SBI: రుణాలు, ఎఫ్‌డీలపై వడ్డీ రేట్లను పెంచిన ఎస్‌బీఐ

దిల్లీ: ఆర్‌బీఐ రెపో రేటును 6.50 శాతానికి (25 బేసిస్‌ పాయింట్ల) పెంచిన తర్వాత.. ఫిబ్రవరి 15 నుంచి MCLR, గృహ రుణ వడ్డీ రేట్లను పెంచుతున్నట్టు స్టేట్‌ బ్యాంక్‌ ఆఫ్‌ ఇండియా (SBI) ప్రకటించింది. ఎస్‌బీఐ వెబ్‌సైట్‌ ప్రకారం.. ఒక నెల, 3 నెలలకు MCLR 8% నుంచి 8.10%కు పెంచింది. ఒక సంవత్సరం MCLR 8.50%కు పెంచింది. వాహన, గృహ, వ్యక్తిగత రుణాలు సహా వినియోగదారుల రుణాల్లో ఎక్కువ భాగం MCLRతో ముడిపడి ఉంటాయి. ఎస్‌బీఐ వెబ్‌సైట్‌ ప్రకారం 800 లేదా అంతకంటే ఎక్కువ క్రెడిట్‌ స్కోర్‌ ఉన్న వారికి ప్రామాణిక గృహ రుణ వడ్డీ రేటు కనిష్ఠంగా 9.15%గా ఉంది. 750-799 మధ్య క్రెడిట్‌ స్కోరు ఉన్న రుణగ్రహీతలకు వడ్డీ రేటు 9.25% శాతంగా ఉంది. 700-749 మధ్య స్కోరు వారి వడ్డీ రేటు 9.35% శాతంగా ఉంది. 650-699 మధ్య క్రెడిట్‌ స్కోరు వారికి వడ్డీ రేటు 9.45%. మహిళా రుణ గ్రహీతలకు గృహ రుణాలపై 0.05% తగ్గింపు ఉంటుంది.

ఎఫ్‌డీలపై వడ్డీ రేట్లు

రూ.2 కోట్లలోపు ఎఫ్‌డీలపై వడ్డీ రేట్లను 25 బీపీఎస్‌ వరకు ఎస్‌బీఐ పెంచింది. అలాగే, బ్యాంకు 400 రోజుల నిర్దిష్ట కాలవ్యవధి ఎఫ్‌డీ పథకాన్ని ప్రవేశ పెట్టింది. ఈ పథకానికి 7.10% వడ్డీ రేటును అందిస్తోంది. ఈ పథకం 2023 మార్చి 31 వరకు చెల్లుబాటులో ఉంటుంది. 7 రోజుల నుంచి 10 సంవత్సరాల కాలవ్యవధి గల ఎఫ్‌డీలపై 3% నుంచి 7% వరకు వడ్డీని అందిస్తోంది. 2-3 సంవత్సరాల మధ్య కాలానికి ఎఫ్‌డీ చేసిన సీనియర్‌ సిటిజన్లు 7.50% వడ్డీ పొందుతారు. సీనియర్‌ సిటిజన్లకు ఎస్‌బీఐ అందించే అత్యధిక వడ్డీ రేటు ఇదే. ఈ వడ్డీ రేట్లు ఫిబ్రవరి 15 నుంచి అమల్లోకి వస్తాయి.