మే 13న దుకాణాలు, సంస్థలకు సెలవు

కార్మికశాఖ సంయుక్త కమిషనర్‌ ఆదూరు గణేశన్‌

అక్కయ్యపాలెం, న్యూస్‌టుడే: కార్మిక శాఖ ఎ.పి. దుకాణాలు, సంస్థల చట్టం-1988 ప్రకారం ఆంధ్రప్రదేశ్‌ శాసనసభ, లోక్‌సభ ఎన్నికలు జరిగే మే 13న దుకాణాలు, సంస్థలకు సెలవు ప్రకటించినట్లు కార్మిక శాఖ సంయుక్త కమిషనర్‌ ఆదూరు గణేశన్‌ ఓ ప్రకటనలో తెలిపారు. ఏదైనా వ్యాపారం, వాణిజ్యం, పారిశ్రామిక సంస్థ లేదా ఇతర సంస్థల్లో ఉద్యోగం చేస్తున్న ప్రతి ఒక్కరూ ఓటు వేసేందుకు వీలుగా పోలింగ్‌ రోజు సెలవు మంజూరు చేయాలని అదేశించారు. ఏదైనా యజమాని ఈ నిబంధన ఉల్లంఘిస్తే వారు జరిమానాతో పాటు శిక్షార్హులని తెలిపారు. దుకాణాలు, సంస్థల యజమానులు మే 13న కార్మికులకు వేతనంతో కూడిన సెలవు మంజూరు చేయాలని కార్మికశాఖ కమిషనర్‌ ఎం.వి.శేషగిరిబాబు ఇప్పటికే ఆదేశాలు జారీ చేశారని గణేశన్‌ గుర్తు చేశారు.