గగన్‌యాన్‌: వ్యోమగాముల శిక్షణ తిరిగి ప్రారంభం

మాస్కో: భారత్‌ ప్రతిష్టాత్మకంగా తలపెట్టిన తొలి మానవసహిత అంతరిక్ష యాత్ర గగన్‌యాన్‌ కోసం ఎంపికైన నలుగురు వ్యోమగాముల శిక్షణను రష్యాలో తిరిగి ప్రారంభించారు. కరోనా వ్యాప్తి నేపథ్యంలో మార్చి చివర్లో వ్యోమగాముల శిక్షణకు తాత్కాలికంగా విరామం ప్రకటించగా... ఈ శిక్షణ మళ్లీ ప్రారంభమైందని రష్యన్‌ స్పేస్‌ ఏజెన్సీ రోస్కోస్మోస్‌ వెల్లడించింది. ఇస్రోతో కుదుర్చుకున్న ఒప్పందం మేరకు వ్యోమగాములకు శిక్షణ ప్రారంభించినట్లు రోస్కోస్మోస్‌ తెలిపింది. నలుగురు భారతీయ వ్యోమగాములు ఆరోగ్యంగా ఉన్నారని వెల్లడించింది. జీసీటీసీలో కరోనా వ్యాప్తి చెందకుండా అన్ని నిబంధనలు పాటిస్తున్నామని, భౌతిక దూరం, పరిశుభ్రత చర్యలు తీసుకుంటున్నామని తెలిపింది. ఈ సందర్భంగా శిక్షణ పొందుతున్న భారత వ్యోమగామి ఫొటోను విడుదల చేసింది.