Breaking | Feedback | ePratibha | E-PAPER | Pratibha

Election Results: భాజపాదే త్రిపుర, నాగాలాండ్‌.. మేఘాలయలో హంగ్

మూడు ఈశాన్య రాష్ట్రాల్లో అసెంబ్లీ ఎన్నికల (Assembly elections 2023) ఫలితాలు వెలువడుతున్నాయి. త్రిపుర (tripura), నాగాలాండ్‌ (Nagaland)లో కాషాయ పార్టీ స్పష్టమైన ఆధిక్యం సంపాదించగా.. మేఘాలయ (Meghalaya)లో సంగ్మా పార్టీ హవా కొనసాగుతోంది. ఆ లైవ్‌ అప్‌డేట్స్‌ మీకోసం..

Updated : 02 Mar 2023 16:27 IST

02/03/2023 16:32(IST)

భాజపాదే త్రిపుర, నాగాలాండ్‌.. మేఘాలయలో హంగ్

మూడు ఈశాన్య రాష్ట్రాల ఎన్నికల ఫలితాలు వెలువడ్డాయి. త్రిపుర, నాగాలాండ్‌లో భాజపా మరోసారి అధికారాన్ని నిలబెట్టుకోగా.. మేఘాలయలో ఎవరికీ స్పష్టమైన ఆధిక్యం దక్కలేదు. సీఎం కాన్రాడ్‌ సంగ్మా నేతృత్వంలోని ఎన్‌పీపీ అతిపెద్ద పార్టీగా అవతరించింది. దీంతో అక్కడ హంగ్‌ ఏర్పడింది. తుది ఫలితాలు ఇలా..

త్రిపుర: భాజపా 33; కాంగ్రెస్‌-వామపక్షాలు 14; తిప్రా మోథా పార్టీ 13

నాగాలాండ్‌: ఎన్‌డీపీపీ-భాజపా 38; ఎన్‌పీపీ 4; ఎన్‌పీఎఫ్‌ 2; ఇతరులు 16

మేఘాలయ: ఎన్‌పీపీ 27; భాజపా 2; టీఎంసీ 5; కాంగ్రెస్‌ 5; ఇతరులు 20

02/03/2023 15:58(IST)

నాగాలాండ్‌లో ఇద్దరు మహిళల గెలుపు..

నాగాలాండ్‌ ఎన్నికలు ఈసారి సరికొత్త చరిత్ర లిఖించాయి. ఇప్పటివరకు ఒక్క మహిళ కూడా ఎమ్మెల్యేగా అసెంబ్లీలో అడుగుపెట్టని ఆ రాష్ట్రంలో తొలిసారి ఇద్దరు మహిళలు శాసనసభ ఎన్నికల్లో విజయం సాధించారు. దిమాపూర్‌ నుంచి ఎన్‌డీపీపీ అభ్యర్థి హెకానీ జఖాలు గెలుపొందగా.. పశ్చిమ అంగామీ స్థానం నుంచి మరో ఎన్‌డీపీపీ అభ్యర్థి సల్హౌతునొ క్రుసె జయకేతనం ఎగురవేశారు.

02/03/2023 15:09(IST)

త్రిపుర, నాగాలాండ్‌లో భాజపా జయకేతనం

ఈశాన్య రాష్ట్రాలు త్రిపుర, నాగాలాండ్‌లో మరోసారి భాజపా జయకేతనం ఎగురవేసింది. గురువారం వెలువడిన ఎన్నికల ఫలితాల్లో ఈ రెండు రాష్ట్రాల్లో భాజపా కూటమి ప్రభుత్వ ఏర్పాటుకు అవసరమైన మెజార్టీ సాధించింది. ఇప్పటివరకు వెలువడిన గణాంకాల ప్రకారం..

* త్రిపురలో మొత్తం 60 అసెంబ్లీ స్థానాలున్నాయి. ఇందులో భాజపా కూటమి 32 చోట్ల విజయం సాధించి.. మరో 3 స్థానాల్లో ఆధిక్యంలో కొనసాగుతోంది. కాంగ్రెస్‌-వామపక్షాల కూటమి 10 చోట్ల గెలుపొంది మరో 3 స్థానాల్లో ముందంజలో ఉంది. తిప్రా మోథా పార్టీ(టీఎంపీ) 11 స్థానాల్లో విజయం సాధించి మరో చోట ఆధిక్యంలో కొనసాగుతోంది.

* నాగాలాండ్‌లోనూ మొత్తం 60 అసెంబ్లీ నియోజకవర్గాలుండగా.. ఎన్‌డీపీపీ-భాజపా కూటమి 32 చోట్ల జయకేతనం ఎగురవేసి.. మరో 6 స్థానాల్లో ఆధిక్యంలో దూసుకెళ్తోంది. ఎన్‌పీఎఫ్‌ 2 చోట్ల గెలిచి 1 స్థానంలో ముందంజలో ఉంది. ఎన్‌పీపీ నాలుగు స్థానాలు దక్కించుకుంది. మరో 15 స్థానాలు ఇతరుల ఖాతాల్లోకి వెళ్లాయి.

02/03/2023 14:22(IST)

తుది ఫలితాలు వచ్చాకే నిర్ణయం: సంగ్మా

మేఘాలయ అసెంబ్లీ ఎన్నికల ఫలితాల్లో నేషనల్‌ పీపుల్‌ పార్టీ దూసుకెళుతోంది. ఇప్పటి వరకు 17 చోట్ల విజయం సాధించిన ఆ పార్టీ.. మరో 11 స్థానాల్లో ఆధిక్యంలో కొనసాగుతోంది. అయితే, మ్యాజిక్‌ ఫిగర్‌ (31) కాస్త దూరంలో నిలవనుంది. ఈ నేపథ్యంలో మేఘాలయ సీఎం కన్రాడ్‌ సంగ్మా స్పందించారు. తుది ఫలితాలు వెలువడ్డాకే తమ నిర్ణయాన్ని ప్రకటిస్తామని చెప్పారు. ఎన్నికల్లో తమ పక్షాన నిలిచినందుకు ఓటర్లకు ధన్యవాదాలు తెలిపారు. కాగా.. హంగ్‌ వస్తుందన్న ఎగ్జిట్‌ పోల్స్‌ అంచనాల అనంతరం అస్సాం సీఎం హిమంత బిశ్వశర్మతో (BJP) సంగ్మా చర్చలు జరిపారు. 2018 ఎన్నికల్లోనూ భాజపా, యూడీపీ మద్దతుతో సంగ్మా ప్రభుత్వాన్ని ఏర్పాటు చేశారు.

02/03/2023 13:55(IST)

మేం ప్రజల విశ్వాసాన్ని గెలుస్తున్నాం: కిరణ్‌ రిజిజు

ఈశాన్య రాష్ట్రాల అసెంబ్లీ ఎన్నికల ఫలితాలపై కేంద్ర మంత్రి కిరణ్‌ రిజిజు స్పందించారు. ‘‘ఈశాన్యంలో భాజపా గెలుస్తోందంటే.. దానికి కారణం ప్రధాని మోదీ పథకాలు ప్రజలకు చేరువవుతున్నాయి. మేం ఎన్నికల్లో గెలుస్తున్నామంటే ప్రజల్లో విశ్వాసాన్ని సాధిస్తున్నాం. ఈశాన్యంలో అన్ని చోట్లా భాజపా ప్రభంజనం కొనసాగుతుంది’’ అని రిజిజు హర్షం వ్యక్తం చేశారు.

02/03/2023 13:44(IST)

మహారాష్ట్ర ఉప ఎన్నికల్లో భాజపాకు గట్టి షాక్‌..

మహారాష్ట్రలో రెండు స్థానాలకు జరిగిన ఉప ఎన్నికల ఫలితాలు గురువారం వెలువడుతున్నాయి. కస్బా పీఠ్‌ శాసనసభ స్థానంలో భాజపాకు గట్టి షాక్‌ తగిలింది. ఇక్కడ మహా వికాస్‌ అఘాడీ కూటమి నుంచి కాంగ్రెస్‌ అభ్యర్థి రవీంద్ర ధంగేకర్‌ విజయం సాధించారు. ఈ స్థానంలో దాదాపు మూడు దశాబ్దాలుగా కాషాయ పార్టీ అధికారంలో ఉండగా.. ఇప్పుడు భాజపా ఆ సీటును కోల్పోయింది. ఇక పుణె జిల్లాలో చించ్వాడ ఉప ఎన్నిక ఫలితాల్లో భాజపా ఆధిక్యంలో కొనసాగుతోంది.

02/03/2023 13:29(IST)

నాగాలాండ్‌లో సరికొత్త చరిత్ర.. అసెంబ్లీ ఎన్నికల్లో తొలి మహిళ గెలుపు

ఈశాన్య రాష్ట్రం నాగాలాండ్‌లో సరికొత్త చరిత్ర. 60 ఏళ్ల తర్వాత ఆ రాష్ట్రంలో ఓ మహిళ తొలిసారిగా అసెంబ్లీలోకి అడుగుపెట్టబోతున్నారు. తాజాగా వెలువడుతున్న అసెంబ్లీ ఎన్నికల ఫలితాల్లో ఎన్‌డీపీపీ అభ్యర్థి హెకానీ జఖాలు దిమాపూర్‌ స్థానం నుంచి విజయం సాధించారు. నాగా అసెంబ్లీ ఎన్నికల్లో ఓ మహిళ గెలుపొందడం ఇదే తొలిసారి.

02/03/2023 12:11(IST)

నాగాలాండ్‌, త్రిపురలో కాషాయ రెపరెపలు.. మేఘాలయలో సంగ్మా దూకుడు

ఈశాన్య రాష్ట్రాల ఎన్నికల ఫలితాలు వెలువడుతున్నాయి. త్రిపుర, నాగాలాండ్‌లో మరోసారి భాజపా అధికారంలోకి వచ్చే అవకాశాలు స్పష్టంగా కన్పిస్తున్నాయి. ఈ రాష్ట్రాల్లో భాజపా కూటమి స్పష్టమైన ఆధిక్యం సాధించింది. ఇక మేఘాలయలో సీఎం కాన్రాడ్‌ సంగ్మా నేతృత్వంలోని ఎన్‌పీపీ అతిపెద్ద పార్టీగా అవతరిస్తోంది.

పూర్తి వార్త కోసం క్లిక్‌ చేయండి

02/03/2023 11:16(IST)

త్రిపుర సీఎం మాణిక్‌ సాహా జయకేతనం

త్రిపుర సీఎం మాణిక్‌ సాహా విజయం సాధించారు. బోర్దోవలి నియోజకవర్గం నుంచి ఆయన గెలుపొందారు. సీపీఎంకు చెందిన సమీప ప్రత్యర్థి ఆశిష్‌కుమార్‌ సాహాపై ఆయన జయకేతనం ఎగురవేశారు.

02/03/2023 10:53(IST)

త్రిపురలో ఉపముఖ్యమంత్రి వెనుకంజ..

త్రిపుర అసెంబ్లీ ఎన్నికల ఫలితాలు వెలువడుతున్నాయి. చారిలమ్‌ స్థానంలో ఉపముఖ్యమంత్రి జిష్ణు దేవ్‌ వర్మ 1000 ఓట్ల వెనుకంజలో ఉన్నారు. ఇక్కడ తిప్రా మోథా అభ్యర్థి సుబోధ్‌ దేవ్‌ వర్మ ఆధిక్యంలో కొనసాగుతున్నారు.

02/03/2023 10:49(IST)

ఉప ఎన్నికల ఫలితాలు ఇలా..

మూడు ఈశాన్య రాష్ట్రాల అసెంబ్లీ ఎన్నికలతో పాటు పలు రాష్ట్రాల్లో కొన్ని అసెంబ్లీ స్థానాలకు ఉప ఎన్నికలు ఫలితాలు కూడా గురువారమే వెలువడుతున్నాయి. ఆ స్థానాల్లో ఫలితాల సరళి ఇలా ఉంది..

* మహారాష్ట్రలోని పుణె జిల్లా కస్బా స్థానంలో కాంగ్రెస్‌ ఆధిక్యంలో ఉంది. చించ్వాడ స్థానంలో భాజపా ముందంజలో కొనసాగుతోంది.

* తమిళనాడులోని ఈరోడ్ తూర్పు ఉప ఎన్నిక స్థానంలో కాంగ్రెస్‌ అభ్యర్థి ఆధిక్యంలో ఉన్నారు.

* పశ్చిమ బెంగాల్‌లోని సాగర్‌దిగి ఉప ఎన్నిక స్థానంలో కాంగ్రెస్‌ ముందంజలో ఉంది.

02/03/2023 10:35(IST)

త్రిపురలో ‘తిప్రా’ కింగ్‌మేకర్‌ కానుందా..?

త్రిపుర ఎన్నికల ఫలితాలు రసవత్తరంగా మారుతున్నాయి. ఇప్పటివరకు వెలువడిన ఫలితాల ప్రకారం ఇక్కడ ఏ పార్టీకి స్పష్టమైన ఆధిక్యం లభించలేదు. భాజపా కూటమి 26 చోట్ల, కాంగ్రెస్‌-వామపక్షాల కూటమి 20 స్థానాల్లో ముందంజలో కొనసాగుతోంది. ప్రభుత్వాన్ని ఏర్పాటు చేయాలంటే మెజార్టీ మార్క్‌ 31. త్రిపురాధీశుడు ప్రద్యోత్‌దేవ్‌ వర్మకు చెందిన తిప్రా మోథా పార్టీ (టీఎంపీ) 12 స్థానాల్లో ఆధిక్యంలో ఉంది. దీంతో త్రిపురలో ‘తిప్రా’ కింగ్‌ మేకర్‌ అయ్యే అవకాశాలు కన్పిస్తున్నాయి.

02/03/2023 10:17(IST)

నాగాలాండ్‌, త్రిపురలో భాజపా హవా.. హంగ్‌ దిశగా మేఘాలయ

మూడు ఈశాన్య రాష్ట్రాల్లో ఓట్ల లెక్కింపు కొనసాగుతోంది. ఇప్పటి వరకు వెలువడిన ఫలితాల ప్రకారం.. త్రిపుర, నాగాలాండ్‌లో భాజపా (BJP) హవా కొనసాగుతుండగా.. మేఘాలయ ఫలితం మాత్రం హంగ్ దిశగా ఉంది.

పూర్తి వార్త కోసం క్లిక్‌ చేయండి

02/03/2023 09:40(IST)

నాగాలాండ్‌లో స్పష్టమైన ఆధిక్యంలో భాజపా కూటమి

నాగాలాండ్‌లో భాజపా-ఎన్‌డీపీపీ కూటమి హవా కొనసాగుతోంది. ఇప్పటివరకు వెలువడిన ఫలితాల ప్రకారం ఈ కూటమికి స్పష్టమైన ఆధిక్యం లభించింది. ప్రస్తుతం భాజపా-ఎన్‌డీపీపీ కూటమి ఒక స్థానంలో విజయం సాధించగా.. మరో 48 చోట్ల ఆధిక్యంలో కొనసాగుతోంది. ఎన్‌పీఎఫ్‌ 6, కాంగ్రెస్‌ 1, ఎన్‌పీపీ 3, ఇతరులు ఒక స్థానంలో ముందంజలో ఉన్నారు. నాగాలాండ్‌లో ప్రభుత్వ ఏర్పాటుకు 31 స్థానాలు అవసరం.

02/03/2023 08:03(IST)

ప్రారంభమైన ఓట్ల లెక్కింపు

త్రిపుర, మేఘాలయ, నాగాలాండ్‌ అసెంబ్లీ ఎన్నికల ఓట్ల లెక్కింపు ప్రారంభమైంది. 8 గంటల కు ప్రారంభమైన కౌంటింగ్‌లో తొలుత పోస్టల్‌ బ్యాలెట్‌ ఓట్లను లెక్కిస్తున్నారు. లెక్కింపు కేంద్రాల వద్ద పటిష్ఠ బందోబస్తు ఏర్పాట్లు చేశారు.

02/03/2023 06:53(IST)

కాసేపట్లో ప్రారంభం కానున్న కౌంటింగ్‌

త్రిపుర, మేఘాలయ, నాగాలాండ్‌ ఎన్నికల కౌంటింగ్‌ కాసేపట్లో ప్రారంభం కానుంది. ఉదయం 8 గంటల నుంచి ఓట్లను లెక్కించనున్నారు. ఈ మూడు రాష్ట్రాల్లో 60 చొప్పున అసెంబ్లీ స్థానాలున్నాయి. నాగాలాండ్‌, మేఘాలయల్లో ఇప్పటికే ఒక్కో అసెంబ్లీ సీటు ఏకగ్రీవమయ్యాయి. నాగాలాండ్‌లో 59 స్థానాలకు ఎన్నికలు జరగ్గా.. 4 పోలింగ్‌ స్టేషన్లలో రీపోలింగ్‌కు ఎన్నికల సంఘం ఆదేశించింది. బుధవారం ఈ స్టేషన్లలో రీపోలింగ్‌ జరిగింది. నాగాలాండ్‌లో ఎన్నికలు నిర్వహించిన 59 సీట్లకు 183 మంది పోటీ పడ్డారు. మేఘాలయలో 59 స్థానాలకు ఎన్నికలు నిర్వహించారు. త్రిపురలో ఫిబ్రవరి 16న పోలింగ్‌ జరిగింది. ఎన్నికల్లో 259 మంది పోటీ పడ్డారు.

01/03/2023 20:04(IST)

మేఘాలయలో కన్రాడ్‌ సంగ్మానే...

మేఘాలయలో మాత్రం కన్రాడ్‌ సంగ్మా సారథ్యంలోని ఎన్‌పీపీకే ప్రజలు పట్టంకట్టబోతున్నట్టు ఎగ్జిట్‌ పోల్స్‌ పేర్కొంటున్నాయి. ఎన్‌పీపీనే అతిపెద్ద పార్టీగా అవతరిస్తుందని చెబుతున్నాయి. త్రిపురలో లెఫ్ట్‌-కాంగ్రెస్‌ కూటమికి కనిష్ఠంగా 6 గరిష్ఠంగా 18-24సీట్లు వచ్చే అవకాశం ఉన్నట్టు పలు సర్వే సంస్థలు పేర్కొంటున్నాయి.

01/03/2023 20:03(IST)

త్రిపుర, నాగాలాండ్‌లో మళ్లీ కమల వికాసమే..!: ఎగ్జిట్‌ పోల్స్‌

మూడు ఈశాన్య రాష్ట్రాల్లో అసెంబ్లీ ఎన్నికల (Assembly elections 2023)సమరం ముగిసింది. త్రిపుర(tripura), మేఘాలయ(Meghalaya), నాగాలాండ్‌(Nagaland)లలో కలిపి మొత్తంగా 180 సీట్లకు ఎన్నికలు జరగ్గా.. పలు సర్వే సంస్థలు ఎగ్జిట్‌ పోల్స్‌ అంచనాలను వెలువరించాయి. త్రిపుర, నాగాలాండ్‌ రాష్ట్రాల్లో భాజపా కూటమే మళ్లీ అధికారంలోకి వస్తుందని పలు సర్వే సంస్థలు అంచనా వేస్తున్నాయి.