కొలెస్ట్రాల్‌ తగ్గేదెలా?

రక్తంలో కొలెస్ట్రాల్‌ ఎక్కువగా ఉందా? మందులేసుకోవటానికి వెనకాడుతున్నారా? అయితే ఆహార, వ్యాయామ నియమాలను ప్రయత్నించి చూడండి.

• కొద్ది కిలోలు ఎక్కువ బరువున్నా కొలెస్ట్రాల్‌ మోతాదులు పెరుగుతాయి. కాబట్టి బరువు అదుపులో ఉంచుకోవాలి. వారానికి కనీసం 150 నిమిషాల సేపు ఏరోబిక్‌ వ్యాయామాలు.. అంటే నడక, పరుగు, సైకిల్‌ తొక్కటం వంటివి చేయాలి.  
• నూనె వాడకం తగ్గించుకోవాలి. నెలకు అరలీటరు కన్నా మించనీయొద్దు. కుటుంబంలో నలుగురుంటే నెలకు 2 లీటర్ల కన్నా ఎక్కువ నూనె వాడొద్దన్నమాట. చిరుతిళ్లు మానెయ్యాలి. వనస్పతి వంటి ట్రాన్స్‌ ఫ్యాట్స్‌కు దూరంగా ఉండాలి.
• నీటిలో కరిగే పీచుతో కూడిన పదార్థాలు.. బార్లీ, అవిసె గింజలు, పచ్చి బఠానీల వంటి పప్పులు.. బీన్స్‌, ఎండు అంజీరా, ఖర్జూరం, బ్రోకలీ, క్యాబేజీ, చిలగడ దుంప, బత్తాయి, యాపిల్‌, క్యారెట్‌, మొక్కజొన్న వంటివి తినాలి.
• మానసిక ఒత్తిడి తగ్గించుకోవాలి. వారానికి కనీసం మూడు సార్లయినా యోగా, ధ్యానం చేయటం మంచిది.
• పొగ అలవాటుంటే మానెయ్యాలి. పొగ మానేస్తే మంచి కొవ్వు మోతాదులు పెరుగుతాయి. అదీ చాలా త్వరగా.

-ఇలాంటి జాగ్రత్తలతో మూడు నెలలు దాటినా ఎలాంటి ఫలితం కనిపించకపోతే వెంటనే మందులు వేసుకోవటం ఆరంభించాల్సిందే.