ముగ్గురూ ఒక్కరే!

మన గురించి పరలోకంలో సాక్ష్యమిచ్చేవారు ముగ్గురున్నారు. వారెవరంటే తండ్రి, కుమారుడు, పరిశుద్ధాత్మ. నిజానికి ఈ ముగ్గురూ ఒక్కరే. వీరు దైవికంగా సమాన తెలివి, విజ్ఞత ఉన్నవారు. వీరి మధ్య హెచ్చుతగ్గులు లేవు. అది ఎలాగంటే.. పంఖాకు మూడు రెక్కలు ఉన్నప్పటికీ.. అది తిరిగేటప్పుడు ఒక్కటిగానే గోచరిస్తుంది. అలాగే ఈ ముగ్గురూ సమానమైన దైవాంశసంభూతులు. వీరెవ్వరినీ ఒకరు సృజించలేదు. వీరికి మరణం కూడా లేదు. ముగ్గురూ సర్వవ్యాపితమైన వారు, మహాజ్ఞానులు, సర్వజ్ఞత కలిగిన వారు. అందువల్లే ప్రభువు తన శిష్యులకు తండ్రి. కుమార, పరిశుద్ధాత్మ- అంటూ బాప్తిజమ్‌ ఇవ్వాలని చెప్పాడు. వీరిని మనం విభజించి చూడలేం. కనుక ముగ్గురిగా కలిసున్న దైవాన్నే ఆరాధించాలి. ప్రాణం, దేహం, ఆత్మ.. అనేది దీనికి పోలికగా ఉన్నాయని ఈ సందర్భంలో గుర్తుచేసుకోవాలి. ఈ అంశాన్ని అర్థం చేసుకుని హృదయపూర్వకంగా ప్రార్థించి పరలోక ప్రాప్తి పొందాలి.

పి.అవనీశ్‌