భర్త మద్దతుగా మాట్లాడలేదని వివాహిత ఆత్మహత్య

 జయశ్రీ (పాతచిత్రం)

గొట్టిపాడు(ప్రత్తిపాడు), న్యూస్‌టుడే: కుటుంబంలో చోటుచేసుకున్న చిన్న గొడవ ఓ నిండు ప్రాణాన్ని బలితీసుకుంది. పోలీసులు తెలిపిన వివరాల మేరకు తాడికొండ మండలం బండారుపల్లి గ్రామానికి చెందిన చుండ్రు జయశ్రీ, ప్రత్తిపాడు మండలం గొట్టిపాడు గ్రామానికి చెందిన శివరామకృష్ణకు 10 ఏళ్ల కిందట వివాహమైంది. వీరికి ఒక కుమారుడు, కుమార్తె ఉన్నారు. ఈ నెల 26వ తేదీ రాత్రి పిల్లలు అన్నం తినకుండా మారం చేస్తుంటే జయశ్రీ వారిని కొట్టింది. అత్తామామ కలుగజేసుకుని ప్రశ్నించారు. ఈ క్రమంలో భర్త తనకు మద్దతుగా మాట్లాడలేదని మనస్తాపానికి గురైన జయశ్రీ అదే రోజు అర్ధరాత్రి దాటాక పురుగుల మందు తాగింది. గమనించిన కుటుంబ సభ్యులు ఆమెను గుంటూరులోని ప్రయివేటు ఆసుపత్రికి తరలించగా అక్కడ చికిత్స పొందుతూ ఆదివారం ఉదయం మృతి చెందింది. మృతురాలి తల్లి శ్రీదేవి ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై సోమేశ్వరరావు వెల్లడించారు.