దాడి పూర్వాపరాలపై డీసీపీ ఆరా

దాడి జరిగిన ప్రాంతంలో స్థానికులతో మాట్లాడుతున్న డీసీపీ-2 ఎం.సత్తిబాబు 

మాధవధార, న్యూస్‌టుడే: తెదేపాకు ఓటు వేయలేదన్న కక్షతో కంచరపాలెం బర్మాక్యాంప్‌లో నూకాంబిక ఆలయం వద్ద గురువారం ఒక కుటుంబంపై జరిగిన దాడి కేసుకు సంబంధించి రాజకీయ ప్రమేయం ఉందన్న ఆరోపణల నేపథ్యంలో శుక్రవారం డీసీపీ-2 ఎం.సత్తిబాబు ఆ ప్రాంతాన్ని సందర్శించారు. ఈ సందర్భంగా చుట్టుపక్కల స్థానిక ప్రజల నుంచి దాడికి సంబంధించిన పూర్తి వివరాలను అడిగి తెలుసుకున్నారు. గొడవ ఎలా, ఎప్పుడు జరిగింది, గొడవకు గల కారణాలను అడిగి తెలుసుకున్నారు. బాధితుల ప్రవర్తన, ఇతర అంశాలపై పూర్తిగా పరిశీలన చేశారు. అయితే ఇది కేవలం వ్యక్తిగత కక్షలతోనే జరిగిందని, దీంట్లో ఎటువంటి రాజకీయ ప్రమేయం లేదని, బాధితులు ఇచ్చిన ఫిర్యాదులో కూడా రాజకీయ ప్రమేయం ఉన్నట్లుగా తెలియజేయలేదని, ఇది కేవలం కావాలనే ఎవరో బాధితులను తప్పుదోవ పట్టించారని డీసీపీ తెలియజేశారు. వెస్ట్‌ ఏసీపీ అన్నెపు నరసింహమూర్తి, సిబ్బంది పాల్గొన్నారు.