ప్రధానోపాధ్యాయుడికి 47 ఏళ్ల జైలు

సైదాపేట, న్యూస్‌టుడే: లైంగిక వేధింపులకు పాల్పడిన ప్రధానోపాధ్యాయుడికి 47 ఏళ్ల జైలు శిక్ష పడింది. శివగంగై జిల్లా కాలైయార్‌కోవిల్‌ పంచాయతీ యూనియన్‌ ప్రాథమిక పాఠశాల ప్రధానోపాధ్యాయుడిగా 2014లో మురుగన్‌ (54) పనిచేశారు. ఇతను పాఠశాల విద్యార్థినులపై లైంగిక వేధింపులకు పాల్పడినట్లు ఫిర్యాదులు వచ్చాయి. దీంతో పోలీసులు కేసు నమోదు చేసి దర్యాప్తు చేశారు. దర్యాప్తులో 6 మంది విద్యార్థినులను లైంగికంగా వేధించినట్లు తెలిసింది. దీంతో మురుగన్‌ను పోక్సో చట్టం కింద అరెస్టు చేశారు. ఈ కేసు విచారణ జిల్లా పోక్సో న్యాయస్థానంలో 10 ఏళ్లుగా జరుగుతోంది. ఈ నేపథ్యంలో సోమవారం కోర్టు తీర్పు వెలువడింది. నేరం రుజువు కావడంతో మురుగన్‌కు రెండు జీవిత ఖైదులతో పాటు 47 ఏళ్ల జైలు శిక్ష విధిస్తూ న్యాయమూర్తి తీర్పునిచ్చారు. అదేవిధంగా రూ.69 వేల జరిమానా విధించారు. బాధితులకు ప్రభుత్వం తరఫున రూ.29 లక్షలు నష్టపరిహారం అందించాలని ఆదేశించారు.