెళ్లనుంది. ఈ నెల 27 నుంచి సెప్టెంబరు 3 వరకు పర్యటన జరగనుంది. 29 నుంచి 31 వరకు ఇల్లినాయిస్ రాష్ట్రంలో జరిగే ప్రతిష్ఠాత్మక ఫార్మ్ ప్రోగ్రెస్ - 2023షోకు మంత్రి బృందం హాజరుకానుంది. అమెరికాలో ప్రముఖ వ్యవసాయక రాష్ట్రం లోవా, నార్త్ కరోలినా, వాషింగ్టన్ డీసీలో క్షేత్రస్థాయి పర్యటన సాగనుంది. అమెరికా ఫెడరల్ వ్యవసాయ శాఖ కార్యదర్శి, అమెరికా వ్యవసాయశాఖ ఉన్నతాధికారులతో నాయకులు భేటీ కానున్నారు.

23/08/2023 13:13(IST)

బీసీ కులవృత్తిదారులకు ఆర్థిక సహాయం నిరంతర ప్రక్రియ: తలసాని శ్రీనివాస్‌ యాదవ్‌

హైదరాబాద్‌: బీసీ కులవృత్తిదారులకు ఆర్థిక సహాయం నిరంతర ప్రక్రియ అని మంత్రి తలసాని శ్రీనివాస్‌ యాదవ్‌ పేర్కొన్నారు. రాష్ట్రంలో నిరుపేద ప్రజలను ఆదుకోవడమే తమ పార్టీ లక్ష్యం అని అన్నారు. జూబ్లీహిల్స్ నియోజకవర్గం పరిధిలో బీసీ కులవృత్తి లబ్ధిదారులకు రూ. లక్ష చొప్పున ఆర్థిక సహాయం చెక్కులను మంత్రి, జూబ్లీహిల్స్ ఎమ్మెల్యే మాగంటి గోపీనాథ్ ఆధ్వర్యంలో అందజేశారు. సవేర ఫంక్షన్‌ హాల్‌లో 300 మంది అర్హులైన లబ్ధిదారులకు ఈ చెక్కులను అందించారు.

23/08/2023 13:10(IST)

తెదేపాలోకి చేరిన యార్లగడ్డ అనుచరులు

గన్నవరం: కృష్ణాజిల్లా గన్నవరం నియోజకవర్గంలో ప్రస్తుత ఎమ్మెల్యే వంశీ ఓటమి కోసం అంతా కలిసికట్టుగా పనిచేసి.. తెలుగుదేశం కంచుకోటలో పసుపు జెండా ఎగురవేస్తామని గన్నవరం తెలుగుదేశం నేత యార్లగడ్డ వెంకట్రావు అన్నారు. ఆత్మాభిమానంతోనే తాము తెలుగుదేశంలోకి వస్తున్నామని చెప్పారు. గన్నవరం నియోజకవర్గంలో యార్లగడ్డ వెంకట్రావు ఆధ్వర్యంలో తెదేపా జాతీయ ప్రధాన కార్యదర్శి నారా లోకేష్ సమక్షంలో పెద్ద ఎత్తున వైకాపా నాయకులు, శ్రేణులు తెలుగుదేశంలో చేరారు.

23/08/2023 13:08(IST)

తిరుమల శ్రీవారి సేవలో ప్రముఖులు

తిరుమల: తిరుమల శ్రీవారిని పలువురు ప్రముఖులు దర్శించుకున్నారు. ఈరోజు వీఐపీ ప్రారంభ విరామ దర్శన సమయంలో కర్ణాటక రాష్ట్ర గవర్నర్ థావర్ చంద్ గహ్లోత్‌, విశ్రాంత న్యాయమూర్తి జస్టిస్ జి.రోహిణి, డ్రమ్స్ శివమణి వేరువేరుగా స్వామివారి సేవలో పాల్గొన్నారు. తితిదే ఆలయ అధికారులు వీరికి స్వాగతం పలికి దర్శన ఏర్పాట్లు చేశారు.అనంతరం గర్భాలయంలో స్వామివారిని దర్శించుకొని వీరు మొక్కులు చెల్లించారు. దర్శన అనంతరం రంగనాయకుల మండపంలో పండితులు ఆశీర్వచనం చేసి స్వామివారి తీర్థప్రసాదాలను వారికి అందజేశారు.

23/08/2023 13:04(IST)

భారాసకు మాజీ ఎమ్మెల్సీ రాజీనామా

కరీంనగర్ జిల్లా: కరీంనగర్‌లో భారాసకు షాక్‌ తగిలింది. మాజీ ఎమ్మెల్సీ సంతోష్ కుమార్ భారాసకు రాజీనామా చేస్తున్నట్లు ప్రకటించారు. రానున్న ఎన్నికల్లో కరీంనగర్ నుంచి బరిలో ఉంటానని మీడియా సమావేశంలో సంతోష్‌ ప్రకటించారు. పార్టీలో ప్రాధాన్యత లేకపోవడం వల్లనే భారాసకు రాజీనామా చేస్తున్నట్లు ఆయన చెప్పారు. ఏదైనా ప్రధాన పార్టీ టిక్కెట్ దక్కితే ఆ పార్టీ నుంచి.. లేదా ఇండిపెండెంట్‌గా రంగంలోకి దిగేందుకు సిద్ధమని ఆయన వివరించారు.

23/08/2023 13:02(IST)

సమాచార కమిషనర్ల నియామకంలో జాప్యంపై హైకోర్టులో విచారణ

హైదరాబాద్: సమాచార కమిషనర్ల నియామకంలో జాప్యంపై హైకోర్టులో విచారణ జరిగింది. ఫోరం ఫర్ గుడ్ గవర్నెన్స్ పిల్‌పై సీజే జస్టిస్ అలోక్ అరాధే ధర్మాసనం విచారణ చేసింది. ప్రధాన, రాష్ట్ర సమాచార కమిషనర్ల నియామకానికి నోటిఫికేషన్ ఇచ్చామని ప్రభుత్వం వాదనను వినిపించింది. ప్రధాన సమాచార కమిషనర్ కోసం 40 దరఖాస్తులు వచ్చినట్లు ప్రభుత్వం తెలిపింది. రాష్ట్ర సమాచార కమిషనర్ పోస్టుల కోసం 273 దరఖాస్తులు వచ్చాయని తెలిపింది. సమాచార కమిషనర్ల నియామకం కోసం ఎంపిక కమిటీ ఏర్పాటు చేస్తామని ప్రభుత్వం వివరించింది. ఈ మేరకు సమాచార కమిషనర్ల ఎంపిక కోసం ప్రభుత్వం నాలుగు వారాల గడువు కోరింది. విచారణను కోర్టు నాలుగు వారాలకు వాయిదా వేసింది.

23/08/2023 12:58(IST)

రేవంత్ రెడ్డి నివాసంలో కాంగ్రెస్‌లోకి చేరికలు

హైదరాబాద్‌: టీపీసీసీ అధ్యక్షుడు రేవంత్ రెడ్డి సమక్షంలో పలువురు నాయకులు కాంగ్రెస్‌లో చేరారు. మహబూబ్‌నగర్‌ జిల్లా దేవకద్రకు చెందిన భారాస నాయకులు కాంగ్రెస్‌లో చేరారు. వారికి రేవంత్ రెడ్డి కండువా కప్పి పార్టీలోకి ఆహ్వానించారు.

23/08/2023 12:55(IST)

గంజాయి విక్రయిస్తున్న మఠాను అరెస్ట్‌ చేసిన పోలీసులు

హైదరాబాద్: హైదరాబాద్‌లో గంజాయి విక్రయిస్తున్న ముఠాపై పోలీసులు దృష్టి సారించారు. ఈ మేరకు TSNAB ఎస్పీ గుమ్మి చక్రవర్తి వివరాలు వెల్లడించారు. గోల్కొండ పోలీసులు, నార్కోటిక్ బృందం సంయుక్తంగా ఆపరేషన్ నిర్వహించి గంజాయి విక్రయిస్తున్న ముఠాను అరెస్ట్ చేసినట్లు తెలిపారు. ఈ ముఠాలో పదిమంది నిందితులు ఉన్నట్లు తెలిపారు. వీరిలో నలుగురిని అరెస్ట్ చేయగా.. మరో ఆరుగురు పరారీలో ఉన్నారని చెప్పారు.

23/08/2023 12:34(IST)

నకిరేకల్‌లో ఎమ్మెల్యే క్యాంపు కార్యాలయం వద్ద ఉద్రిక్తత

నల్గొండ: నకిరేకల్‌లో ఎమ్మెల్యే క్యాంపు కార్యాలయం వద్ద ఉద్రిక్తత నెలకొంది. భాజపా శ్రేణులు ఎమ్మెల్యే క్యాంపు కార్యాలయాన్ని ముట్టడించారు. అర్హులందరికీ రెండుపడక గదుల ఇళ్లు ఇవ్వాలని డిమాండ్ చేశారు. దీంతో భాజపా, భారాస నేతలు, కార్యకర్తల మధ్య ఘర్షణ నెలకొంది. ఇరు పార్టీల కార్యకర్తలు పరస్పరం దాడి చేసుకున్నారు.

23/08/2023 12:31(IST)

విశ్రాంత ఆర్మీ ఉద్యోగిపై కత్తులు.. రాడ్లతో వైకాపా నేతల దాడి

విశాఖ జిల్లాలోని పద్మనాభం మండలం రేవిడిలో విశ్రాంత ఆర్మీ ఉద్యోగి ఆదినారాయణపై వైకాపా నాయకులు కత్తులు, రాడ్లతో దాడి చేశారు. సర్పంచ్ కోనసూరమ్మ అనుచరులే దాడి చేశారని బాధితుడు ఆరోపించారు. సర్పంచ్‌ కుమారుడి భూఆక్రమణలపై స్పందనలో ఫిర్యాదు చేసినందునే తనపై దాడి చేశారని వాపోయారు. తీవ్రంగా గాయపడిన ఆదినారాయణ తగరపు వలస ఆస్పత్రిలో చికిత్స పొందుతున్నారు.

23/08/2023 12:28(IST)

తిరుమలలో కొనసాగుతున్న ఆపరేషన్ చిరుత

తిరుమల: తిరుమలలో రాత్రి సమయాల్లో చిరుత, ఎలుగుబంటి సంచరిస్తున్నాయి. మంగళవారం రాత్రి చిరుత, ఎలుగుబంటిని బందించేందుకు అటవీశాఖ అధికారులు ప్రయత్నించారు. 100 మంది సిబ్బందితో అటవీ ప్రాంతంలో ఆపరేషన్ చిరుత కొనసాగించారు. ఈ క్రమంలో చిరుత, ఎలుగుబంటి తప్పించుకున్నట్లు అధికారులు తెలిపారు. చిరుత ట్రాప్ బోన్ సమీపానికి వచ్చి వెనక్కి వెళ్లినట్లు వివరించారు. చిరుతను ట్రాప్ చేసేందుకు అధికారులు నూతన వ్యూహాలను సిద్ధం చేస్తున్నారు. మత్తు ఇచ్చి ఎలుగుబంటిని ట్రాప్ చేసేందుకు ప్రయత్నించారు. అయినా ఎలుగుబంటి తప్పించుకుపోయిందని చెప్పారు.

23/08/2023 12:25(IST)

‘ఖుషి’ మూవీకి U/A సర్టిఫికెట్‌.. షేర్‌ చేసిన విజయ్‌ దేవరకొండ

విజయ్‌ దేవరకొండ (Vijay Deverakonda), సమంత (Samantha) జంటగా నటించిన ప్రేమకథా చిత్రం ‘ఖుషి’ (Kushi). శివ నిర్వాణ దర్శకత్వం వహించిన ఈ సినిమా సెప్టెంబరు 1న ప్రేక్షకుల ముందుకు రానుంది. ఈ సినిమాకు సెన్సార్‌ బోర్డు యూ/ఏ సర్టిఫికెట్‌ జారీ చేసింది. ఈ విషయాన్ని తెలుపుతూ విజయ్‌ దేవరకొండ సోషల్‌ మీడియాలో ఓ పోస్టర్‌ను షేర్ చేశారు.

23/08/2023 12:10(IST)

కూలిన రైల్వే వంతెన.. 17 మంది దుర్మరణం

ఐజ్వాల్‌: మిజోరంలో విషాదం చోటు చేసుకుంది. ఐజ్వాల్‌ సమీపంలోని సైరాంగ్‌ వద్ద నిర్మాణంలో ఉన్న రైల్వే వంతెన కూలిపోయింది. ఈ దుర్ఘటనలో 17 మంది ప్రాణాలు కోల్పోయారు. మరో 30 మంది శిథిలాల కింద చిక్కుకున్నట్లు పోలీసులు అనుమానిస్తున్నారు.

23/08/2023 12:09(IST)

చంద్రయాన్‌ 3 విజయవంతం కావాలని ప్రత్యేక పూజలు

ఆదిలాబాద్ సాంస్కృతికం: చంద్రయాన్‌ 3 విజయవంతం కావాలని ఆదిలాబాద్‌ జిల్లా కేంద్రంలోని గంగపుత్ర శివాలయంలో సనాతన హిందూ ఉత్సవ సమితి నాయకులు ప్రత్యేక పూజలు చేశారు. ఈ సందర్భంగా శివ లింగానికి క్షీరాభిషేకం, ప్రత్యేక అర్చనలు నిర్వహించారు. చంద్రుడిపై సాఫ్ట్‌ల్యాండింగ్ కావాలని వేడుకున్నారు. సమితి అధ్యక్ష, కార్యదర్శులు ప్రమోద్ కుమార్ కత్రి, జి.మాధవ్, సభ్యులు రవీందర్, పడగంటి సూర్యకాంత్, గుజరాతి నాగేష్, శ్రీనివాస్, కొత్తపల్లి దశరథ్, బండారి దేవన్న తదితరులు ఉన్నారు.

23/08/2023 12:08(IST)

ఇరు వర్గాల మధ్య ఘర్షణ.. 8 మందికి గాయాలు

పార్వతీపురం టౌన్‌: పార్వతీపురం మన్యం జిల్లా ఎంఆర్ నగరం గ్రామంలో రెండు వర్గాల మధ్య జరిగిన ఘర్షణలో 8 మంది గాయపడ్డారు. పోలీసులు తెలిపిన వివరాల మేరకు ఎంఆర్‌ గ్రామంలోని నీటి కుళాయి వద్ద మంగళవారం సాయంత్రం రెండు వర్గాలకు మధ్య వాగ్వాదం జరిగింది. బుధవారం ఉదయం మళ్లీ ఇదే విషయమై రెండు వర్గాలు ఘర్షణ పడ్డారు. పరస్పరం ఒకరిపై మరొకరు దాడికి పాల్పడ్డారు. ఈ దాడిలో ఎనిమిది మంది గాయపడ్డారు. బాధితులను జిల్లా ఆసుపత్రికి తరలించి చికిత్స అందిస్తున్నారు. ఈ మేరకు పోలీసులు కేసు నమోదు చేసి దర్యాప్తు చేపట్టారు.

23/08/2023 11:35(IST)

మోదీ సర్కార్‌ మహిళా బిల్లును ఎందుకు ఆమోదించలేదు: కవిత

హైదరాబాద్: ఇప్పటికీ పార్లమెంట్‌లో మహిళల శాతం కేవలం 12శాతమే ఉందని భారాస ఎమ్మెల్సీ కవిత అన్నారు. తొలి లోక్‌సభలో 8శాతం మహిళా ఎంపీలు ఉంటే ఇప్పుడు 12శాతం మంది ఉన్నారన్నారు. ‘‘మణిపుర్‌లో ఇప్పుడు ఇద్దరు మహిళలు మాత్రమే ఎమ్మెల్యేలుగా ఎన్నికయ్యారు. మహిళలు సర్పంచ్‌లు, ఎంపీటీసీలు, జడ్పీటీసీలుగానే మిగిలిపోవాలా? 2010లో రాజ్యసభలో ఆమోదం పొందిన మహిళా బిల్లు 2023 వచ్చినా ఎందుకు ఆమోదం పొందలేదు. పదేళ్లుగా పూర్తి మెజార్టీతో అధికారంలో ఉన్న మోదీ సర్కార్‌ బిల్లును ఎందుకు ఆమోదించలేదు’’ అని కవిత ప్రశ్నించారు.

23/08/2023 11:28(IST)

జయహో భారత్‌.. ఆల్‌ ద బెస్ట్‌ ‘చంద్రయాన్3’

యావత్‌ ప్రపంచం ఉత్కంఠగా ఎదురుచూస్తున్నవేళ చంద్రుని ఉపరితలంపై చంద్రయాన్‌-3 రోవర్‌ సురక్షితంగా దిగాలని ఆకాంక్షిస్తూ ఇస్రో శాస్త్రవేత్తలకు ప్రముఖ సైకత శిల్పి సుదర్శన్‌ పట్నాయక్‌ శుభాకాంక్షలు తెలిపారు. ఒడిశాలోని పూరీ తీరంలో తన విద్యార్థులు తీర్చిదిద్దిన సైకత శిల్పాన్ని సోషల్‌ మీడియాలో పోస్టు చేశారు.

23/08/2023 11:09(IST)

జగన్‌ చర్యలతోనే విద్యుత్‌ లేని రాష్ట్రంగా ఏపీ: ఎమ్మెల్యే గొట్టిపాటి

అమరావతి: సీఎం జగన్‌ చర్యల వల్లే మిగులు విద్యుత్‌ రాష్ట్రంగా ఉన్న ఏపీ.. ఇప్పుడు విద్యుత్‌ లేని రాష్ట్రంగా మారిందని తెదేపాకు చెందిన అద్దంకి ఎమ్మెల్యే గొట్టిపాటి రవి దుయ్యబట్టారు. గత వారం రోజులుగా గ్రామాల్లో అప్రకటిత విద్యుత్‌ కోతలతో ప్రజలు అనేక ఇబ్బందులు పడుతున్నారని చెప్పారు. ఒకవైపు విద్యుత్‌ ఛార్జీల మోత.. మరోవైపు విద్యుత్‌ కోతలు.. ఈ రెండింటినీ అమలు చేస్తున్న ఏపీ ప్రభుత్వాన్ని గిన్నిస్‌ బుక్‌లో ఎక్కించవచ్చని ఆయన ఎద్దేవా చేశారు.

23/08/2023 11:08(IST)

ఏంటీ ఆర్థిక క్రమశిక్షణా రాహిత్యం?: యనమల

అమరావతి: రాష్ట్ర ప్రభుత్వ ఆర్థిక క్రమశిక్షణా రాహిత్యంపై ఆర్థిక శాఖ ప్రత్యేక ప్రధాన కార్యదర్శి ఎస్‌ఎస్ రావత్‌కు మాజీ ఆర్థికమంత్రి యనమల రామకృష్ణుడు లేఖ రాశారు. 2022 ఆడిట్ నివేదికలో కాగ్‌ లేవనెత్తిన అభ్యంతరాలను లేఖలో ప్రస్తావించారు. అసెంబ్లీ అనుమతి లేకుండా ₹లక్ష కోట్లు అప్పు చేసినట్లు కాగ్‌ గణాంకాలతో సహా నిర్ధరించిందన్నారు. 2022 మార్చి నాటికే ప్రభుత్వ గ్యారెంటీల ద్వారా తీసుకున్న అప్పులు ₹1,18,003 కోట్లుగా కాగ్‌ తేల్చిందని లేఖలో పేర్కొన్నారు.

23/08/2023 11:02(IST)

అసలైన ప్రజా నాయకుడు టంగుటూరి: చంద్రబాబు నివాళులు

అమరావతి: ఆంధ్రకేసరి టంగుటూరి ప్రకాశం పంతులు జయంతి సందర్భంగా తెలుగుదేశం అధినేత చంద్రబాబు నివాళులర్పించారు. తెలుగువారి ఆత్మస్థైర్యానికి నిలువుటద్దంలా నిలిచిన నాయకుడు టంగుటూరి ప్రకాశం పంతులని అన్నారు. దేశ స్వాతంత్య్రం కోసం సమస్తమూ త్యాగం చేసిన దేశభక్తుడు, స్వాతంత్య్రం అనంతరం పదవిలో ఉన్నా లేకున్నా ప్రజాసంక్షేమమే ఊపిరిగా బతికిన అసలైన ప్రజా నాయకుడని కొనియాడారు. ఉమ్మడి రాష్ట్ర ముఖ్యమంత్రిగా ఆ రోజుల్లోనే 14 నీటి పారుదల ప్రాజెక్టుల నిర్మాణాన్ని ప్రారంభించిన రైతు బాంధవుడు ఆయనని చంద్రబాబు పేర్కొన్నారు.

23/08/2023 10:49(IST)

జేసీ ప్రభాకర్‌రెడ్డి మీడియా సమావేశం

తాడిపత్రి: తాడిపత్రిలో జరుగుతున్న వాస్తవాలను తెలుసుకోకుండా మంత్రి పెద్దిరెడ్డి రామచంద్రారెడ్డి దిగజారి అధికారులకు ఫోన్లు చేస్తున్నారని మున్సిపల్ ఛైర్మన్ జేసీ ప్రభాకర్ రెడ్డి ఆరోపించారు. అనంతపురంలో మీడియా సమావేశం నిర్వహించారు. ఆయన మాట్లాడుతూ.. కళాశాల ప్రహరీని నిబంధనలకు విరుద్ధంగా నిర్మిస్తున్నారని చెప్పారు. గతంలో 50 అడుగుల రహదారిని మాస్టర్ ప్లాన్ ప్రకారం 120 రోడ్డుగా మార్చి, గతంలోనే పరిహారం కూడా చెల్లించారని జేసీ తెలిపారు. జిల్లా ఎస్పీ, కలెక్టర్లు ఎమ్మెల్యే కేతిరెడ్డి పెద్దారెడ్డి కోసం పనిచేస్తున్నారా.. తాడిపత్రి ప్రజల కోసం పనిచేస్తున్నారా అని ప్రశ్నించారు.

23/08/2023 10:37(IST)

ప్యాసింజర్‌ రైల్లో మంటలు

నిడదవోలు: పశ్చిమగోదావరి జిల్లా సత్యవాడ రైల్వేస్టేషన్‌ వద్ద పాసింజర్‌ రైల్లో మంటలు వచ్చాయి. రైలు నిడదవోలు నుంచి నరసాపురం వెళ్తుండగా షార్ట్ సర్క్యూట్‌తో మంటలు వచ్చినట్లు అధికారులు తెలిపారు. సకాలంలో గుర్తించిన రైల్వే సిబ్బంది మంటలను అదుపులోకి తీసుకొచ్చారు. అనంతరం రైలును తణుకు రైల్వేస్టేషన్‌కుతరలించారు.

23/08/2023 09:58(IST)

కడుపులో దూదిని మరచిపోయిన వైద్యులు.. బాలింత మృతి!

అచ్చంపేట: నాగర్‌కర్నూల్‌ జిల్లా అచ్చంపేటలో వైద్యుల నిర్లక్ష్యం కారణంగా ఓ బాలింత మృతి చెందింది. దర్శన్‌ గడ్డ తండాకు చెందిన గిరిజన మహిళ రోజా నిండు గర్భిణీ. ఆమెకు ప్రసవ నొప్పులు రావడంతో కుటుంబ సభ్యులు ఈనెల 15న అచ్చంపేట ప్రభుత్వ అస్పత్రిలో చేర్పించారు. ఆ మహిళ మగబిడ్డకు జన్మనిచ్చింది. అయితే అదే రోజున కుటుంబ నియంత్రణ ఆపరేషన్‌ చేసిన వైద్యులు.. పొరపాటున దూదిని కడుపులో మర్చిపోయి కుట్లు వేశారు. దీంతో బాలింతకు తీవ్ర రక్తస్రావమైంది. మెరుగైన చికిత్స కోసం హైదరాబాద్‌కు తరలించగా.. అక్కడ చికిత్స పొందుతూ బాలింత మృతి చెందింది.

23/08/2023 09:13(IST)

ఎన్నికల పండగ.. ఉపాధి మెండుగ !

శాసనసభ ఎన్నికల హడావుడి మొదలైంది. భారాస ఇప్పటికే తమ అభ్యర్థులను ప్రకటించింది. వివిధ పార్టీలు ప్రచారం, ప్రదర్శనల కోసం జెండాలను సిద్ధం చేసుకుంటున్నాయి. మరోవైపు ఎన్నికలతో కూలీలకు పరోక్షంగా ఉపాధి లభిస్తోంది. జనగామ- సిద్దిపేట రోడ్డులోని వంతెన వద్ద కొందరు కూలీలు ఓ పార్టీకి చెందిన జెండాలను కర్రలకు అమర్చుతూ ఉపాధి పొందుతున్నారు.

23/08/2023 09:13(IST)

విజయీభవ

చంద్రుని ఉపరితలంపై 23న చంద్రయాన్‌-3 రోవర్‌ సురక్షితంగా దిగాలని వీరఘట్టం మండలం తలవరం జడ్పీ ఉన్నత పాఠశాలలోని విద్యార్థులు ఆకాంక్షించారు. చంద్రయాన్‌-3 ఆకారంలో కూర్చొని ఇస్రో శాస్త్రవేత్తలకు శుభాకాంక్షలు తెలిపారు. అనంతరం గ్రామంలో ర్యాలీ నిర్వహించారు. హెచ్‌ఎం అప్పారావు, ఉపాధ్యాయులు ఉన్నారు.

23/08/2023 08:25(IST)

ఎందెందు వెతికినా.. జగన్‌ బొమ్మ ఉండాల్సిందే!

విజయవాడ ప్రభుత్వ ఆసుపత్రి ఆవరణలో ఉన్న సూపర్‌ స్పెషాల్టీ భవనం ప్రధాన ద్వారం వద్ద ముఖ్యమంత్రి జగన్‌మోహన్‌రెడ్డి ఫ్లెక్సీ పెట్టారు. ఆసుపత్రిలో నిత్యం వందలాదిగా రోగులు, వారి సహాయకులు రాకపోకలు సాగించే మార్గంలో జగన్‌ చిత్రంతో ఉన్న ఫ్లెక్సీ అతికించారు. రోగులకు ఇచ్చే ఓపీ చీటీపై జగన్‌ చిత్రం ముద్రించడమే కాక.. ఓపీ కోసం క్యూలో వేచి ఉండకుండా అభా యాప్‌ ద్వారా స్కాన్‌ చేసుకునే క్యూఆర్‌ కోడ్‌ వద్ద కూడా జగన్‌ చిత్రాలను ముద్రించారు. వైఎస్సార్‌ ఆరోగ్యశ్రీ హెల్ప్‌డెస్క్, కియోస్క్‌లు, కేంద్ర ప్రభుత్వ ఆయుష్మాన్‌ భారత్‌ ప్రచార కార్యక్రమంలో కూడా ఎక్కడ చూసినా జగన్‌ చిత్రాలే కనిపిస్తున్నాయి. విజయవాడ ప్రభుత్వ ఆసుపత్రిలో... ప్రభుత్వ పథకాలకే కాకుండా కొందరు అధికారులు అత్యుత్సాహంతో జగన్నామస్మరణ చేస్తున్నారని ఆసుపత్రికి వచ్చిన వారు గుసగుసలాడుకుంటున్నారు.

23/08/2023 08:24(IST)

చంద్రుడు అందే వేళ..

చంద్రయాన్‌3 బుధవారం జాబిల్లిపై ల్యాండ్‌ కానున్న సందర్భంగా చెన్నై కొళత్తూర్‌ ఏర్విన్‌ పాఠశాల విద్యార్థులు తమ ముఖంపై చంద్రుడిలా రంగులు పూసుకున్నారు. ఇంకా విద్యార్థులు చంద్రయాన్‌ రాకెట్, ల్యాండర్‌ నమూనాలు తయారుచేశారు.

23/08/2023 08:18(IST)

ప్రపంచ దేశాలకు ఆదర్శంగా నిలవాలి

చంద్రయాన్‌ 3 ప్రయోగం విజయవంతమై ప్రపంచ దేశాలకు ఆదర్శంగా నిలవాలని సైకత శిల్పి గేదెల హరికృష్ణ పేర్కొన్నారు. బుధవారం చంద్రయాన్‌ - 3 చంద్రుడిపైకి చేరాలని ఆకాంక్షిస్తూ సంగమేశ్వర దేవాలయ ఆవరణలో చంద్రయాన్‌- 3 సైకత శిల్పాన్ని వేశారు. దీనిని స్థానికులు ఆసక్తిగా తిలకించారు.

23/08/2023 08:17(IST)

డబుల్‌ డెక్కర్‌.. చక్కర్లు

నానక్‌రాంగూడ ఐటీ క్షేత్రంలో డబుల్‌ డెక్కర్‌ బస్సులు చక్కర్లు కొట్టాయి. ఆ బస్సులపై అవగాహన కల్పించేందుకు హెచ్‌ఎండీఏ అధికారులు లోయర్‌ ట్యాంక్‌బండ్‌ నుంచి నానక్‌రాంగూడ వేవ్‌రాక్‌ వరకు బస్సులు తిప్పుతున్నారు. ఆ విద్యుత్‌ వాహనాలు ఒకదాని వెంట ఒకటి వెళ్తుండగా అంతా ఆసక్తిగా చూస్తున్నారు.

23/08/2023 08:16(IST)

జై భజరంగబలి... జగమంతా మనతోనోయి..

చంద్రయాన్‌-3 విజయవంతం... 140 కోట్లకు పైగా భారతీయుల ఆకాంక్ష. నేటి క్షణం కోసం అంతా వేయి కళ్లతో ఎదురుచూస్తున్నారు. ఈ సందర్భంగా రాజమహేంద్రవరానికి చెందిన చిత్రకారుడు హరి తాడోజు గీసిన చిత్రమిది. భారతదేశం అత్యంత ప్రతిష్ఠాత్మకంగా చేపట్టిన చంద్రయాన్‌-3 చంద్రుడి ఉపరితలానికి సమీపించిన తరుణంలో భారతీయుల ఆకాంక్ష నెరవేరాలని... ఆ వాయు తనయుడే చంద్రయాన్‌ మిషన్‌ను క్షేమంగా చంద్రునిపై దించుతాడన్నట్లుగా చిత్రంతో చెప్పారు.

23/08/2023 08:16(IST)

పీసీబీ కార్యాలయానికీ వైకాపా రంగు దీపాలు

కర్నూలు నగరం లేబర్‌ కాలనీలో నిర్మించిన కాలుష్య నియంత్రణ మండలి జోనల్‌ కార్యాలయ (పీసీబీ) భవనాన్ని మంత్రి బుగ్గన రాజేంద్రనాథ్‌రెడ్డి మంగళవారం ప్రారంభించారు. ఈ భవనానికి వైకాపా రంగులు పోలిన విద్యుత్తు దీపాలతో అలంకరించడం గమనార్హం. దీనిపై నగరవాసులు విస్మయం వ్యక్తం చేస్తున్నారు. ఈ భవన నిర్మాణానికి గత తెదేపా ప్రభుత్వ హయాంలో రూ.16.44 కోట్లు మంజూరయ్యాయి. అప్పట్లో డిప్యూటీ సీఎం, రెవెన్యూ శాఖ మంత్రిగా ఉన్న కేఈ కృష్ణమూర్తి భవన నిర్మాణానికి భూమి పూజ చేశారు. ఎట్టకేలకు ప్రస్తుతం మంత్రి భవనాన్ని ప్రారంభించారు. దీనికి డాక్టర్‌ వైఎస్‌ఆర్‌ పర్యావరణ భవన్‌ అని పేరు పెట్టడం గమనార్హం.

23/08/2023 08:14(IST)

జాబిల్లి బాగుంది

యావత్‌ ప్రపంచం ఉత్కంఠగా ఎదురుచూస్తున్నవేళ- జాబిల్లి దక్షిణ ధ్రువం వద్ద సురక్షితంగా దిగి చరిత్ర సృష్టించేందుకు ‘చంద్రయాన్‌-3’లోని విక్రమ్‌ ల్యాండర్‌ సన్నద్ధమవుతోంది. ఈ నేపథ్యంలో విద్యార్థులకు అవగాహన కల్పించాలన్న ఉద్దేశంతో కర్నూలు ఎ.క్యాంపు మాంటిస్సోరి పాఠశాలలో ఏర్పాటు చేసిన చంద్రయాన్‌-3 నమూనా అందరినీ ఆకట్టుకుంది. చంద్రయాన్‌-3 ఎలా ప్రయోగించారు.. తదితర అంశాలు నమూనా ద్వారా విద్యార్థులకు వివరించారు.

23/08/2023 08:13(IST)

చంద్రుడిపై మెరవాలి... విజయంతో మురవాలి

చంద్రయాన్‌ రాకెట్‌ నమూనా చుట్టూ భారతదేశ పటం ఆకారంలో చిన్నారులు మానవహారంగా ఏర్పడి శాస్త్రవేత్తలకు శుభాకాంక్షలు తెలిపారు. మంగళవారం తుని మండలం హంసవరం ఆదర్శ పాఠశాలలో విద్యార్థులు ఈ ప్రక్రియను చేపట్టారు.