Nani: మహేశ్‌ బాబుతో మల్టీస్టారర్‌.. నాని ఆన్సర్‌ ఏంటంటే?

ఇంటర్నెట్‌ డెస్క్‌: సోషల్‌ మీడియాలో యాక్టివ్‌గా ఉండే హీరోల్లో నాని (nani) ఒకరు. తన కొత్త సినిమా ‘హాయ్‌ నాన్న’ (Hi Nanna) ఈనెల 7న (Hi Nanna Release Date) విడుదల కానున్న సందర్భంగా ‘ఎక్స్‌’ వేదికగా అభిమానులతో ముచ్చటించారాయన. ఈ క్రమంలోనే మహేశ్‌ బాబు (Mahesh Babu)తో కలిసి నటించే అవకాశం ఉందా? అని ఓ ఫ్యాన్‌ అడగ్గా నాని ఆసక్తికర సమాధానమిచ్చారు. ఇంకా ఆయనకు ఎదురైన ప్రశ్నలేంటి?ఎలా స్పందించారంటే..?

* శౌర్యువ్‌ దర్శకత్వంలో నటించడం ఎలా అనిపించింది?

నాని: ఈ సినిమాతో శౌర్యువ్‌ని దర్శకుడిగా పరిచయం చేస్తున్నందుకు గర్వంగా ఉంది. అతడి ప్రతిభని మీరు మూడు రోజుల్లో చూస్తారు.

* ‘హాయ్‌ నాన్న’ సినిమా చూస్తుంటే బోర్‌ ఫీలవుతామా..?

నాని: ఒక్క సెకను కూడా అలా అనిపించదు. మూడోసారి చూస్తున్నా ఆ ఫీలింగ్ కలగదు.

* ఈ సినిమాలో శ్రుతి హాసన్‌తో మీ సన్నివేశాలు ఎలా ఉండబోతున్నాయి?

నాని: సీన్స్‌ కాదు సాంగ్‌.. అదిరిపోతుంది.

* తెలుగు రాష్ట్రాల్లో ఈ సినిమా పెయిడ్‌ ప్రీమియర్స్‌ ఉండే అవకాశం ఉందా?

నాని: పెయిడ్‌ ప్రీమియర్స్‌ లేవు. హైదరాబాద్‌లోని ఎ.ఎం.బి. సినిమాస్‌లో మీడియా, పలువురు ప్రముఖులకు కొన్ని ప్రత్యేక షోలు ఉంటాయి. ఈ నెల 6 రాత్రిలోపు ఈ సినిమా ఉందా, ఊడిందా? అనేది మీకు తెలిసిపోతుంది. ఎప్పటికీ ఉండిపోతుంది అనేది నా ఫీలింగ్‌.

* సినిమా ప్రమోట్‌ చేసేందుకు ఆస్ట్రేలియా రావొచ్చు కదా అన్నా..

నాని: పాములు ఉంటాయట కదా అక్కడ!

* మీరు నటించిన ‘శ్యామ్‌సింగ రాయ్‌’కు ప్రీక్వెల్‌ తెరకెక్కించే ఆలోచన ఉందా? శ్యామ్‌, రోజీలతో మళ్లీ ప్రేమలో పడాలని ఉంది.

నాని: రోజీ అలియాస్‌ మైత్రీ (హీరోయిన్‌ సాయి పల్లవి పోషించిన పాత్ర)ని అడిగి చెబుతా.

* మీపై నెగెటివిటీ వచ్చిన సమయంలో ఎలా ఫీలవుతారు?

నాని: మనపై ప్రేమాభిమానాలు ఎక్కువయ్యే కొద్దీ నెగెటివిటీ కూడా తారసపడుతుంది. అది కావాలి.. ఇది వద్దు అంటే ఎలా?

ఓ ఫ్యాన్‌ కోరిక మేరకు పంచుకున్న ఫొటో..

* వర్ధమాన దర్శకుల్లో ఎవరితో కలిసి పనిచేయాలనుకుంటున్నారు?

నాని: వేణు (బలగం చిత్ర దర్శకుడు)

* గౌతమ్‌ తిన్ననూరి (జెర్సీ) దర్శకత్వంలో మరోసారి మీ సినిమా ఆశించొచ్చా?

నాని: 100 శాతం.

* అన్నా నేను బొగ్గు నేపథ్యంలో ఓ కథ రాశా. నీ డేట్స్‌ ఇవ్వవా సినిమా చేస్తా..

నాని: అలాంటి బ్యాక్‌డ్రాప్‌లో చేయడం ఇక నా వల్ల కాదు. (నాని నటించిన ‘దసరా’ అదే నేపథ్యంలో తెరకెక్కి మంచి విజయం అందుకున్న సంగతి తెలిసిందే)

* మహేశ్‌బాబుతో మల్టీస్టారర్‌ చేసే ప్లాన్స్‌ ఉన్నాయా?

నాని: చేస్తే బాగుంటుంది. త్రివిక్రమ్‌ గారూ వింటున్నారా..?

* మీ సక్సెస్‌ మంత్ర ఏంటి? చెబితే నేనూ నా రంగంలో అప్లై చేసుకుంటా?

నాని: ‘మంత్ర’లాంటివి లేకపోవడమే నా మంత్ర.

* తెలంగాణ అసెంబ్లీ ఎన్నికల్లో ఓటు వేశారు కదా. ఫలితాలపై మీ అభిప్రాయం?

నాని: పదేళ్లు బ్లాక్‌బస్టర్‌ సినిమా చూశాం. థియేటర్‌లో సినిమా మారింది. ఇది కూడా బ్లాక్‌బస్టర్‌ అవ్వాలని కోరుకుందాం.

* ఇటీవల మీ కంటికి గాయమైంది కదా. ఇప్పుడెలా ఉంది?

నాని: తగ్గింది. ఇప్పుడు బాగానే ఉంది.