హైదరాబాద్‌: తెలంగాణలో పోలింగ్‌ జరుగుతుంటే నీటిని అడ్డంపెట్టుకుని నాగార్జునసాగర్‌ వద్ద జగన్‌ ప్రభుత్వం నాటకమాడిందని సీపీఐ జాతీయ కార్యదర్శి నారాయణ(CPI Narayana) ఆరోపించారు. కేసీఆర్‌ను(KCR) గెలిపించడం కోసం ఆయన కుట్ర పన్నారని విమర్శించారు. హైదరాబాద్‌లో నిర్వహించిన మీడియా సమావేశంలో నారాయణ మాట్లాడారు. ‘‘ఇన్నాళ్లూ జగన్ (YS Jagan) రాష్ట్ర ప్రయోజనాలను విస్మరించారు. ఆయనకు ఇప్పుడే నీళ్లు ఎందుకు గుర్తొచ్చాయి? జగన్‌ కుటిలయత్నాలు బెడిసికొట్టాయి’’ అని నారాయణ వ్యాఖ్యానించారు.

YS Jagan: ఇప్పుడే ఎందుకీ దండయాత్ర?

నాగార్జునసాగర్‌(Nagarjuna Sagar Dam) ఆనకట్ట వద్ద పోలీసుల పహారా కొనసాగుతోంది. ఏపీవైపు భారీగా మోహరించిన పోలీసులు.. ముళ్లకంచెల నడుమ డ్యామ్‌పై బందోబస్తు నిర్వహిస్తున్నారు. మరోవైపు తెలంగాణ పోలీసులు కూడా పెద్ద ఎత్తున అక్కడికి చేరుకుంటున్నారు. నేడు ఇరు రాష్ట్రాలకు చెందిన ఐజీ స్థాయి అధికారులు సాగర్‌ చేరుకుని పరిస్థితిని అంచనా వేసే అవకాశాలు ఉన్నాయి. ఇప్పటికే సుమారు నాలుగు వేల క్యూసెక్కుల నీటిని ఏపీ విడుదల చేసుకుంది.