Mortuary: మార్చురీలో మృతదేహాల కళ్లు మాయం..

భోపాల్‌: మధ్యప్రదేశ్‌లోని సాగర్‌ జిల్లా ఆస్పత్రిలో మృతదేహాల కళ్లు మాయమయ్యాయి. ఇందుకు ఎలుకలే కారణమై ఉండొచ్చని వైద్యాధికారులు చెప్పడం గమనార్హం. మోతీలాల్‌ అనే వ్యక్తి మృతదేహాన్ని ఈ నెల 4న వైద్యులు పోస్టుమార్టం నిమిత్తం మార్చురీకి తరలించారు. ఆ తర్వాతి రోజు వైద్యుడు వచ్చి చూసేసరికి ఓ కన్ను మాయమైంది.

ఫ్రీజర్‌ సరిగా పని చేయకపోవడంతో మృతదేహాన్ని బయటే ఉంచాల్సి వచ్చిందని అందువల్ల ఎలుకలు కన్ను ఎత్తుకుపోయి ఉండొచ్చని అక్కడి వైద్యులు వివరణ ఇచ్చారు. ఈ నెల 19న ఇదే తరహా ఘటన మళ్లీ జరిగింది. రమేశ్‌ అహివార్‌ అనే వ్యక్తి మృతదేహాన్ని ఈ నెల 17న ఫ్రీజర్లో భద్రపరిచారు. 19న డాక్టర్‌ ఫ్రీజర్‌ను తెరచి చూసేసరికి ఒక కన్ను మాయమైంది. ఫ్రీజర్‌లో ఉంచినా కన్ను ఎలా మాయమైందో అర్థం కావడం లేదని రెసిడెంట్‌ మెడికల్‌ ఆఫీసర్‌ వెల్లడించారు. ఎలుకలే కన్నును ఎత్తుకుపోయి ఉంటాయని ప్రాథమిక దర్యాప్తులో తేలిందని ఆయన అన్నారు. ఈ ఘటనపై రాష్ట్ర ప్రభుత్వం విచారణకు ఆదేశించింది.