నెల్లూరు: తెదేపా హయాంలోనే ముస్లింలకు న్యాయం జరిగిందని ఆ పార్టీ అధినేత చంద్రబాబు అన్నారు. నెల్లూరులోని షాదీ మంజిల్‌లో ఆయన ముస్లింలతో నిర్వహించిన సమావేశంలో మాట్లాడారు. పరిపాలన అంటే ప్రజారంజకంగా ఉండాలన్నారు. స్వార్థం కోసం దోపిడి చేసి మోసం చేస్తే ప్రజలు గుణపాఠం చెబుతారని హెచ్చరించారు.

‘‘మా హయాంలో హైదరాబాద్‌లో ఉర్దూ వర్సిటీ ఏర్పాటు చేశాం. హజ్‌ హౌస్‌ నిర్మించి పలువురిని మక్కా పంపించాం. కడప, విజయవాడలో హజ్‌హౌస్‌లు నిర్మించాం. రూ.8 కోట్లు ఖర్చు పెట్టి షాదీ మంజిల్‌ కట్టించాం. ఐదేళ్ల వైకాపా పాలనలో ఒక్క భవనమైనా నిర్మించారా? మీకు రూ.10 ఇచ్చి రూ.100 దోచుకున్నారు. నిత్యావసరాలు సహా అన్నింటి ధరలు పెరిగాయి. నాసిరకం మద్యంతో కిడ్నీలు పాడై చనిపోతున్నారు. తెదేపా హయాంలో రొట్టెల పండుగను రాష్ట్ర స్థాయి పండగ చేశాం. అబ్దుల్‌ కలాం నైపుణ్యాభివృద్ధి కేంద్రం ఏర్పాటు చేశాం. వైకాపా పాలనలో ముస్లింలపై దాడులు, దౌర్జన్యాలు పెరిగాయి’’ అని చంద్రబాబు అన్నారు.