స్థిరాస్తుల ధరల్లో సగటున 10 శాతం వృద్ధి

క్రెడాయ్‌- కొలియర్స్‌ నివేదిక
ఈనాడు, హైదరాబాద్‌

ఇళ్ల ధరలు ఈ ఏడాది మొదటి త్రైమాసికంలో దేశంలోని ఎనిమిది ప్రధాన నగరాల్లో 10 శాతం దాకా వార్షిక పెరుగుదల నమోదైంది. ఇళ్ల విక్రయాలు బాగుండటంతో ధరల్లో వృద్ధి కన్పిస్తోందని మార్కెట్‌ వర్గాలు అంటున్నాయి. పెరుగుదల తక్కువలో తక్కువ 4 శాతం ఉంటే.. గరిష్ఠంగా 19 శాతం పెరిగాయి అని క్రెడాయ్, కొలియర్స్‌ ఇండియా నివేదిక వెల్లడించింది. విలాసవంతమైన ఇళ్లకు డిమాండ్‌ పెరగడం, మౌలిక వసతుల ప్రాజెక్టులు రాబోతుండటం, కొత్త నివాస ప్రాజెక్ట్‌ల ప్రారంభాలతో ధరల్లో వృద్ధి కన్పించిందని నివేదికలో తెలిపింది.

• బెంగళూరులో స్థిరాస్తుల ధరలు భారీగా పెరిగాయి. ఇక్కడ పెరుగుదల అత్యధికంగా 19 శాతం ఉంది. ఈ ఏడాది జనవరి నుంచి మార్చి త్రైమాసికంలో సగటు చదరపు అడుగు ధర రూ.10,377గా ఉంది. గత ఏడాది ఇదే సమయంలో చ.అ.ధర రూ.8,748 మాత్రమే. 
• ధరల పెరుగుదల పరంగా బెంగళూరు తర్వాత దిల్లీ, హైదరాబాద్, పుణె నగరాలు ఉన్నాయి. 
• దిల్లీ రాజధాని ప్రాంతంలో పెరుగుదల 16 శాతంగా ఉంది. ఇక్కడ చ.అ.రూ.9,757కి పెరిగింది. 
• అహ్మదాబాద్, పుణెలలో 13 శాతం ధరలు పెరిగాయి. ఇక్కడ చ.అ. ధర రూ.7,156, రూ.9,448గా ఉన్నాయి. 
• ముంబయిలో చ.అ. ధర రూ.20,361గా ఉంది. ఇక్కడ 6 శాతం ధరలు పెరిగాయి. 
• కోల్‌కతాలో ఏడు శాతం ధరలు పెరిగాయి. చ.అ.ధర రూ.7727కి చేరింది. 
• చెన్నైలో చదరపు అడుగు ధర రూ.7710గా ఉంది. ఇక్కడే అతి తక్కువగా 4 శాతం పెరిగాయి. 

హైదరాబాద్‌లో ఇలా.. 

సిటీలో ధరలు గత ఏడాది మొదటి త్రైమాసికంతో పోలిస్తే ఈసారి 9 శాతం పెరిగాయి. ఇక్కడ చదరపు అడుగు ధర రూ.11,323కి చేరిందని క్రెడాయ్‌-కొలియర్స్‌ నివేదిక పేర్కొంది.