రింకూ..విషు.. ఓ మెజీషియన్‌

ఆ అబ్బాయినే పెళ్లి చేసుకోవాలని ఓ అమ్మాయికి పెద్దల అల్టిమేటం...ఆ అమ్మాయిని వివాహమాడాలని ఓ అబ్బాయికి ఇంట్లోవాళ్ల బలవంతం.. ఇది ఇలా జరుగుతుండగా మధ్యలో ఓ కొత్త వ్యక్తి వస్తాడు. ఆ తర్వాత ఏమైందనేది ‘అతరంగీ రే’లో చూడాల్సిందే. అక్షయ్‌కుమార్‌, ధనుష్‌, సారా అలీఖాన్‌ ప్రధాన పాత్రల్లో నటించిన చిత్రమిది. తాజాగా ఈ సినిమా ట్రైలర్‌ను విడుదల చేశారు. రొమాంటిక్‌ కామెడీగా ఆనంద్‌ ఎల్‌రాయ్‌ తెరకెక్కించిన ఈ సినిమా ట్రైలర్‌ ఆకట్టుకుంటోంది. ఇందులో రింకూగా సారా, విషుగా ధనుష్‌ పాత్రలు ఉండనున్నాయి. అక్షయ్‌కుమార్‌ పాత్రను చూపించారు కానీ... పరిచయం చేయలేదు. ఆయన ఇందులో సజత్‌ అనే ఓ మెజీషియన్‌గా నటిస్తున్నట్లు తెలుస్తోంది. ఏఆర్‌ రెహమాన్‌ సంగీతం అందించిన ఈ చిత్రం 24 డిసెంబరు డిస్నీ ప్లస్‌ హాట్‌స్టార్‌లో ప్రేక్షకుల ముందుకు రానుంది.