విలేకరిపై శ్రీకాళహస్తి ఆలయ పాలకమండలి సభ్యుడి దాడి

తిరుపతి, న్యూస్‌టుడే: శ్రీకాళహస్తీశ్వరాలయ పాలకమండలి సభ్యుడు బుల్లెట్‌ జయ శ్యామ్‌ స్థానిక రాజ్‌ న్యూస్‌ విలేకరి ఈశ్వర్‌పై దాడికి పాల్పడిన ఘటన తిరుపతి జిల్లాలో సోమవారం చోటుచేసుకుంది. శ్రీకాళహస్తికి సమీపంలోని రాజీవ్‌నగర్‌ కాలనీ వద్ద తన ఇంటి స్థలాన్ని జయశ్యామ్‌ కబ్జా చేసి, పునాదులు వేశారని ఈశ్వర్‌ ఆరోపించారు. ఇదేం న్యాయమని ప్రశ్నించడంతో జయశ్యామ్‌ దుర్భాషలాడుతూ దాడికి దిగారు. ఇందుకు సంబంధించిన వీడియో సామాజిక మాధ్యమాల్లో చక్కర్లుకొట్టింది. ఇటీవల తెదేపా రాష్ట్ర కార్యదర్శి చలపతినాయుడుపై దాడికి పాల్పడిన జయశ్యామ్‌.. తాజాగా విలేకరిపైనా దురుసుగా ప్రవర్తించడం చర్చనీయాంశంగా మారింది.