Train: ఒకే ట్రాక్‌పై మూడు రైళ్లు: తప్పిన ఘోర ప్రమాదం

కటక్, న్యూస్‌టుడే: సుందర్‌గఢ్‌ జిల్లాలోని రవుర్కెలా రైల్వే స్టేషన్‌ సమీపంలో బుధవారం వందేభారత్‌ ఎక్స్‌ప్రెస్‌తో సహా రెండు ప్యాసింజర్‌ రైళ్లు ఒకే ట్రాక్‌పైకి వచ్చినా అదృష్టవశాత్తూ ఎలాంటి ప్రమాదం జరగలేదు. సంబల్‌పూర్‌-రవుర్కెలా మెము రైలు, రవుర్కెలా-ఝార్సుగూడ పాసింజర్‌ రైలు 100 మీటర్ల దూరంలో ఒకే లైన్లో ఎదురెదురుగా వచ్చాయి. మూడో రైలు పూరీ-రవుర్కెలా వందే భారత్‌ ఎక్స్‌ప్రెస్‌ ఇదే ట్రాక్‌పై ప్రయాణిస్తోంది. మెము-పాసింజరు రైళ్లు వంద మీటర్ల దూరంలో నిలిచిపోవడంతో ప్రమాదం జరగలేదు. రవుర్కెలా రైల్వే స్టేషనుకు కేవలం 200 మీటర్ల దూరంలో ఈ ఘటన జరిగింది. రైల్వే సిగ్నలింగ్‌ వ్యవస్థలో లోపం వల్లే ఈ ఘటన జరిగినట్లు అనుమానిస్తున్నారు. రైల్వే అధికారులు ఈ ఘటనపై స్పందించలేదు.