ప్రభుత్వ లాంఛనాలతో డొంబురు ధర దహన సంస్కారాలు

రాయగడ గ్రామీణం: మాజీ మంత్రి కాంగ్రెస్‌ నాయకుడు డొంబురు ధర ఉలక(87)దహన సంస్కారాల కార్యక్రమం గురువారం సాయంత్రం ప్రభుత్వ లాంఛనాలతో ఆయన స్వగ్రామం బంకిలిలో జరిగింది. ఉలక రాజధాని భువేనేశ్వర్‌లో ఒక ప్రేవేట్ ఆసుపత్రిలో మంగళవారం రాత్రి ఆయన మృతి చెందిన విషయం తెలిసిందే. అంతకు ముందు ఉలక మృత దేహానికి పీసీసీ కార్యాలయంలో పార్టీ నేతలు జాతీయ పతాకం కప్పి పూలమాలలు వేసి పార్టీ సీనియర్ నాయకులు శ్రద్ధాంజలి ఘటించారు. బంకిలిలో  పోలీసులు 3 రౌండ్లు గాల్లోకి కాల్పులు జరిపి గౌరవ వందనం అనంతరం మృతుడు డొంబురు ధర కుమారుడు నీల మాధవ దహన సంస్కారాలు జరిపారు. ఈ కార్యక్రమానికి ఉలక అన్న కుమారుడు కొరాపుట్ ఎంపీ సప్తగిరి ఉలక తోపాటు జిల్లాకు చెందిన పార్టీ సీనియర్ నాయకులు పాల్గొన్నారు.