Andhra News: అమరావతి నిర్మాణంపై కదలిక!

త్వరలో ఏఐఎస్‌, ఎమ్మెల్యే క్వార్టర్ల పనులు ప్రారంభం

ఈనాడు, అమరావతి: హైకోర్టు తీర్పు నేపథ్యంలో అమరావతి నిర్మాణ పనుల్లో కొంత కదలిక వచ్చింది. మూడొంతులు పూర్తయిన ఏఐఎస్‌, ఎమ్మెల్యే, ఎమ్మెల్సీల నివాస సముదాయాల నిర్మాణ పనులు తిరిగి ప్రారంభం కానున్నాయి. ఈ మేరకు ప్రభుత్వం గ్రీన్‌ సిగ్నల్‌ ఇచ్చినట్లు తెలిసింది. వీటిని ఈ ఏడాది నవంబరు నాటికి పూర్తి చేయాలని లక్ష్యంగా నిర్దేశించుకున్నారు. ఇప్పటికే బ్యాంకుల కన్సార్షియం నుంచి ఓ విడత రుణం అందింది. మిగిలిన మొత్తం త్వరలో రానుంది. గుత్తేదారుకు ఒకటి, రెండు రోజుల్లో బకాయిలు చెల్లించనున్నారు. తక్కువ నిధులతో పూర్తయ్యే నిర్మాణాలపై తొలుత సీఆర్‌డీఏ దృష్టి సారిస్తోంది. ఇందులో భాగంగా వీటి పనులను తిరిగి ప్రారంభించనుంది. పనులు తిరిగి ప్రారంభించాలని సీఆర్‌డీఏ నిర్ణయించినందున ఇప్పటికే తుది విడత రుణం కోసం కన్సార్షియంకు లేఖ రాశారు. రూ.200 కోట్లు ఇచ్చేందుకు కన్సార్షియం ముందుకొచ్చింది. ఇందులో ఇప్పటికే రూ.95 కోట్ల వరకు వచ్చాయి. ఈ మొత్తంలో నుంచి పెండింగ్‌ బిల్లులను చెల్లించనున్నారు. త్వరలో మిగిలిన రూ.105 కోట్లు అందనుందని అధికారులు భావిస్తున్నారు. ఈ నిధులతో ప్రస్తుతం పనుల వేగం పెంచాలని నిర్ణయించారు. ఇచ్చే రుణం అఖిల భారత సర్వీసు అధికారులు, ఎమ్మెల్యే, ఎమ్మెల్సీల క్వార్టర్లకే సరిపోతుంది. మిగిలిన టైప్‌ 1, 2, నాలుగో తరగతి ఉద్యోగుల నివాస సముదాయాల నిర్మాణాలు 65 శాతం పూర్తయ్యాయి. వీటి పనులు తిరిగి ప్రారంభించేందుకు మరో మార్గంలో రుణం కోసం సీఆర్‌డీఏ అధికారులు ప్రయత్నాలు చేస్తున్నారు.