నకిలీ పత్రాలతో నిలువుదోపిడీ

జప్తు చేసుకున్న నగదు పరిశీలిస్తున్న పోలీస్‌ కమిషనర్‌ దయానంద్‌

బెంగళూరు (మల్లేశ్వరం), న్యూస్‌టుడే : ఒకే ఇంటి స్థలానికి లెక్కలేనన్ని నకిలీ పత్రాలు సిద్ధం చేసి వాటిని 22 బ్యాంకుల్లో కుదువ పెట్టి రూ.10 కోట్లకు పైగా రుణాన్ని తీసుకున్న ఆరుగురు వంచకులను బెంగళూరు జయనగర ఠాణా పోలీసులు శుక్రవారం అరెస్టు చేశారు. వీరిలో ఐదుగురు ఒకే కుటుంబానికి చెందిన వారు. వంట పనిచేసే నాగేశ్‌ భరద్వాజ్‌, అతని భార్య సుమ, ఆమె అక్క వేద, బావ శేషగిరి, తమ్ముడు సతీశ్‌, వారి స్నేహితురాలు వేదవతిని నిందితులుగా గుర్తించారు. వీరికి రుణం మంజూరు చేసిన బ్యాంకు సిబ్బంది, సబ్‌ రిజిస్ట్రార్‌ కార్యాలయాల సిబ్బందిని విచారిస్తామని నగర పోలీసు కమిషనర్‌ బి.దయానంద్‌ తెలిపారు. తీసుకున్న రుణంతో ఒక ఇంటి స్థలం, ఇంటినీ కొనుగోలు చేసుకున్నారని గుర్తించామని చెప్పారు. వీరి నివాసాల నుంచి కొంత నగదు జప్తు చేసుకున్నారు. యంత్రోపకరణాల కొనుగోలుకు రూ.1.3 కోట్ల రుణం తీసుకుని, దాన్ని చెల్లించకుండా మరోసారి రుణం తీసుకునేందుకు జయనగర మూడో బ్లాక్‌లోని ఒక కోఆపరేటివ్‌ బ్యాంకును వీరు సంప్రదించారు. అక్కడి అధికారికి అనుమానం వచ్చి పోలీసులకు సమాచారం అందించడంతో వీరి వంచనలు వెలుగులోకి వచ్చాయని దయానంద్‌ తెలిపారు. వీరిని న్యాయమూర్తి ముందు హాజరుపరచి.. న్యాయనిర్బంధానికి పంపించామని చెప్పారు.