ఏఆర్‌ రెహమాన్‌కు ప్రత్యేక గౌరవం

ప్రముఖ సంగీత దర్శకుడు, ఆస్కార్‌ అవార్డ్‌ గ్రహీత ఏఆర్‌ రెహమాన్‌ ప్రత్యేక గౌరవాన్ని అందుకున్నారు. సంగీత రంగంలో ఆయన చేసిన కృషికి గానూ 43వ కైరో ఇంటర్నేషనల్‌ ఫిల్మ్‌ ఫెస్టివల్‌ (సిఫ్‌)లో ఆయన్ని ప్రత్యేకంగా సన్మానించారు. ఈ సందర్భంగా ఆదివారం సిఫ్‌ ప్రెసిడెంట్‌ మొహమ్మద్‌ హెఫ్జి చేతుల మీదుగా గౌరవ ట్రోఫీని అందుకున్నారు రెహమాన్‌. ఈ విషయాన్ని రెహమాన్‌ సామాజిక మాధ్యమాల వేదికగా తెలియజేశారు. ఈ సందర్భంగా వేడుకలో ట్రోఫీ అందుకుంటూ దిగిన ఓ ఫొటోను అభిమానులతో పంచుకున్నారు. ఆఫ్రికాలో అత్యంత పురాతన చలన చిత్రోత్సవం ‘సిఫ్‌’. ఈజిప్ట్‌లోని కైరో ఒపెరా హౌస్‌లో నవంబర్‌ 28న ప్రారంభమైన ఈ ప్రతిష్ఠాత్మక చిత్రోత్సవం.. డిసెంబర్‌ 5న ముగియనుంది. రెహమాన్‌ ఇటీవలే ‘99 సాంగ్స్‌’ సినిమాతో నిర్మాతగా మారిన సంగతి తెలిసిందే.