Anushka Sharma: సమస్య తీర్చిన సోనమ్‌

ఇంటర్నెట్‌ డెస్క్: ప్రసవానంతరం స్త్రీలు ఎదుర్కొనే సమస్యల్లో జుట్టు రాలడం ఒకటి. హార్మోన్ల హెచ్చుతగ్గుల వల్ల ఇలా జరుగుతుంటుందనే విషయం తెలిసిందే. కొందరు వంటింటి చిట్కాలతో, మరికొందరు వైద్యుల సలహాలతో తమ సమస్యని పరిష్కరించుకుంటారు. తనకూ ఈ సమస్య ఎదురైందని, నటి సోనమ్‌ కపూర్‌ సలహా వల్ల దాన్నుంచి బయటపడ్డానని తెలియజేసింది బాలీవుడ్‌ నాయిక అనుష్క శర్మ. ఇన్‌స్టాగ్రామ్‌ వేదికగా శుక్రవారం తన కొత్త హెయిర్‌ కట్‌ ఫొటోల్ని పంచుకుంది అనుష్క. ఇందులో తెల్లని టీ షర్ట్‌, పసుపు జాకెట్‌లో కనిపించింది. తన కురుల సమస్యకి చెక్‌ పెట్టి, అందంగా తీర్చిదిద్దినందుకు జార్జ్‌ నార్త్‌వుడ్‌ అనే క్షౌరశాలకి, దాన్ని పరిచయం చేసిన సోనమ్‌ కపూర్‌కి ధన్యవాదాలు తెలియజేసింది. 2017లో విరాట్‌ కోహ్లీని పెళ్లి చేసుకున్న అనుష్క ఈ ఏడాది ఓ పాపకి జన్మనిచ్చింది. నటిగా కొంతకాలం నుంచి సినిమాలకు దూరంగా ఉంటున్నా నిర్మాతగా వ్యవహరిస్తోంది. సినిమాలతోపాటు వెబ్‌ సిరీస్‌లూ నిర్మిస్తోంది.